Read Biete NAHUMA 1 Bible Online

NAHUMA 1 - Biete bible

NAHUMA 1

¹Ninevi kho chungthu, Elkos mi Nahuman inlârna ai mu chu:

²PUMAPA chu Pathian theimâk ina neh phuba lah ngai a nit, PUMAPA khan ningmurin phuba ai lâk ngai a nit; PUMAPA khan ama doituhei chungah phuba a lâk a, A râlhei rangah khan ningthikna ai bûm a nit.

³PUMAPA khah â lung arvuai a, Natinsat takka sin itho thei a nit a, Mi siahei chu kuttum tho loiin isua tlak no nih; Thlisim neh thlipuihei hi PUMAPA lampui a nit a, Sûmhei chu a kea vâivut a nit.

⁴Tuikhanglian khah a ngo a, a kang tâk a, Vadunghei khom an kang zoi a; Basan ram neh Karmel tlâng a châr zoi a, Lebanon tlânga pârhei khah a ṭuai a.

⁵Tlâng ilianhei khah ama sikin an inîng a, Mualhei khom an zor zoi a, A makungah khan rinêng hi a nîng dur dur a, Rammual neh a sunga om murdihei neh khan.

⁶A ningthik chu tûm â tuang zoi thei rang? A ningmur natinsat takkah khan tûm â om thei rang? A ningthikna khah mei angkan a bun a, Lungpuihei khom a makungah chu an ikoi chit ngai a nit.

⁷PUMAPA chu a ṭhat a, Lungzîng nî-a zôkna kulpui idet a nit; Ama chunga iamna ringattuhei chu a ngaisak ngai a.

⁸Tuiilian iluang zut zutin thil a îsiat ngai angkah hin, Ninevi khua chu inrimang a ti. Â râlhei chu mun izîngah khan ûm zit a ti.

⁹Ithôm PUMAPA kal lamin thil nin ingaitua? Rimang ripna nangni a îthlun rang a nit, Ama doi rang zel om khâi no nih.

¹⁰Rilingbuk angkana omin, zu ina hoiinhâiin om khom seh, Bupôl ichâr angkan la kâng rimang zit an ti.

¹¹Nangmah, Ninevi, ni sunga rithokin mi khatkah PUMAPA sêla thil isual ngaituatu ai suak tâk a nit.

¹²PUMAPA khan hingka hin a ti; Asuriahei hih irât okin, tam ok khom sela, inlîrin om an ta, rimang an ti. Ki mihei o, deng nangni lei inthei ta khom inlang, deng nangni inthei nôk khâi no ning e.

¹³A ringkol ni pêl khah ikhiak ki ta, nang an khuapna ruihei khah isat zit ki ti.

¹⁴Asuria chungchâng thua PUMAPA thupêk chu amahih a nit, “An riming ripuh rang chi nei no nia. An pathian in ata an mirmil siamhei chu inrimang ki ti. Asuriahei rang ithlân siam ki ta; an isual sikin iring tlâk ni mak,” a ti a.

¹⁵Itlângheia thurchi ṭha thlun a, ringeina thu inpuangtuhei ke chu en ta u; O Juda, ni kuthei khah mang inla, ni ṭonginkunghei khah len roh. Mi sia khan ni ram rûn nôk khâi no nih. Anni chu inrimang rip an nit tâk.