Read Biete NAHUMA 2 Bible Online

NAHUMA 2 - Biete bible

NAHUMA 2

¹Ninevi, nang chekinrinôitu rang khah a hong tâk e! Ni dâipui enkol inla, lampui khah rung inṭha roh; Ridoi rangin risiam inla, ni râtna siaminṭha roh.

²Irâlhein an isiat maa Israel roinpuina khah, PUMAPA khan a înding nôk rang tâk a nit.

³Irâlhei khan ipho sen an chôi a, puan seninlârin an rivo a, Ridoi ranga an risiam nî-ah khan an tâlihei kha artlêk uar uar a, An ifei ritle khom a vâr zap zap a, An sakorhei kha an lei vuan suai suai a.

⁴Tâlihei chu kotsuaah an itlân dur dur a, Khopui lamilianheiah an rikhêl suai suai a. Meiser angkan an hong vâr zup zup a; Khothlâr angkan an rilek zup zup a.

⁵A milianhei khah a koi bûm a; An fe thiai lâiin an ibâ phît a; Kulbang tiang rimot takkan an pan a, Kul bang isimna rang mangruahei an siam a.

⁶Vadung tiang kotbâi khah iong a nit a, Rêng in khah rilônthingnan a sip tâk.

⁷Rêngnu khah an man a, bôiin an ṭhui a, Â somnuhei khah an iṭâng richûmin, Vaṭhu râm angkan an ṭap ngûi ngûi a,

⁸Tui tial ichima dîl tui ai ṭe hûl hûl ngai angkan, Mipuihei chu Ninevi ata an suak hung hung a, Ringam rei, ringam rei, itin an isam a, Khanniseh, tute nungtiang kîr khâi mak.

⁹Tangkarua sumhei khah lah pêk unla, Rângkachak sumhei khah lah pêk rei. Khopui khah richon ilu tinrênga sip a nit.

¹⁰Ninevi khah inrimang a nit tâk, a siat tâk a, a ram vang tâk. Lungril chu ṭinan a sip a; zaper ân thing a, Konghei a nat ngûi ngûi a, mâihei ai duk zoi tâk a nit.

¹¹Ṭina zel om loia sakeibakneipui neh tlang, An tetehei neh an lêng vêlna an ribu zôl khah takâm ai om tâk? Sakeibaknei tetehein fâk an zongna mun khah taktiang im ai om tâk? Khangkana khopui khah takâm ai om tâk?

¹²A tehei neh a puinu khop rang rup sa ithat a, sânphor a, Â pûkhei chu saruak insip ngai sakeibaknei tlang khah takâm ai om tâk?

¹³PUMAPA Tinrêngthothei khan, “Ringai roh, nang kî nel a nit, ni tâlihei khah hâlinrivâm ki ta, ni sipaihei khah khandaiin inrimang ki ta, mi danghei ata nî lâk murdi khah nang lah pêk vang ki ta, rinêngah hin ni thuneina rêng rêng iria ni khâi no nih,” a ti a.