Read Biete NAHUMA 3 Bible Online

NAHUMA 3 - Biete bible

NAHUMA 3

¹Thisen isua ngai khopui, milak neh râllâk sum ibûm khôm a; Risuamna mong ngai ino mun chu a chung ân khôk vang na!

²Zêpna lâidâng irî hei, tâli ke kûi irî hei, Sakor vuan irî hei, sakor tâli tlân irî dur durhei chu ringai ta u!

³Sakor chungchuang mihein an hong ibô a, Khandai an ilek inritlêk zup zup a, An ifei lôn chu artlêk zar zar a; Mi â thi neh â pop an idal rum a, Ruak tep zoi loi arthek chût a, Ruakhei khah an ripâl lônin an ibâ a.

⁴Kha thilhei khah nochizuarnu sual sika hong iom a nit. Nu mêl iṭha tak, mi lêm ithiam tak a nit a, Nam danghei idôi a, a bôia siamtu a nit.

⁵Tinrêngthothei PUMAPA khan, “Ringai ta nang kî nel a nit, ni puan nang lip pêk vang ki ta; Korongboin namhei mitmuah mualinphoi takkan nang siang ki ti.

⁶Nimnok porinche tak nang vur ki ta, Zak iom takkan nang siang ki ta, Mihei nuizabûr rangin nang siam ki ti.

⁷Nang imu kan ni ziang ata itlân pat an ta, ‘Ninevi khua chu ai ram tâk a nit; tûm â sûn rang tâk? Taktianga rithokin im thlangam isak rang an iom rang tak?’ tîng an ti,” a ti a.

⁸Nail vadung rikama om, tui ihual vêl, Thebes khua, Aigupta khopui nêkan nangmah Ninevi ni chan ai ṭhat ual rang mani?

⁹Ethiopia neh Aigupta khah a râtna nâr a nit a, a thuneina khah mongna nei ino a nit, Put neh Libia khom ama ṭangpuituhei an nit.

¹⁰Khangkan dôran khom Thebes mihei khah suaka ṭhui inrimang an nit a, Kotsua tinah an naipangtehei khah rinêng itonan an mang pêk a, a milianhei murdi zingziria khuapin an kâi a, â ṭhuituhei khan thlasânin â dong rang an irsem a nit.

¹¹Ninevi nang khom inrui sâng ni ta, ibok rak ni ti, ne râlhei ata izôk rang itumin ribîk mun zong ni ti.

¹²Ni kulpui murdihei khah theipui min masa soi iṭhul, â fah rangtu bâia zuang ilût thal angkah hi nîng a ti.

¹³Ringai ta, ni insunga ni sipai khom nupang angkah nîng an ta; ni ram lûtna kotbâi khah ne râlhei rangin ri-ong kung a ta; a kotbâi ikalna thingthluanhei khom meiin kâng vang a ti.

¹⁴Hualkhapa ni om sunga rang tui rihung inla, ni kulpuihei indet roh; Ipil ipeng inla, talung rang ipil lûm siam thlâm roh.

¹⁵Amakhan meiin nang kâng inrimang a ta, khandaia thatin om ni ta, ikhâiin chimu ai fâk inrimang ngai angkan fân rimangin om ni ti. Ikhâi angkan pung rei, chimu fah ngai ikhâi angkah taka tamin.

¹⁶Sumrivaituhei kha rivâna ârsi nêka tamin nen pung a; khanniseh, ikhâi an rithla phara vuang rimang ngai angkah hin an vuang rimang zoi tâk.

¹⁷Ni milianhei khah ikhâi angkah pai an nit a, ni sipai ruaituhei khom khah rammual dâi nî-a banga ikhâi lôm ifu khôm angkah an nit, inî a hong suaka vuang rimang nôk ngai angkah hi an nit, an omna mun rêng rêng iria ni khâi mak.

¹⁸O Asuria rêngpa, nangma vêngtuhei khah an in vang tâk a, ni milianhei khom kumkhuaka rangin an ilîr zoi tâk. Ni mipuihei khom itlângah an rithek indar riai a, â ṭhui bûmtu rang tute om khâi mak e.

¹⁹Ni natnahei indam thei ni khâi mak a, ni sâbe khah ai natinsat ok a nit. Ni siat rimangna thu ria kan râifânin an kut iben an ti. Ni nunsiat kuttum kha, â tuang ino tûm â om?