Read Biete HABAKUKA 1 Bible Online

HABAKUKA 1 - Biete bible

HABAKUKA 1

¹Inlârnaa zânthla Habakuka thil mu chu:

²O PUMAPA, itena sôt im ne ṭangpui ranga nang ke samna, ner ngai pêk loiin nî om rang? Ritôk rihêmna thu ke khêk suakpui a, nangmah lakin nen zôk ual mak che a.

³Ithôm hingka dôra thil ṭhano an ithohei hih ni ne înmu a? Ingkan im sintho dikino takhei hih nî en ṭian thei? Rirokna neh ritôk rihêmnahei a om mai a, ringona neh rikhalna kil tinah ai om mai a nit.

⁴Dân khan ritha nei mak a, chanlamboi a nit, roirêl dikna rêng rêng suak mak e. Mi felhei chu mi sualhei khan an del rikhû a; khasikin, roirêlna dik khah ai suak thei ngai ino a nit.

⁵PUMAPA khan a mihei ziangah, “Nin kôlvêla namhei en unla, thlîr mai unla, natinsat takkan nin ringai rikhêl a ti. Nin riat khoma nin iôi ino rang nin mitmuah thil khatkah kî tho rang a nit.

⁶Ringai rei, Babilon mi, nam nunisia tak neh lung irât tak, mi ram khom idong ituma rammual pumpui pâl rikan ngaituhei khah ki hong îthoi inhar a nit.

⁷Iṭi an omin an inrît tak tak a, ripâk neh risong takkan an châng ngai a.

⁸“An sakorhei khom keiârsi nêkan an châng â rang ual a, inia inruak nêkan khom iṭi an iom ual a nit. An sakor chungchuang mihei kha ram ilah taka rithokin irât takkan an hong itlân dur dur a, mupui âr ibô rang angkan an rât a.

⁹“Mi rûn ituma hong an nit a, an rihu ria murdi an rilo ân thing a. An bôi manhei chu tuipuia ṭiai dôra tam an nit.

¹⁰A nit, rênghei khom an sirpol a, milianhei kha an nuiso a; kulpui idet tin tinhei khomin idan thei mak a, rinêng an bun inpông a, khopui chu an lâk thiai ngai a.

¹¹Thlipui angkan an hong inuai a, an lîm thur thur a; nikhomsela, an râtna khah pathianin an be a, thiam ino an ichang a nit,” a ti a.

¹²O PUMAPA, rammual insiang ata nang chu Pathian ni nit. Nang chu ki Pathian, rithiang neh kumkhuantluanga ring mai ni nit. O PUMAPA ki Pathian, nangman Babilonhei kha kuttum nê tho rangin ner thlang tâk a. O ki Lungpui, nangman anni khah ne thununtu rangin ni înkung tâk a nit.

¹³Ni mit chu arthiang tak tak a, thil isual en ṭian thei mak che a, ingkan im vârrilet taka thotuhei khah nî en ṭian thei? Mi siahein an nêka mi fel an fâk inrimang lâiah hin ingkam nî dâirek thei?

¹⁴Ingkan im miriamhei hih tuikhangliana ingahei neh mîringhei an chunga roirêltu nei ual ino angkan teh nî siam hi?

¹⁵Babilonhei hin mihei khah inga angkan rikuaiin an in-ôk a, an lênin an man a, an lênkhangzamin an ifûn khôm a; khasikin, râifânin an ilôm a nit.

¹⁶Kha sik takah khan an lênhei khah chubai an ûn a, an lênkhang ziangah ribôlna an lan a, an len khan thil iṭha tinrêng an ta rang â sua pêk sikin.

¹⁷Kumkhuakan an khandaihei an imang maiin, lungkhamna boi riai kan namhei khah an ithat inrimang mai rang mani?