Read Biete HABAKUKA 2 Bible Online

HABAKUKA 2 - Biete bible

HABAKUKA 2

¹Ki râlrungbûkah lui ki ta, ki zianga PUMAPA thu sîr rang ingâkin neh ki nuarna chungchânga a ne sâmna ngâkin thlîr ki ti.

²PUMAPA khan hingka hin a ne sâm a: “Inlârna thu chu lungphêkah riziak inla, itlân pum khoma tep thei rang dôra felin riziak roh.

³Inlârna hi a zoron kung taka tlung rang a nit sikin riziakin seh roh. A zoro a hong inâi tîr tîr a nit, inkhêl no nih. Sôt viat khom seh ngâk roh; ai tlung ngêt rang a nit, itlâi ual no nih.

⁴Ringai roh, tukhom mi sia chu inzôkin om no nia; nikhomsela, mi fel chu a iamna sikin ring a ti,” a ti a.

⁵Richon hi rilêmna a nit a, mi kuatinkamhei chu an risongin, om ṭian thei ngai mak. Thina angkan khop tik nei ngai mak e. An ziangah nam tin an ṭhui bûm a, mi murdi an ibûm khôm ngai a nit.

⁶An mi ṭhui bûm tin tinhei khan an chungah rihel an ta, an en nuam no tlia inlang an ti. An ziangah, “Mahni ta nino zâlrâta la a, inru thila richongtu chu an chung an khôk e! Itena sôt im khangkan an itho mai rang?” tîng an ti.

⁷Nikhomsela, ni riat man, ni lâkai ritângna khan nang hong ṭhîng thut an ta, lungzîng nang hong sak tak tak an ta, an kuttum tuang ni ti.

⁸Nam itam takkah ne rok tâk a, mihei thisen ne sua a, ram ni rûn a, khopui neh a sunga lêng murdihei chungah kuttum ne lek tâk sikah khan, a la ringhei khan nang rûn tâng an ti.

⁹Dikino taka richon la lût a, mi sual kut ituang iṭia in iṭha tak tak isintu chu a chung ân khôk vang na!

¹⁰Ni thil phanhei hin ni insung rang mualphoina â thlun a, mi tam takkah ni that inrimangna hin ni ringna chungah siatna ni îthlun a nit.

¹¹Nang inelin banga lunghei khom ikhêk an ta, ilianghei khan lei inrikhông a ti.

¹²Thisena khopui inding a, siatnaa khopui siamtu chu a chung ân khôk vang na!

¹³Ringai ta u, mihein mei kâng rang ringotin in an sin a, namhei khom rifena boi chanlamboiah an isôl hi, Tinrêngthothei PUMAPA itho a nit.

¹⁴Tuikhanglian kha tuiin ai sip khap angkan PUMAPA roinpuina riatnan rinêng hi sip zit a ti.

¹⁵A bungahei mualphoi isak ituma zu in rang ipe a, an inrui neng idêna ipetu chu a chung ân khôk vang na!

¹⁶Roinpuina nêkan mualinphoinan nang rikhû a ti. Nangman in inla, korongboin om ṭian roh. PUMAPA khan a thununna kilât nangin in a ta, ni roinpuina kha mualphoina chang a ti.

¹⁷Lebanon rampui ner vât a, atûn chu nangmah rivâtin om tâng ni ti. Ramsahei ni that sikin atûn chu ramsahein nang inṭi tâng an ti. Miriam thisen ne sua a, ramheiah, khopuiheiah neh a sunga lênghei chungah tharum ne lek sikin hi thilhei hih ni chungah ai tlung rang a nit.

¹⁸Isiam tot mirmil hih im arfen a? Miriamhei kut suak a nit a, milak chanlamboi a nit. Â siamtun ama kut suak pathianin a iam nôk a, mirmil ṭong thei ino iam chu na!

¹⁹Thing ziangah, “Har roh,” iti a, lung ṭong thei ino ziangah, “Thoi roh,” ititu chu a chung ân khôk vang na! Amahin nang a înrisei thei rang mani? En ta, rângkachak neh tangkaruaa inluan ni khom seh, a sungah rithuak rêng rêng ai om tlak ino a nit.

²⁰PUMAPA chu a In rithiangah a om a; rinênga mi murdihei chu a makungah dâirek riseh.