Read Biete HABAKUKA 3 Bible Online

HABAKUKA 3 - Biete bible

HABAKUKA 3

¹Amahih zânthla Habakuka ṭongṭaina a nit:

²O PUMAPA, ni sintho thurchi ki lei riatin, Maritiom ki ti vang na! O PUMAPA, tiana ni sinthohei angkah khan tho nôk inla, Kin takchung ngêiah hin tho nôk roh. Ni ningthik tak tak khom sela lung nen kham roh.

³Pathian chu Edom rama rithokin a zuang nôk a, Pathian rithiangah chu Paran tlânga rithokin ai zuang a nit. A roinpuinan rivânhei khi a tuam a, Ama inpâknan rinêng a sip a.

⁴A vâr tlia chu vâr ri-el tak a nit a; A kuta rithokin ivâr a zuang suak a, Amakhan a sinthotheina ithupin a om a.

⁵Ripui kha a matonah a tir a, Â nungah khan thina a zuang thal a.

⁶Â ding a, rinêng khah â nîng dûm dûm a, A ngat vêl a, namhei khah rilônthingin an om a; Itlâng rilunhei khah a koidar a, Tianlâia a lêngna ngai mualhei khah a chim zoi tâk a.

⁷Kusan mihei rithlavâia om neh Midianhei rilônthinga om khah ki mu a.

⁸O PUMAPA, vadunghei khan ne lung an înhoi ino mani? Tuipuihei neh tuikhanglianhei khan ni ning an înthik mani? Ni sakor, ni zoina tâli chungah khan ni chuang tâk a?

⁹Ni phel kha ni kam ṭian a, Ni thal kha ikâp rangin nen rifûk diam a, Vadung luangna rangin rinêng khah ni kâp ikhoi a.

¹⁰Tlânghein nang an mu a, an ṭi a; Rivân ata ruasângsari a sûr a. Tui inthûk takin irî â sua hum hum a, Risâng takkan a hong rifôn a.

¹¹Ni thal ilêng suai vâr neh, Ne fei ritle zar zar sikin, Inî neh ithla khah an om mun chitah an iding ṭian a.

¹²Ningmurin rinêng ni chîl suak a, Ningthikin namhei ni pâl lôn a.

¹³Ni mihei inzôk rangin ni suak a, Ni rêng rithlang inzôk rangin. Mi sual ruaitu khah ne tôk a, Â nung izuituhei khah nen rimang vang a.

¹⁴Inrûkka inriang fan rimang ngaitu, Thlisim angkana ne chek inuaichit ituma hong rithok, Ruaitupa khah ne feiin ni sun tâk a.

¹⁵Ni sakorhein tuipui khah ni pâl lôn a, A huan chur chur tâk a.

¹⁶Amakhah ki riatin, ker lo ân thing a, Ki chungmul a thoi a, ker kam artôk nat nat a; Ki zaper ân thing mai a, ki ke arphêt tâk a. Pathianin ne doituhei kuttum a tho nî sûn chu dâirek ki ta, Lungringam takkan ngâk mai ki ti.

¹⁷Theipui kung pâr khâi loiin, Grep rui irâ khâi no khom sela, Oliv thing khom irâ khâi loiin, Loiheiah îte vâng khâi no khom sela, Rikula bera rimang zoiin, seh inah sial om khâi no khom sela,

¹⁸Lôm mai ki ti PUMAPA a khan, Ki saninringtu Pathianah khan la lôm mai ki ti.

¹⁹PUMAPA, Pathian chu ki râtna a nit. Sakhi ke angkan ki ke ân rât a, Itlângheiah izôkriam kan a nen lêng ngai.