Read Biete ZEFANIA 1 Bible Online

ZEFANIA 1 - Biete bible

ZEFANIA 1

¹Judai ramah Amona naipa Josia an lal lâiin PUMAPA thu Zefania ziangah a zuang tlung a. Zefania kha rêng Hezekia richi, Amaria nai Gadalia naipa, Kusia nai a nit.

²“Rinêng chung ata thil tinrêng inrimang vang ki ti,” iti hi PUMAPA thu suak a nit.

³“Miriam neh sahei inrimang ki ta; chungavuang ivahei neh tuipuia ingahei inrimang ki ti. Mi sualhei kha inlîr ki ta, rinêng chung ata miriam inram riai ki ti,” iti hi PUMAPA thu suak a nit.

⁴“Judahei neh Jerusalem luatuhei murdi chungah ki kut ilek ki ta; hi muna rithokah hin Baal chubai ûnna murdi inrimang vang ki ta, a sin itho ngai, a thiampuhei khom tutên reh tlak khâi no nih.

⁵Inchungsîpa luia, inî, ithla, neh ârsi hei chubai iûn ngaihei kha inrimang ki ta; PUMAPA chubai iûn a, a ziangah ṭonginkung a, Malkom pathian maa ṭonginkung nôk a, va khûn nôk ngaihei kha inrimang ki ti.

⁶PUMAPA nung isongtuhei neh PUMAPA zong loi a, amah isôn nuam inotuhei khah inrimang vang ki ti,” PUMAPA khan a ti.

⁷PUMAPA Pathian maah khan dâirek rei, PUMAPA nikhua khah a nâi tâk a; PUMAPA khan a mihei khah ribôlnaa sa an ilan ngai angkana lan rangin ân rifûk zoi tâk a, Judahei hong irûn rang irâlhei khom ai koi tâk a nit.

⁸Khante, PUMAPA khan, “That inrimang nî-ah khan ruaituhei neh rêng naipahei neh nam dang tho dân ilatuhei murdi khah kuttum thông ki ti.

⁹Kha nî-ah khan chu pathian dikino chubai iûntuhei murdi neh inru thil neh râllâk suma an pathian in insip ranga mi suam neh mi that ngaihei khah kuttum thông ki ti.

¹⁰“Kha nî-ah khan Jerusalema Inga Kotbâia rithoka khêk irî hei, khopui bung ithara rithoka irung ngûi ngûi hei neh tlângsîpa rithoka irî dur dur hei riang nin ti.

¹¹Khopui bung dop tianga mihei, amakhah nin riatin ṭapin irung rei, rivaimi murdi an irmang zoi tâk a nit.

¹²“Kha tikin chu hingka hin nîng a ta, meiser ichokin Jerusalem zong suak ki ta; an khâta ninginbei a, lungilian taka om a, an lungrilah, ‘PUMAPA khan â sia manih, â ṭha manih îte sin ngai mak,’ itituhei khah kuttum thông ki ti.

¹³Khante, an richonhei khah min lah pêk an ta; a nit, inhei sin an ta; nikhomseh, lua no nih; grep rikulhei siam an ta; nikhomseh, a uain kha chu in tlak no nih,” a ti a.

¹⁴PUMAPA nikhuan thang khah a nâi tâk e, a nâi teng tâk a, a zuang itlung zel rang a nit, PUMAPA nikhua rî khah inrît tak a nit; râlpahei ilua khom inrung ngûi ngûi an ti.

¹⁵Kha nikhua khah ningthikna sûn a nit a, lungzîng neh dengthei nî, siatna neh rimangna nî, izîng neh khua rinîm nî, sûmpui neh zîng richel chit nî, nîng a ti.

¹⁶Kulpui ideta rikul khopuihei chungah neh kho kul risânghei chungah bekul neh râl puang rihu irîna nikhua nîng a ti.

¹⁷PUMAPA khan, “Miriamhei chungah dengtheina zuang ithlun ki ta, miticho angkan rivâk an ta; ki chungah an isual sikin an thisen khah tui angkan luang a ta, an ruak khah nimnok angkan nuaiah rithek chût a ti,” a ti a.

¹⁸PUMAPA ningthikna nî-ah khan an rângkachak manih, an tangkarua manih khomin anmani inzôk thei no nia; rammual pumpui hih a ningthikna meiah khan hâl infâi vang a ti. Rinêng chunga om murdi inrimang riai a ta; a nit, voikarengin rimangna inrît tak ithlun a ti.