Read Biete ZEFANIA 2 Bible Online

ZEFANIA 2 - Biete bible

ZEFANIA 2

¹O nam zaksalhei, Farsi ithlîn ai sêm inrimang ngai angkana sêm inrimanga nin om man neh, PUMAPA ningthikna inrît tak khah nin chungah a zuang tlung man neh, PUMAPA ningthikna nikhua khah nin chungah a zuang tlung mah hin, hong ribûm unla, ngaitua tlâng rei.

³Ram sunga ringai ichîn, a thupêk izômtuhei o, PUMAPA tiang ngat rei. Felna zong unla, PUMAPA makungah ringaiichîn takkan om rei; PUMAPA ningthikna nî-ah khan dengtheina nin zôk duai lôi im.

⁴Gaza khua khah imarakin om a ta, Askelon khua kha khoramin om a ti; Asdod khua mihei khah sûnlâia ûm rizûlin om an ta, Ekron khua mihei khom ûmisua nîng an ti.

⁵Tuipui rikama om Keriot mihei o, nin chung ân khôk vang na! PUMAPA khan nin chung thu ai rêl tâk a nit hih. Filistia mihei omna Kanan ram chu tute zua loiin inrimang vang a ti.

⁶Khante, tuipui rikamhei kha rampuiin hong thuar a ta, Berapuhei in neh berahei rikul omna nîng a ti.

⁷Khanchu, tuipui rikamhei khah Juda mi la om isunhein luang an ta, amakhan an bera lômhei khah inlêng an ta, zânah khan Askelon khua mihei in irongah khan riak an ti. PUMAPA an Pathian khah an ziangah om a ta, vângisak takkan siam nôk a ti.

⁸Tinrêngthothei PUMAPA khan, “Ki mihei chunga Moab neh Amon mihei ripâkna neh risongnahei, an ram ilah pêk ituma an riloih dânhei khah kî riat mai a nit.

⁹Israelhei Pathian iringah kî nit angkan ṭong ki irkhâm a nit. Moab neh Amon khah Sodom neh Gomora angkan inrimang nîng a ti. An ram khah ichikhur, loisûla sip, kumkhuaka mangmunboi chang tâng a ti. Ki mi la om isunhei khan la rûn an ta, an ram khah la lua pêk an ti,” a ti a.

¹⁰Tinrêngthothei PUMAPA mihei chungah an ripâkna, an risongna, neh an musitna sikin khangkah khan Moab neh Amon hei khah denginthei nîng an ti.

¹¹An rangin PUMAPA khah iṭiom tak nîng a ta; a nit, rinênga pathian murdi chu chanlamboi korong inchang a ti. Khanchu, mihein amah chubai ûn an ta, mi tinin mahni mun chitah chubai ûn an ti.

¹²PUMAPA khan Ethiopia mihei khom a khandaiin that a ti.

¹³Khante, mâr ram tiang chungah a kut ilek a ta, Asuria ram inrimang a ta, Ninevi khua inram a ta, ramchâr angkan inṭôl a ti.

¹⁴Zu-va, ramsa tinrênghei riakna mun nîng a ta, simbu neh sarkuhei chu khoramah khan om an ti. Chopui sîpah khan riak an ta, tukverheiah irâm an ta, rikalheiah khan vaâk fûng an ta, sidar thinga sin inhei khom iṭhet chitin om a ti.

¹⁵Amahih khopui risong tak, mahni riiam pam, a lungrila, “Keima ban hih tute omak,” iti ngai om dân chu a nit. “Satinsarêng chêkinbualna rang ringotin, a ram natinsat tâk vang na,” itin â thleng rilôi kan an idang ichek vong vong an ti.