Read Biete ZEFANIA 3 Bible Online

ZEFANIA 3 - Biete bible

ZEFANIA 3

¹Rihel ngai neh isia porinche neh a mihei nâk nâk khom nuaisia ngai Jerusalem khopui chu a chung ân khôk e!

²PUMAPA rôl ringai mak a; rilna khom ipom mak e. PUMAPA khah iam mak a, a Pathian khom nâi nuam mak.

³A sunga ruaituhei khah sakeibaknei irâm angkah an nit a, roirêltuhei khah inia inruak angkah an nit; atûka rang îte zua ngai mak e.

⁴Zânthlahei khah mi chanlamboi, mi lêmsia an nit a; thiampuhei khomin mun rithiang khah an innim a, Pathian dân khah an nuam lam lamin an inkôi ngai.

⁵Nikhomseh, a sunga om mai PUMAPA kha chu a fel a, thil thonsual ngai mak e. Zîng tin kôlrisamah khan inkhêl loiin roirêl dikna ân lang a. Khanniseh, mi sualhei khan chu izakna châng reh mak e.

⁶PUMAPA khan, “Namhei khah ken rimang vang a, an kulpuihei ke sim a, an kotsuahei khah tute an thleng rilôi khâi nona rangin ken ram a, an khopuihei khah ke siat tâk a; khasikah khan tute om khâi mak a, luatu zel om khâi mak e.

⁷‘Nangman ne marit inla, rilna hih ipom inla; khanchu, ni chungchânga ki înkung murdihei angkah khan ni omna khah inram ni no nih,’ ki ti a; nikhomseh, ṭhano sin mai an inuam ual a nit,” a ti a.

⁸PUMAPA khan, “Namhei isualsân ranga ki thoi nî khah ngâk ṭian rei. Ki thiltum chu namhei, rêng ramhei ikoi bûm a, an chunga ki ningthikna inrît tak iṭhum rang hi a nit. Rinêng pumpui hi ki ningthikna meiin la kâng infâi riai a ti.

⁹“Kha tikin chu mipuihei kha siam indanglam ki ta, keima riming bang khah an rêngkan rilam an ta, lunginrual takkan sin tho tâng an ti.

¹⁰Ethiopia vadung râl tianga rithokin ki mi indarhei khan thillan ki ziangah hong chôi an ti.

¹¹Kha tikin chu ki chunga nin siatna sinhei sikah khan mâimôkin om khâi no tin u. Nin sung ata lârripâkhei neh risonghei khah khâi inrimang ki ta, ke tlâng rithiangah hin ripâk neh risong takkan om tlak khâi no tin u.

¹²Nin lâi ata mi tlômhei neh ringai ichînhei khah inzôk ki ta. PUMAPA riming kha an zôkna ni tâng an ti.

¹³Israel mi la om isunhei khan siatna sin no nia, milak ril no nih. An bâiah khom lêmna ṭong om khâi no nia, vângisak neh inṭum takkan lêng an ta, tute ṭi khâi no nih,” a ti a.

¹⁴O, Zion nainu, râifânin zâi roh; O Israel, iring takkan ikhêk roh; O, Jerusalem nainu, ni lungril murdin râifân takkan lôm roh.

¹⁵PUMAPA khan ni chunga a kuttumhei khah a lâk inrikiang tâk a, Ne râlhei ân rimang zoi tâk. Israel rêng inthang, PUMAPA kha ni ziangah a om e, Thil ṭhano zel ṭi khâi no tin e.

¹⁶Kha nî-ah khan chu Jerusalem ziangah, “Ṭi no roh, O Zion khopui, Ni kut khom inrizal no roh,” tîng an ti.

¹⁷PUMAPA ni Pathian, nêtu ritha lian khah ni ziangah a om e, Ni chungah a lôm tak tak a, a lungthlungna khan ni ringnun inthar a ti, La sakin ni chungah lôm a ta,

¹⁸Ruaiṭhe zoroa lôm dôran lôm a ti. PUMAPA khan, “Inkhôkna inrît khah inboi ki ta, Ni mualphoina khah khâi pai ki ti.

¹⁹Ringai ṭian roh, khatikin chu an nuam nang ilo murdihei khah kuttum thông ki ta, Kebâihei khom inzôk ki ta, Ûmisua omhei khah ṭhui bûm ki ti. Khanchu, rinêng chunga an mualinphoina kha, Roinpuina neh riming inthangna inchang pêk ki ti.

²⁰Kha tikin chu nangni ṭhui inlûtin, nangni ṭhui bûm ki ta, Rammual pumpuiah roinpui takkan nangni siam ki ta, Vângisak takkan nangni siam nôk ki ti,” PUMAPA khan a ti.