Read Biete HAGAIA 1 Bible Online

HAGAIA 1 - Biete bible

HAGAIA 1

¹Rêng Daria inlal kum inikna, a thla rukna, kha thla sûn masa takah khan, PUMAPA thu khah zânthla Hagaia mangin Sealtiela naipa Judai ram optu Zerubabela ziangah neh Jehozadaka naipa thiampu laltak Josua ziangah a zuang tlung a.

²Tinrêngthothei PUMAPA khan Hagaia ziangah, “Hi mihei hin, PUMAPA in sin zoro rang khah la hong tlung mak an ti,” a ti a.

³Khante, zânthla Hagaia ziangah a mihei rang PUMAPA thu a zuang tlung a.

⁴“Ki mihei, ki in ichim rem rumka a om lâiin, nangmanin in ihoi tak takah nin iom hi a îdik mani?

⁵Nin lampui khah sût nôk rei.

⁶Itam takkah nin tu a, iroichekah bang nin ât a, nin fâk a, nin dîp sip ual mak a, nin in a, khop mak chei a; silbomin nin rituam a, nangni lum pêk ual mak; rilofa lo khah choli pepa thun angkah a nit.

⁷Îtho sik im khahei khah nin chungah ai tlung, nin om dân hi iṭha takkan sût nôk rei.

⁸Itlângheiah hang fe unla, thing hang lah unla, Tempil khah sin rei; khanchu, lôm ki ta, chôiinrisânga ki om rang dân takkan chôiinrisângin om ki ti.

⁹“Imuh ok nin tûng a, ringai ta u, iroichekah bang a hong nit a; insungah nin hong îthlun khom ki lei sêm invuang pai a, îtho sik im ai nit? iti hi Tinrêngthothei PUMAPA thu suak a nit. Nangmanin mahni in isinin nin buai a, ki in chu â ramin a om a, nin uksak no sika a nit.

¹⁰Khasikah khan rivânin rido ṭul rang nangni rên pêk a ta, rinêng khan â râ nangni a îrên pêk rang a nit.

¹¹Ram pumpuiah khua inkang ki ta, itlânghei, bûhei, grephei, olivhei neh rinênga rithoka thil hong iṭoi suak murdihei, miriamhei neh mîringhei, ramhei neh nin kuta chimu nin itho murdihei khah ki închâr rang a nit,” a ti a.

¹²Khanchu, Sealtiela naipa Zerubabela neh Jehozadaka naipa thiampu laltak Josua neh mi la om murdihei khan PUMAPA an Pathian thu, zânthla Hagaia thuhei khah an zôm tâk a. Ani khah PUMAPA an Pathian itir a nit a; khanchu, mihei khan PUMAPA khah an ṭi tâk a.

¹³Khanchu, mihei ziangah PUMAPA thucha kha zânthla Hagaia khan â sîr a, “Nin ziangah kî om mai a nit, iti hi PUMAPA thu suak a nit,” a ti a.

¹⁴Khante, PUMAPA khan Sealtiela naipa Judai ram optu Zerubabela lungril neh Jehozadaka naipa thiampu laltak Josua lungril neh mi la om isun murdihei lungril khah â thoi inhar tâk a.

¹⁵Khanchu, Rêng Daria inlal kum inikna, a thla rukna, kha thla sûn sôminika sûn linî-ah khan Tinrêngthothei PUMAPA an Pathian in isin an phut tâk a.