Read Biete HAGAIA 2 Bible Online

HAGAIA 2 - Biete bible

HAGAIA 2

¹Thla sarina, kha thla sûn sôminika sûn khatnî-ah khan zânthla Hagaia ziangah PUMAPA thu a zuang tlung a.

²Sealtiela naipa, Judai ram optu Zerubabela ziangah neh Jehozadaka naipa thiampu laltak Josua ziangah neh mi la om isunhei ziangah khan hingka hin isîr roh,

³“Hi in hih matona a roinpui lâi imu phâk nin lâiah an la om im? Atûnah hin im a ang nin ti? Nin mitmuah chanlamboi angkah ai nit mani?

⁴‘O Jerubabel, atûn chu ihâi takkan om roh; O thiampu laltak Josua, Jehozadaka naipa, nang khom irât takkan om roh; nangni, hi rama mi murdihei irât takkan om rei,’ iti hi PUMAPA thu suak a nit. ‘Sin rei, nin ziangah kî om mai a nit,’ iti hi PUMAPA thu suak a nit.

⁵Aigupta rama rithoka nin hong suak lâia, nin ziangah om mai ki ti itia ṭong nangni ki înkung angkah khan nin ziangah kî om mai a nit, ṭi no rei,” a ti a.

⁶Tinrêngthothei, PUMAPA khan hingka hin a ti, “Sôt inoteah rinêng neh rivân hei, tuikhanglian neh mualtlâng hei lân nîng ki ti.

⁷Nam tinrêng lân nîng ki ta, an richonhei khah hin hong buk an ta; khanchu, hi Tempil hih roinpuinan sip a ti.

⁸Rammuala tangkarua neh rângkachak murdi hih ki ta a nit.

⁹Tempil ilui nêkah khan â thar chu roinpui ual a ti; khanchu, hi munah hin ki mihei ziangah ringeina neh vângsakna ithlun ki ti,” iti hi Tinrêngthothei PUMAPA thu suak a nit.

¹⁰Daria inlal kum inikna, thla kuakna, a sûn sôminika sûn linî-ah khan zânthla Hagaia ziangah PUMAPA thu hingka hin a zuang tlung a.

¹¹Tinrêngthothei PUMAPA khan hingka hin a ti, “Hi chungchângah hin dânin ingkam a ti thiampuhei ridon roh.

¹²Tukhôkin manih a zakorfual môrah sa rithiang ilan tâk khah ifûn sela, kha sa fûn khan ibai manih, sa suang imin tâk manih, uain manih, riak manih, ifarua rêng rêng manih lei tôn ta sela, a înrithiang sa rang mani?” itin. Hi ṭong ridon hih thiampuhei ardon a, anni khan “Inrithiang no nih,” itin an sâm a.

¹³Hagaia khan, “Khateh mithi ruak a tôn sikin mi a înim ngai a nit a, hi thil ifarua a îkhôk khom hih tôn ta sela, ifarua khah a înim rang mani?” a ti a. Thiampuhei khan, “O inim a ti,” itin an sâm a.

¹⁴Khanchu, Hagaia khan, hingka hin a sâm tâk a, “Hi mihei neh hi namhei hih khangkah chia khah an nit a, iti hi PUMAPA thu suak a nit; an kut suak tinrêng khom khangkah kha a nit a, an thil lan khom khah a înim a nit,” a ti a.

¹⁵PUMAPA khan, “Tempil isin nin phut ma neh sûn nungtianga nin chunga thil itlunghei khah vuaninta rithokin iṭha takkan ngaitua rei.

¹⁶Kha lâiah khan chu bu puak sôminikah invâng ranga a tûngnaah khan puak sômkah bang ân vâng a; uain ûm sômringakah inei a tûngnaah ûm sôminikah bang ai nei ngai a nit.

¹⁷Nin sintho murdihei iseh rangin phâivosimpuihei, ringehei, neh irialhei nangni ki tir pêk a; nikhomsela, ki tiang hong ngat ual mak chei u.

¹⁸Hi thla kuakna, sûn sôminikah sûn linî, vuansûna Tempil lungphûm nin phûm zoi nî-a rithokah hin iṭha takkan ngaitua nôk rei.

¹⁹Bu khah fasiarah om viat khâi no khom seh, grep ruihei, theipuihei, theisenhei neh olivhei kha irâ no khom seh; vuansûna rithokah hin ṭhat nangni kî vur rang a nit,” a ti a.

²⁰PUMAPA thu khah, kha thla sûn sôminika sûn linî ngirah khan Hagaia ziangah a zuang tlung nôk a.

²¹Hingka hin Judai ram optu Zerubabela ziangah khan isîr roh, “Keiman rinêng neh rivân ki înnîng rang a nit.

²²Rêng ramhei pai iṭhul ki ta, an thuneina inmong ki ti; an sakortâli neh a chunga chuanghei khah inlîr ki ta; sakorhei neh a chunga chuanghei khah khandaiin rithat risak an ti.

²³Kha nî sûnah khan chu, O, Zerubabel ke som, nang ituh ngit ki ta, ker ming namna kutsabit rangin nang siam ki ti. Nangmah hi nang ki irthlang tâk a nit,” Tinrêngthothei PUMAPA thu suak khan a ti.