Read Biete ZAKARIA 10 Bible Online

ZAKARIA 10 - Biete bible

ZAKARIA 10

¹Ṭoirua zoroah hin PUMAPA ziangah rua ngên rei, PUMAPA ngêi chu a nit, rua pom ngit sûm itir a, loia chimu tinrênghei ranga ruasângsari insûr ngai chu a nit.

²Mihei khan mirmilhei neh thlasân ithiamhei an pan a; nikhomsela, sâmna an idong chu chanlamboi neh milak ringot a nit. Rimang phantuhei khom khan milak rimang an phan a, an thlangam ṭong khom â tlong a nit. Khasikin, mihei chu bera rimang angkan an ivâi rimang a, enkoltu a om no sikin dengthei an ituang a nit.

³PUMAPA khan, “Ram dang mihei, a bîkin ki mihei chunga inlalhei chungah khan ki ning a thik tak tak a, anni chu deng ki înthei rang a nit. Juda mihei chu keima ta an nit a; keimah, Tinrêngthothei PUMAPA ngêiin anni chu enkol tâng ki ta, ridoinaa sakor iṭha tak angkan kî siam rang a nit.

⁴Anmani lâi ngêia rithokin roirêltuhei, ruaituhei neh râlpahei chu ki mihei iruai rangin an la hong isuak rang a nit.

⁵Juda mihei chu mirât tak hong ni tâng an ta, kotsuaa nimnok kârah an irâlhei chîlpoltu sipaihei angkah hong ni tâng an ti. PUMAPA chu an ziangah a om sikin natinsat takkan doi an ta, sakor chungchuang mihei khom inê vang an ti.

⁶Juda mihei chu irât takkan siam ki ta, Israel mihei chu inzôk ki ti. An chungah lungkhamna inlang ki ta, ṭhui kîr nôk ki ti. Anni chu kî heng tlak ngai ino angkan hong ni tâng an ta, Keimah PUMAPA chu an Pathian ki nit a; an ṭongṭaina chu sâm ki ti.

⁷Efraim mihei chu mihâi lôm angkan hong rât tâng an ta, Uain iin ngai mihei angkan an lungril lôm a ti. A nit, an naihei khan an rât tlia reh mai an ta, A sintho sikah khan PUMAPA a khan an lungril lôm an ti.

⁸Silrisîtin ki mihei chu koi ki ta; bûm khôm ki ti; Anni chu ritlan suak ki ta; Matona angkah takin hong inpung puang nôk ki ti.

⁹Ram dang dangah ke chekindar tâk khom a, Ram ilah taka rithok khomin ne reh mai an ti. Anni neh an naihei chu ringdamin om an ta, An munah la hong kîr nôk an ti.

¹⁰Aigupta ram neh Asuria rama rithokin hong ṭhui kîr nôk ki ta; Anmani ram ngêiah khan in-om ki ti. Gilead ram neh Lebanon khomah khan ṭhui inlût ki ta; Ram pumpui chu hong sip an ti.

¹¹An dengtheina tuipui an rikan tikin, Keimah, PUMAPA hin tuirifônhei chu itông ki ta, Nail lipui inthûkhei khom khah kang a ti. Nam ripâk Asuria chu intlôm nîng a ta, Aigupta ram rêng thuneina khom boi a ti.

¹²Ki mihei chu irât takkan siam ki ta, Anni khan chubai nê ûnin, ki thu zôm an ti,” PUMAPA khan a ti.