Read Biete ZAKARIA 11 Bible Online

ZAKARIA 11 - Biete bible

ZAKARIA 11

¹O Lebanon, ni kotpuihei iong roh, Ni sidar thinghei khah meiin ai kâng rimang rang a nit.

²O, nangmah fâr thingilian, ṭap inla, irung vong vong roh, Sidar thinghei khah â lîr tâk a; Thing ilianpa pahei khom an ilîr zoi tâk. Basan sasothinghei o, ṭap unla, irung vong vong rei, Rampuihei khah ai ṭiam zoi tâk a nit.

³Berapuhei chu ngaisiatin an irung e; An roinpuinahei a siat zoi tâka na! Sakeibaknei irung rihu ringai ta u; An omna ngai Jordan rampui khom inram chit a nit tâk na!

⁴PUMAPA ki Pathian khan hingka hin a ti, “Bera lôm ithat ranga an ivâihei enkoltu ni roh.

⁵Â neituhei khan anni chu an that a, thiamno riti ual mak. A sahei khah an zuar a, ‘PUMAPA chu inpâkin om riseh; ei hong richong tâk,’ an ti a. Enkoltuhei lak khomin anni khah lunginkham ngai mak a,” a ti a.

⁶PUMAPA khan, “Hi ram iluatuhei tute lunginkham khâi no ning e. Mi tinrêng an chunga rênghei kutah pêng ki ta, anni khan ram khah phûlpônin siam an ta, an kuta rithokah khan anni chu sanisua no ning e,” a ti a.

⁷Bera zuartuhei khan an ne mang a, khanchu, Bera lôm ithat ranga an ivâihei enkoltu ki hong nit tâk a. Khante, irol inikah ki lâk a, khatkah kha, “Ditsakna” ki be a, a dang kha, “Inpumna” ki be a; kha angkan bera lôm chu ki enkol tâk a.

⁸Thla khatka sungin berapu ithumkahei, keima ne neltuhei chungah ke lung diar khâi manga, anni chu ken rimang a.

⁹Khanungchu, bera lômhei ziangah khan, “Nangni enkoltu ni khâi no ning e, â thi rang chu thi sela, armang rang chu rimang riseh, a la dam isunhei khom an khâtin rithat risak riseh,” ki ti a.

¹⁰Khanchu, nam tin tin ranga PUMAPAN Thuthlung ai siam khah isût a nit tâk iti entîrnan ke rol “Ditsakna” khah ki lâk a, bong inikan ki khiak tâk a.

¹¹Khangkan, kha nî-ah khan Thuthlung chu isût a nit tâk a. Khante, bera zuartuhei khan an ne en ṭian a, ki thil tho mangin PUMAPA ai ṭong a nit iti an riat tâk a.

¹²An ziangah khan, “Ṭha nin tin chu, ki lo chu ne peh unla, nin ti non chu ne peh no rei,” ki ti a. Khangkan, ki lo khah tangka sômithumkah an ne pêk tâk a.

¹³PUMAPA khan ki ziangah, “Biak in sumbôma khan seh roh,” a ti a. Khante ki man ranga inrupa an isût, tangka sômithumkah kha ki lâk a, biak in sumbômah khan ki sia tâk a.

¹⁴Khanungchu, ke rol dang khatkah “Inpumna” khah ki lâk a, bong inikan ki khiak nôk a; khante, Juda neh Israelhei inpumna khah a chat tâk a.

¹⁵PUMAPA khan ki ziangah, “Berapu mangmunboi riamrei khah lah nôk roh.

¹⁶Ki bera lômhei enkoltu rang ken ding a; nikhomsela, ani khan inrimanga om ranghei khah san mak a, chekindara omhei khah zong ual mak a, sâbe tuanghei khah indam mak a, a la damhei khom ifâ ual mak. Kha nêkan chu â thâi thâihei sa khah a fâk a, an ketinhei idênin a khêng nôi chit ngai.

¹⁷Berapu mangmunboi, bera lôm imaraktu chung chu ân khôk vang na! Khandai chu â bânah neh a mit changtiangah khan ṭum a ti. Â bân khah rizal a ta, a mit changtiang chu zîng khap a ti,” a ti a.