Read Biete ZAKARIA 12 Bible Online

ZAKARIA 12 - Biete bible

ZAKARIA 12

¹Israel chungchânga PUMAPA thu, PUMAPA rivân iphartu, leilung ringatna phûmtu, miriam sunga rithla siamtu ngêi thu suak chu amahih a nit.

²Ani khan, “Ringai roh Jerusalem chu inruina kilâtin siam ki ta; a kôlvêla namhei khan in an ta, zûnrui angkan om an ti. Jerusalem an hual tenan chu Juda khopuihei khom ihual san om a ti.

³Nikhomsela, kha nî-ah khan chu hingka hi hong ni tâng a ta, Jerusalem chu mi tin tinhei rangin lungtum irik takin siam ki ta, tukhom idom itum kangân chu natinsat takkan ripal an ti. Khante, rinênga nam tin tinhei chu ama doi rangin ribûm an ti.

⁴Kha zoro tenan chu an sakorhei murdi khah ṭhông ki ta, a chunga chuanghei chu invêtin om an ti. Juda mihei chu vênginzôk mai ki ta; khannisela, an irâlhei sakor rêk chu an mit indel pêk ki ti.

⁵Khanchu, Juda namhei khan, ‘Tinrêngthothei Pumapa PATHIAN khan Jerusalema om, a mihei ziangah khan râtna ai pêk a nit,’ iti an lungrilin tîng an ti.

⁶“Kha tikin chu Juda namhei chu ngaidi bila mei angkan neh fathlu lâia meichok angkan siam ki ti. Anni khan an kôlvêla nam tinhei chu inrimang an ta, Jerusalem mihei chu an khopui ngêiah khan izôkriamkan om mai an ti.

⁷“Davida insunghei roinpuina neh Jerusalem luatuhei roinpuina khan Judai ram roinpuina ikhûma a om nona rangin PUMAPA khan Juda râlpahei kha nêna peh masa tak a ti.

⁸Kha tikin chu PUMAPA khan Jerusalem luatuhei chu vênginzôk a ta, kha nî-ah khan chu an lâia mi rât ino takhei khom Davida dôra rât hong ni tâng an ti.

⁹Kha tikin chu Jerusalem doitu namhei kangân chu keiman inrimang tâng ki ti.

¹⁰“Davida insunghei neh Jerusalem luatuhei chu lungkhamna rithla neh ṭongṭaina rithla vur ki ti. Khante, an isun that tâkah khah en an ta; khanchu, mîn a nai neisun ai sûn angkan sûn an ta, mîn a nai lutîr ichân ai ṭâ ngai angkan ṭâ tâng an ti.

¹¹Kha tikin chu Jerusalemah sûnna natinsat om a ta, Megido phâia Hadad Rimon muna ṭap irî angkah khan natinsat a ti.

¹²Ram khan sûn a ta; insungkua tinin a ran sengin sûn an ti; Davida richi insungkua khom a ranin, an nupuihei a ranin; Nathana richi insungkua a ranin, an nupuihei a ranin; Levia richi insungkua a ranin, an nupuihei a ranin; Simeia richi insungkua a ranin, an nupuihei a ranin; insungkua murdi dang khom, insungkua tinrêngin a ranin; pasalhei khom a ranin, nupuihei khom a ranin, a ran korongin an isûn rang a nit.