Read Biete ZAKARIA 13 Bible Online

ZAKARIA 13 - Biete bible

ZAKARIA 13

¹“Kha nî-ah khan chu Davida insungkuahei neh Jerusalem luatuhei sualna neh porinchena infâina rangin tuikuang iong pêk nîng a ti.

²Kha tikin chu ram sunga rithokin mirmil riminghei chu inboi vang ki ta, anni chu tutên reh mai khâi no nih. Zânthla ritihei neh rithla nimhei chu ûm isua vang ki ti.

³Tukhomin zânthla angkana thu a lan puang maiin chu ân zirna a nu neh pa ngêi khan a ziangah, ‘Pathian rimingin milak ni ril sikin ring no tin e,’ la tîng an ti. Khangkan ân zirna a nu neh a pa hei ngêi khan, thu ân puang lâi ngêiah khan ani chu sun that an ti.

⁴Kha zoro khah a hong tlung tenan chu kha zânthlahei khan an inlârna muhei khah izakpui tâng an ta, mi lêmna rangin zânthla samul zakua rifual khah ihâk khâi no nih.

⁵Kha nêkan chu, ‘Zânthla ni mang a, loi sin mi kêng kî nit, ki naipangte lâia rithoka loi sin itho ngai ki nit,’ ti ual tâng an ti.

⁶Khanchu, mi tu manin a ziangah, ‘Ne ṭânga sâbehei hih im ai nit?’ tîng an ta; khante, ‘Ani khan ki malhei ina ki îphop a nit hih,’ itin sâm a ti,” a ti a.

⁷Tinrêngthothei PUMAPA khan, “O khandai, har inla, ki ta ranga sin itho ngai berapu khah tôn roh. That inla, bera lômhei chu indar chit riseh. Â chînhei chungah khan keiman ki kut tlâk ki ti.

⁸Ram pumpuia mi murdi bâk ithumka ṭhena bâk inikah chu thîng an ta, bâk khatkah chu izua nîng a ti.

⁹A bâk ithumna izuaa la omhei chu meiin fiang ki ta, tangkarua inrithiang angkan anni chu inrithiang ki ti. Rângkachak rithît infâia ai om ngai angkan anni chu rithît infâi ki ta; khanchu, ker ming rilam an ta, anmani chu sâm ki ti. Anni chu ki mihei an nit, tîng ki ta, anmanin PUMAPA chu kin Pathian a nit, tîng an ti,” a ti a.