Read Biete ZAKARIA 2 Bible Online

ZAKARIA 2 - Biete bible

ZAKARIA 2

¹Khante, â tharin inlârnaah mi khatkah a kuta rikhîna rui ichôi ki mu a.

²Khanchu, keiman, “Taktiang im ni fe rang?” ki ti a. Ani khan ki ziangah, “Jerusalem hih a dung neh a khang nit dôr ki irkhî rang a nit,” a ti a.

³Khanchu, vântirtôn ne sôntu khah a fe tâk a, vântirtôn dang ama tong rangin a lei zuang a,

⁴a ziangah, “Itlân inla, hi tlangvâl ziangah hin, mipui tam tâk sik neh mîring lôm tam tâk sikin Jerusalem khopui chu dâipuia rikul zoi thei ni khâi no nih.

⁵PUMAPA khan, keimah PUMAPA hi a vêlkan mei kulbang nîng ki ta, a sungah khan keimah ngêi hih roinpuia in-om rangtu chu ki nit, a ti,” a ti a.

⁶PUMAPA khan a mihei ziangah khan, “Kil tin, ram tinah nangni ke thekindar tâk a. Nikhomsela, atûnah hin nangni suaka tânghei Babilon ram ata hong itlân suak unla, Jerusalemah hong kîr nôk rei.

⁸Tukhom kuttum nangni tho kangân chu ki mitlâilên ai tôn a nit,” a ti a. Khasikin, PUMAPA Tinrêngthothei khan nangmani nangni sehtu namhei kangân chu a îsiat rang a nit iti thucha iril rangin a roinpuina neh a ne itir a nit.

⁹“PUMAPA ngêi khan nangni doi tâng a ta, nin suak lei ichang tâk mihei ngêi khan nangni iseh tâng an ti.” Khanchu, PUMAPA Tinrêngthothei khan a ne itir a nit iti nin iriat rang tâk a nit.

¹⁰PUMAPA khan, “O, Zion naihei, râifânin zâi rei. Nin zianga om rang tâkin ki zuang tâk e,” a ti a.

¹¹Kha tikin chu nam itam takkah PUMAPA ziangah hong an ta, a mihei ni tâng an ti. Khante, ani chu nin ziangah om tâng a ta; khanchu, PUMAPA Tinrêngthothei khan nin ziangah a ne itir a nit iti reh tâng nin ti.

¹²Judai ram chu PUMAPA dongtum, Ram Rithiang bîk ni nôk tâng a ta, Jerusalem khom a khopui lungthlung tak rangin rithlang nôk a ti.

¹³Mi tin tinhei, PUMAPA maah khan inthim val rei; ani chu a mun rithiang ata a zuang ithoi tâk a nit.