Read Biete ZAKARIA 3 Bible Online

ZAKARIA 3 - Biete bible

ZAKARIA 3

¹PUMAPA vântirtôn makunga ding Thiampu Laltak Josua neh ama doitu rang Soitana, â changtianga ding kha a nen mu a.

²PUMAPA vântirtôn khan Soitana ziangah khan, “Nangmah, Soitan, PUMAPA khan nang ngo riseh. A nit, PUMAPA Jerusalem rithlangtu khan thiamno nang inchang riseh. Hi mi hih mei ata thingthu khai pai angkah a nit,” a ti a.

³Khanchu, Josua chu silbom inṭop taka rivon vântirtôn makungah khan a hong iding a.

⁴Vântirtôn khan a matona dinghei ziangah khan, “A silbom inṭop takhei khah khek pêk rei,” a ti a. Khanungchu, ani khan Josua ziangah, “Ni sualna chu nangmaa rithokin ki lâk inrimang tâk, silbom ilu takin nang ki înritluk rang tâk a nit,” a ti a.

⁵Keiman, “Lukhum rithiang tak inkhum riseh,” ki hang ti a. Khanchu, lukhum rithiang tak kha an inkhum tâk a, silbom itharin an inrivo a, PUMAPA vântirtôn chu a kôlah a ngîr ṭian a.

⁶Khanungchu, PUMAPA vântirtôn khan Josua ziangah khan,

⁷PUMAPA Tinrêngthothei khan hingka hin a ti, “Ki lampuihei ni zui mai a, isin ranga nang kî pêk ni sin maiin chu ki Mun Rithiang enkoltu neh ki roirêl munhei vongtu ni mai ni ta, hintaka ngîrhei lâiah hin ṭang sa theina rang nang pêng ki ti.

⁸Atûnah hin ringai roh, O Josua, Thiampu Laltak, ni thiampu champuihei khomin ringai riseh, nangmani khah sûn matona thil iṭha la hong itlung rang risin chu nin nit; ringai ta u, ki suak, Zaifuanah chu ki zuang itir rang a nit.

⁹Ringai ta u, Josua maah khan lung khatkah kil sarika nei ki sia a, amakhan thil riziak ki ta, hi ram sualna chu sûnka sungin khâi inrimang riai ki ti.

¹⁰Kha nî-ah khan chu mi tinin an bungtualbômhei chu grep rui thuaiah neh theichâng kung thuaia ṭhung rangin koi tâng nin ti,” iti hih Tinrêngthothei PUMAPA thu suak a nit.