Read Biete ZAKARIA 4 Bible Online

ZAKARIA 4 - Biete bible

ZAKARIA 4

¹Vântirtôn ne sôntu khah a zuang nôk a, mi â in thlar inhar angkan a ne zuang inhar a.

²Ki ziangah khan, “Im ni mu?” a ti a. Keiman, “Rângkachaka siam meiser siana, ṭhuam sarika nei, a môr ikipa siriak siana berbute mûr inei chit ki mu a.

³A kôlah oliv kung inikah meiser siana voitiang khatkah, changtiang khatkah iom ki mu,” ki ti a.

⁴Khanungchu, vântirtôn ne sôntu ziangah khan, “Epu, hihei hih im an init,” ki ti a.

⁵Ani khan, “Hihei hih im an init nî riat ino na?” a ti a. Keiman, “O, reh mang e, Epu,” ki ti a.

⁶Ani khan ki ziangah, amahih Zerubabela zianga PUMAPA thu chu a nit: “Ni râtna ni loiin, ni sinthotheina khom ni loiin, keima Rithlan keng nêna nî chang rang a nit.

⁷Tlâng ilianpa angkana nang idantu murdi rimang vang a ta, Tempil chu siaminding nôk ni ta, ni sin zoia, a lung nungkhôn tak a munah ni sia tenan chu, ‘A ṭhat vang e, a ṭhat vang e!’ itin mipuihei chu ikhêk suak an ti,” a ti a.

⁸PUMAPA thu chu ki ziangah a zuang tlung nôk a.

⁹Ani khan, “Zerubabelan Tempil lungphûm a phûm a, a kutin hi in hih a sin zoi tenan chu ki mihei khan keimah, PUMAPA ngêiin an ziangah nang kî tir a nit iti reh tâng an ti.

¹⁰Sin ma a fôn rak no sikin an bei an indong a; nikhomsela, Zerubabela khan Tempil khah a sin thiai mai iti la mûng an ta, râifân takkan lôm tâng an ti,” a ti a. Vântirtôn khan ki ziangah, “Meiser sarikahei khah rammual pumpui kiltin imuh vang ngai PUMAPA mit sarikahei chu an nit,” a ti a.

¹¹Khanungchu, keiman a ziangah, “Khate, hi oliv thing inikah, meiser siana changtiang neh voitianga hei hiteh im an init?

¹²Khapenah oliv riak thunna rângkachak mûr inikahei ridîna oliv iṭang inikahei hih im a omzia ai nit,” ki ti a.

¹³Ani khan a ne sâm a, “Hihei hih im an init ni riat ino na?” a ti a. Keiman, “O, reh mang e, Epu” ki ti a.

¹⁴Khanchu, ani khan, “Hihei hih mi pasal inikah Pathianin a irthlanga, rammual pumpui PUMAPA sin itho ranga riak a înrithuhei chu an nit,” a ti a.