Read Biete ZAKARIA 5 Bible Online

ZAKARIA 5 - Biete bible

ZAKARIA 5

¹Ki mit ki hang inlêng nôk a, lekhazuat vânlâizôla vuang ki mu a, ki en ṭian a.

²Khante, vântirtôn khan ki ziangah, “Im ni mu?” a ti a. Keiman ki sâm a, “Vânlâizôla lekhazuat ivuang duai duai ki mu, a dung chu mûk sôminika sei a nit a, a khang chu mûk sômka lian a nit,” ki ti a.

³Khanungchu, ani khan ki ziangah, “Amakhah ram pumpuia tlung rang vânisâm riziakna chu a nit. Phêk kiangtiangah khan tukhom inru kangân chu inrimang nîng a ti, iti riziak a nit a, phêk kiangka tiangah khan tukhom dikino taka ṭongrikhâm kangân chu inrimang nîng a ti, iti riziak a nit.

⁴Hi vânisâmna hih tir ki ta, inruhei inah neh ker ming ichinga dikino taka ṭongrikhâmtuhei inah khan inlût ki ta, an insungah khan om mai a ta, kha in mangrua thinghei neh lunghei khah inrimang vang a ti, iti hih PUMAPA Tinrêngthothei thu suak a nit,” a ti a.

⁵Vântirtôn ne sôntu khah a zuang nôk a, ki ziangah, “Ni mit hang inlêng ta,” a ti a.

⁶Keiman, “Im ai nit?” ki ti a. Ani khan, “Ama khi bôm a nit a, ram pumpui isualzia inlangna chu a nit,” a ti a.

⁷Bôm sîngna khah hôtphêk a nit a, amakhah iong a nit a, bôm sungah khan nupang khatkah a lei iṭhung a.

⁸Vântirtôn khan, “Amahih ‘Siati’ chu a nit,” a ti a. Khanungchu, bôm sungah khan a nam lût nôk a, hôtphêkah khan bôm khah a sîng nôk a.

⁹Ki mit ki hang inlênga, ki hang en a, nupang inikah zuang ilang ki mu a, an rithlaah khan an zuang vuang a; anni khan vakôl rithlahei angkana rithla hi an inei a nit. Bôm khah an tûla rinêng neh rivân kârah khan an vuangpui tâk a.

¹⁰Vântirtôn ne sôntu ziangah khan, “Hihei hin bôm khah taktiang im an fepui rang?” ki ti a.

¹¹Ani khan ki ziangah, “Babilon ramah, a in an sin pêkna rang munah khan, an sin pêk zoi tenan chu kha munah khan amah chubai iûn rangin siang an ti,” a ti a.