Read Biete ZAKARIA 6 Bible Online

ZAKARIA 6 - Biete bible

ZAKARIA 6

¹Ki mit ki hang inlêng nôk a, tlâng inika kârah sakortâli ilikah zuang isuak ki mu a, ki en ṭian a; kha tlânghei khah sumsen tlâng an nit a.

²Tâli â khatna khah sakor senhein an kâi a; Tâli â nikna khah sakor vomhein an kâi a;

³Tâli â thumna khah sakor ngoihein an kâi a; Tâli â lina khah sakor rânghein an kâi a.

⁴Vântirtôn ne sôntu khah ker don a, a ziangah, “Epu, hihei hih im an init?” ki ti a.

⁵Vântirtôn khan a ne sâm a, ki ziangah, “Hihei hih vân ithli ilikah, rammual pumpui PUMAPA makunga rithoka zuang isuakhei chu an nit,” a ti a.

⁶Sakor senhei ikâi tâli khah khosak tianga fe rang an nit a, sakor vomhei ikâi tâli khah mâr ram Babilon tianga fe rang an nit a, sakor ngoihei ikâi khah tlâk tianga fe rang, â rânghei ikâi khah sim ram tianga fe rang an nit.

⁷An hong iding suak a, rammual pumpui en indik an ngâkmo tak tak a. Khanchu, vântirtôn khan, “Fe ta unla; rammual pumpui om dân va en indik rei,” a ti a. Kha angkah khan rammual pumpui an rifang vêl tâk a.

⁸Khanungchu, vântirtôn khah ki ziangah a hong ikhêk a, “Ringai roh, mâr ram Babilon tianga fehei khan mâr tiang ram chungchânga PUMAPA ningthikna chu an îṭhuai tâk a nit,” a ti a.

⁹PUMAPA thu chu ki ziangah a zuang tlung a:

¹⁰Ani khan, “Suaka tânghei thilpêk, Heldaia hei, Tobija hei, Jedaia hei hong ichôi khah lan la, Zefania naipa Josia inah khan fepui zel roh. Kha mihei khah suaka an itângna Babilona rithoka hong ikîr nôk tâk an nit.

¹¹Anniheia rithoka thilpêk tangkarua neh rângkachak khah lan la, rênglukhumin siam inla, Jehozadaka naipa Josua, thiampu laltak khah inkhum roh.

¹²A ziangah khan PUMAPA Tinrêngthothei khan hingka hin ai ti a nit: Ringai roh, mi arming Zaifuana an iti khah a om mun ata hong chor suak a ta, PUMAPA Tempil khah sin a ti.

¹³PUMAPA Tempil khah amah ngêiin a hong isin rang a nit. Rêng roinpuinaah khan rithluk a ta, rêngṭhungmuna ṭhungin a mihei roi rêl a ti. A rêngṭhungmun kôlah khan thiampu om a ta, an ruaika kârah ringei takka ririatthiamna om pumin sin thông an ti.

¹⁴Rênglukhum chu Heldaia hei, Tobija hei, Jedaia hei, Josia hei riatmaina rangin PUMAPA Tempilah om a ti, itin ril roh,” a ti a.

¹⁵PUMAPA Tempil isin rangin ram ilah taka omhei khah hong sâng an ti. Kha tenan chu PUMAPA Tinrêngthothei khan nin ziangah a ne itir a nit iti reh tâng nin ti. PUMAPA nin Pathian thu khah iṭha takkan nin zômin chu hi thil hih a zuang itlung ngêt rang a nit.