Read Biete ZAKARIA 7 Bible Online

ZAKARIA 7 - Biete bible

ZAKARIA 7

¹Rêng Daria inlal kum ilina, thla kuakna (Kislev thla) a sûn linî takah khan PUMAPA thu chu ki ziangah a zuang tlung a.

²Kha lâiah khan Bethel mihei khan Sarezera neh Regemeleka neh an mihei kha PUMAPA Tinrêngthothei Tempilah khan PUMAPA ṭhatvurna ngên rang neh,

³hi thu hih thiampuhei neh zânthlahei zianga ridon rangin an hong tir a; anni khan, “Kum itam takka lei hong itho ngai angkan thla ringanaah hin Tempil siat isûnin bu ngeia ṭap hi kin lai tho mai rang im?” an ti a.

⁴PUMAPA Tinrêngthothei thu chu ki ziangah a zuang tlung a,

⁵ani khan, “Ram sunga mi murdihei neh thiampuhei ziangah khan, hi kum sômsarika sung, thla ringana neh thla sarinaa Tempil isûna bu nin ingeia, nin ingûi ngaiheiah khan, keima rang piala nin ingei chu a nit im a?

⁶Nin fâk a, nin in lâi khomin nangmani ranga nin ifâk a, nin iin ai nit ni mak im a?

⁷Jerusalem neh a vêla khopuihei vângsak inṭum tak taka om a, mîn an lua sip lâi, sim tiang ram neh phâizôlhei khom mîn an lua sip lâi khomah khan PUMAPA khan hi thu ngir hih ni mak im a, zânthla masahei imanga a îsîr ngai kha?” a ti a.

⁸PUMAPA thu khah ki ziangah a zuang tlung a,

⁹“PUMAPA Tinrêngthothei khan hingka hin ai ti a nit: Roirêlna dik mang unla, mi tinin an suapuihei chungah lungkhamna neh khorngaina inlang riseh.

¹⁰Numeihei, farahei, mi vâihei, mi inrianghei, sirde tlak no rei. Tute zelin nin lungrilah nin suapuihei ranga ṭhano rang chu ngaitua no riseh.

¹¹“Khanniseh ki mihei khan ringai nuam loiin an tuklullian an song a, an riat nona rangin an ikuar an hup insêt a.

¹²Zânthla masahei imanga kî pêk, thupêkhei neh dân thuhei chu an ringai nona rangin an lungrilhei chu lungthîr angkan an inkhir a. Khasikin, ki ningthikna natinsat tak chu a zuang itlung tâk a nit.

¹³Khante, anmani ke samna rôl an irngai nuam ino angkah takin an ne samin ki irngai pêk ino a nit.

¹⁴An lai riat ngaino namhei lâiah khan phâivosimpui angkan ke chekindar tâk a. Khaangkan an ram ihoi tak khah ram iṭôlin a om tâk a, tute zel lêng khâi loiin ai om tâk a nit,” a ti a.