Read Biete ZAKARIA 8 Bible Online

ZAKARIA 8 - Biete bible

ZAKARIA 8

¹Tinrêngthothei PUMAPA thu chu ki ziangah a zuang tlung nôk a.

²“Hingka hin Tinrêngthothei PUMAPA khan ai ti a nit: Zion chu a mihei ki lungthlungna sikin natinsat takkan ki kan a, a chungah ning ithik rakkan ani chu kî thîk a nit.

³Jerusalem, ki khopui rithiang, Zionah khan kîr nôk ki ta, amakhan om ki ta; khanchu, Jerusalem khah dikna khopui iti ni tâng a ta, Tinrêngthothei PUMAPA tlâng chu tlâng rithiang iti ni tâng a ti.

⁴Jerusalem kotsuaheiah khan nutarhei neh patarhei an kum tam tak sika irol iṭhuna lôn tâkhei khom kha la ṭhung fer fur an ta.

⁵Khante, khopui tualzôlhei chu nupangtehei neh ipatehei ridâiin la sip khap a ti.

⁶“Atûna mi la dam isunhei mitmuah chu amakhah thil rikhêl tak khom a nit thei a, khan keima ta rangin chu intak viat mak e.

⁷Ringai rei, ki mihei chu sak tiang ram neh thlang tiang ram ata san isuang ki ta, hong ṭhui ki ti.

⁸Jerusalemah om mai tâng an ta; khanchu, ki mihei nîng an ta, kei khom an Pathian, iamom neh idik takka roiirêl pêktu nîng ki ti.

⁹“PUMAPA Tempil lungphûm phûm nî-a zânthlahei bâia thu sîr khah remai unla, sininding a nit theina rangin nin kuthei inrât rei.

¹⁰Kha matonheiah khan chu miriam rangin rilona omak a, mîring imanga rilona khom om ual mak e. Irâl sikin a lût, a suak ta rang khomin ningbeina îte zel omak e; mi murdi an bungtualbôm neh ki înridoi a nit.

¹¹Nikhomsela, atûn chu hi mi la om isunhei ziangah hin chu matona angkan chu ni khâi no ning e.

¹²Rithlaringam takkan chihei tu tâng an ta, grep ruihei khan irâ isuang a ta, rinêng khomin chimu invâng tâng a ta, rivân khomin ridofîm iṭhul a ti. Hi mi la om isunhei hih kha ṭhatvurnahei murdi khah kî vur rang a nit.

¹³Nangni, Juda neh Israel mihei o, matonah khan chu nam danghei khan an vâni risâm risaknaah, ‘Juda neh Israelhei chunga siatna tlung angkan siatna kha ni chungah khom tlung riseh,’ an lei ti ngai a. Nikhomsela, nangni san isuang ki ta; khanchu, nam danghei khan, ‘Juda neh Israelhei chunga ṭhatvurna tlung angkana ṭhatvurna khah dong roh,’ riti risak tâng an ti. Khasikin, ṭi no unla, nin kuthei khah inrât mai rei,” itin.

¹⁴Tinrêngthothei PUMAPA khan hingka hin a ti, “Nin chibulhein ki ning an inthik lâiah khan an chungah thil ṭhano thlun rang ki ngaitua lam angkah takin ki lungril thleng mang a.

¹⁵Nikhomsela, atûn chu Jerusalem neh Juda chungah thil iṭha thlun kî tum tâk a nit. Khasikin, ṭi tlak no rei.

¹⁶Hihei hih nin thiltho rang chu a nit. Mi tinin mahni bungtualbôm ziangah thudik ril unla, ringeina a om theina rangin nin roirêl munah diknan roirêl rei.

¹⁷Tute zelin nin lungrilah nin bungtualbômhei ranga ṭhano chu ngaitua no unla, milaka ṭongrikhâm tho no rei. Hihei murdi hih ki thil nel chu an nit, iti hi Tinrêngthothei PUMAPA thu suak chu a nit,” itin.

¹⁸Tinrêngthothei PUMAPA thu chu ki ziangah a zuang tlung a.

¹⁹“Tinrêngthothei PUMAPA khan hingka hin ai ti a nit: Thla lina bu ngei, Thla ringana bu ngei, Thla sarina bu ngei, Thla sômna bu ngei khah Juda mihei ta rangah khan râifânna neh lômna ruaiṭhe ai nit rang tâk a nit. Khasikin, dikna neh ringeina hih nin ringaiinnat rang a nit,” itin.

²⁰Tinrêngthothei PUMAPA khan hingka hin ai ti a nit: “Khopui itam takka rithokin mihei chu Jerusalemah la hong an ta;

²¹khopui khatkata omhei khah khopui danga omhei ziangah khan fêng an ta, ‘Tho rei, PUMAPA lungkhamna ngên rangin neh Tinrêngthothei PUMAPA chubai iûn rangin fe zel ei ti u; keini khom fe sâng kin ti,’ la tîng an ti.

²²Tinrêngthothei PUMAPA chubai iûn rang neh a zianga lungkhamna ngên rangin mipui itam takkahei neh nam irât tak takhei chu Jerusalem pan an ti.

²³Kha nikhuaheiah khan chu hingka hin la nîng a ta, nam tin chi tin lâia rithokin mi sômkah hong an ta, Juda mi khatka puanmôra ritûl pumin, nin ziangah Pathian a om iti kin riat sikin keini khom nin ziangah fe sâng kin ti, la tîng an ti,” itin.