Read Biete ZAKARIA 9 Bible Online

ZAKARIA 9 - Biete bible

ZAKARIA 9

¹Hadrak ram neh Damaska khopui chungchânga PUMAPA thununna thu chu: Israel namhei bang ni loiin, Suria ram khopui khom PUMAPA ta a nit.

²Hadrak ramrî richôipui Hamath khom ama ta a nit a, Tura neh Sidon khopuihei khom an thiamna tin neh khan PUMAPA ta an nit.

³Tura khan kulpui ama ta rangin a siam a, tangkaruahei chu pilvut angkah dôran a bûm a, rângkachakhei khom kotsuaa nimnok angkah dôran ai bûm a nit.

⁴Nikhomsela, PUMAPA khan archongna tin kha khêng pêk riai a ta, a neinunhei chu tuipuiah pai pêk riai a ta, a khopui chu meiin hâl inrivâm pêk vang a ti.

⁵Hihei hih Askelon khopui khan mûng a ta, ṭîng a ti. Gaza khopui khomin mûng a ta, a nat ti tak tak a ti. Khaangkan Ekron khomin mûng a ta; a sabeina tinrêng boi vang a ti. Gaza khan a rêng ichân a ta; Askelon chu khoramin om a ti.

⁶Asdod chu chi rinok mihein luang an ti. Khante PUMAPA khan, “Nam ripâk Filistia mihei chu intlôm ki ti.

⁷Anni khan sa a thisen neh rêng rêng fah khâi no nia, fâk rithiang ino rêng rêng khom fah khâi no nih. Anni khom a la om isunhei chu ki mihei lâia tep sa nîng an ta, Juda nam khatka angkah ni tâng an ti. Jebus mihei angkan Ekron mihei khom ki mihei lâia tep ni tâng an ti.

⁸Ki ram chu keiman rung ki ta, sipai lôm tute thlengrilôi khâi no nih; ngêpsiatuhein ki mihei an sirde rang phal tlak khâi no ning e. Ki mit ngêiin ki mihei tuangna khah kî mu tâk a nit,” a ti a.

⁹O Zion nainu, lôm tak tak roh. O Jerusalem nainu, râifânin ikhêk suak roh. Ringai roh, ni rêng khah ni ziangah a zuang e! Mi fel a nit a, nêtu a nit; Ringaiichîn takkan sakuartung chungah a chuang a, Sakuartung te chung ngêiah khan.

¹⁰PUMAPA khan, “Efraima rithoka ridoina tâlihei neh, Jerusalema rithoka sakorhei chu inrimang vang ki ta, Ridoina phel ngulhei chu ikhiak ki ti. Khante, ni rêng khan namhei lâiah ringeina siam a ta; A roirêlna chu tuipui ata tuikhanglian idênin, Eufratis vadunga rithoka kôlkil idênin nîng a ti,” a ti a.

¹¹PUMAPA khan, “Nangmah chu ei kâra ki thuthlung, ribôlna thisena indet sikin, Khurpui tui om nona ata ni mi tânghei khah ki hong înzôk rang a nit.

¹²Nangni mi tâng, tûngna neihei; kîr nôk ta rei, Nin mun râlringamna kulpui ngêiah khan kîr nôk ta rei. Nangni ki îril a nit, nin tuang man chu a bâk inikan nangni thung ki ti.

¹³Juda chu phelngul angkan mang ki ta; Efraim chu phel angkan mang ki ti. Grik naihei idoina rangin Zion naihei chu khandai angkan mang ki ti,” a ti a.

¹⁴PUMAPA chu a mihei chungah ilang a ta, A phelhei chu khothlâr angkan kâp suak a ti. PUMAPA PATHIAN khan bekul mût a ta, Sim tianga rithokin thlisimah khan fe suak a ti.

¹⁵Tinrêngthothei PUMAPA khan a mihei chu vênginzôk a ta, Anni khan an irâlhei chu ilem zoi an ta, Vailungdêngin inê an ta; Khante, ridoina bualah khan zûnrui angkan ikhêk an ta, An irâlhei thisen khah isuang an ta, Ribôlna thisen rihûma rithoka mâichâm chunga bun suak angkan luang zun zun a ti.

¹⁶Kha nî-ah khan chu berapun a bera lômhei, Thil inrîta rithoka a înzôk ngai angkan, PUMAPA an Pathian khan a mihei chu inzôk a ti. Anni chu rênglukhuma lungiluhei angkan a ramah khan vâr ri-el takkan om an ti.

¹⁷Ram chu ingkana ai ṭhatin â en ai hoi rang vang tâk im na! A bubâlhei neh uainhei khan vânglâi chu rât rifîmin siam a ti.