Read Biete MALAKIA 3 Bible Online

MALAKIA 3 - Biete bible

MALAKIA 3

¹PUMAPA Tinrêngthothei khan, “Ki tirtôn khah tir ki ta, ani khan ki matonah lampui siam a ti. Khanchu, nin izong ngai PUMAPA khah, a Tempilah khan zuang zel a ti. Ringai ta u, Thuthlung tirtôn nin ilôm tak tak ngai khah a zuang e,” a ti a.

²Khannisela, a zuang nî khah tûm â tuang zoi rang? A zuang ilang tikah khan tûm â ding thei rang? Ani khah hâlzôina mei angkana lum neh puan risûk sabon angkana al a nit.

³Tangkarua hâlzôitu neh inrithiangtu angkan iṭhung a ta, Levia naipahei khah inrithiang a ta, anni khah rângkachak neh tangkarua angkan inrithiang a ti; khanchu, anni khan PUMAPA ziangah ribôlna diktak khah lan tâng an ti.

⁴Khangkan tianlâi sûnhei neh kumhei angkah khan Judai ram neh Jerusalem mihei thillan khah PUMAPA khan lei lôm nôk tâng a ti.

⁵PUMAPA Tinrêngthothei khan, “Roiirêl rangin nin lâiah zuang ilang ki ta; khanchu, dôithiamhei, inrêhei, milaka ṭongrikhâmtuhei, numeihei neh farahei neh nam danghei nuaisiatuhei, rilofa lo peh ṭha nuam inotuhei, neh keima ne chôiinrisâng inotuhei khah thiamno inchang ki ti,” a ti a.

⁶“Keimah PUMAPA hi danglam ngai mang a; khasikin, nangni Jakoba richihei nin la irmang vang ino a nit.

⁷Nin chibulhei zoro lâi ata ki thupêkheia rithokin nin pêt rimang a, izôm khom zôm ngai mak chei. Ki tiang mâi ngat unla, kei khom mâi nangni ngat ki ti. Nikhomsela, nangni lakin chu, ‘Ingkan im mâi nang kin ngat rang?’ nin ti a.

⁸Miriamin Pathian ta khah a îrûk pêk rang mani? Khanniseh, nangmani khan nin ne la rûk pêk mai ngai a. Nangmanin chu, ‘Îtakah hin im nang kin îrûk pêk?’ nin ti a. Sômka khatkah neh thillanheiah hin nin îrûk a nit.

⁹Ki dongtum nin ne rûk pêk sikin nin nam pumpui vânisâm nin nit tâk.

¹⁰Ki inah ifah rang a om theina rangin sômka khatkah murdi chu tholôm bômah hong chôi rei. Hi thilah hin ne hang fia ngân ta u, rivân tukverhei khah nangni ong pêkin, ṭhatvurna dong zoi loi rang dôrkan nangni vur ki ti,” PUMAPA Tinrêngthothei khan a ti.

¹¹“Khanchu, a fa inrimangtu khah nangni inboi pêk ki ta, nin chimuhei khah nangni seh pêk khâi no nih. Nin rikula grep rui khom a zoro man â râ khah ṭul khâi no nih.

¹²Khanungchu, nam tin tinin hamṭha nangni tîng an ta, ilôm takkan nin ramah om tâng nin ti,” PUMAPA Tinrêngthothei khan a ti.

¹³“Ki chungah ṭong ikhâ tak tak nin mang a,” PUMAPA khan a ti. Nangmanin chu, “Takâm nang kin îsîr insiat?” nin ti a.

¹⁴Nangnin chu, “Pathian sin itho hi â tlong a nit; a thupêk ei izôm neh PUMAPA Tinrêngthothei makungah ringaiinseh taka ei ilêng ngai hih im rifena a om a?

¹⁵Atûnah hin mi lârripâkhei kha hamṭha takin an om a, siatna sintuhei kha an vângsak inṭumin an om a; a nit, Pathian ifiatuhei kha kuttum tuang loiin an zôk ngira nin iti a hin,” itin.

¹⁶Khanchu, PUMAPA ṭituhei khah an risôn a, PUMAPA khomin a lei ringai a, a lei riat a, PUMAPA ṭituhei neh arming ngaisaktuhei riming khah riatmaina lekhabuah a makungah riziak a nit tâk a.

¹⁷PUMAPA Tinrêngthothei khan, “Ki zoron kungah khan chu anni khah ki tahei nîng an ta, ki dongtum bîk nîng an ti. Min a naipa, ama fâtu rang a iduam ngai angkan anni chu iduam ki ti.

¹⁸Khanchu, mi fel neh mi pualoi danglamna hei, Pathian sinithotu neh sintho notu dongtum rang ithlei thei tâng nin ti,” a ti a.