Read Biete MATHAIA 10 Bible Online

MATHAIA 10 - Biete bible

MATHAIA 10

¹Jisuan a kôilôm Sômleiinikahei[27] khah a koi a, ramrilihei ûmisua theina ritha neh damnona tinrêng neh natna tinrêng indam theina ritha a pêk a.

²Tirtôn Sômleiinikahei riming chu hihei hih a nit: A masa takah Simona (Petera an iti) neh a unaipa Andria; Zebedaia naipa Jakoba neh a unaipa Johana;

³Filipa neh Bartholomaia; Thoma neh siadôltu Mathaia; Alfaia naipa Jakoba neh Thadaia;[28]

⁴Kanan mi Simona neh ân mantu Juda Iskariota[29] hei an nit.

⁵Kha Sômleiinikahei khah Jisuan a tir suak a, an ziangah hingkan he a be a; “Jentailhei ramah neh Samari mihei khuah chu fe no rei.

⁶Israel nam, bera rimanghei ziangah nin fe rang a nit.

⁷Fe unla, ‘Rivân Ram chu a nâi tâk,’ itin thu va sîr rei.

⁸Dam inohei indam unla, mithihei kâiithoi unla, iphârhei inrithiang unla, ramrilihei ûmisua rei. Â tlongin nin mu a, â tlong ngirin peh rei.

⁹Nin choliah rângkachak manih, tangkarua sum manih, sumsen tangka manih chôi no rei.

¹⁰Inzinna rangin cholite manih, zako bop manih, pheikok bop manih, irol bop manih khom chôi no rei. Sinithotu chu ai nanghei khah imûn rup a nit.

¹¹“Khua liana manih, khua chîna manih, nin lûtin nangni thlun nuam rang mi zong unla, kha khua nin mâk nôk mâkah chu kha inah khan om mai rei.

¹²Insung nin lûtin chu ‘Thlangamna nin chungah om riseh,’ ti rei.

¹³Kha ina mihei khan nangni an lei lômin chu nin thlangamna chibai [30] khah an chungah tlung riseh; khanniseh, nangni an lei lôm non chu nin chibai ṭong khah nin chungah kîr nôk riseh.

¹⁴Khante, tak in khomin, tak khua khomin nangni an iham noa, nin ṭong an ringai non chu marak unla, nin kea vâivut khah ithing itla rei.

¹⁵Thu dik nangni ke ril, Roirêl Nikhuan chu kha khuahei tuang rang nêkan chu Sodom neh Gomora khuahei tuang rang chu a zâi om ual a ti.

¹⁶“Ringai rei, inia lâia bera om angkan nangni kî tir a nit hih. Irûl angkana vârin, vaṭhu angkana lungrivuaiin om rei.

¹⁷Khanniseh, ridîn rei; nangni man an ta, roirêl munah nangni ṭhui an ta, inkhôm inheiah nangni an ihêm rang a nit.

¹⁸Keima sikin roirêltuhei neh rênghei makungah, anmani neh Jentailhei Thurchi Ṭha nin isîr pêk theina rangin la ngîr nin ti.

¹⁹Nin chungthu ngaitua ranga nangni an ṭhui tikin nin ti rang neh nin ṭong rang dân ingaituan nin ilung inbuai no rei; nin ti rang chu a zoro takah khan inria nîng nin ti.

²⁰Ṭong nin ti ranghei khah nangmani ṭong ni khâi no nia, nangmania om nin Pa Rithla khan ai ṭong rang a nit.

²¹“Inzirpui khomin ân zirpui ithat rangin lan man a ta, pa khomin a naihei lan man a ta, naihei khomin an nu neh pahei doi an ta, that an ti.

²²Keima sikin mi tinin nangni la nel an ti. Nikhomseh, tukhom a mong idêna tuang idiar chu inringin om a ti.

²³Khua khatkatah an nuam nangni an lon chu kho dangah ro rei. Thu dik nangni ke ril, Miriam Naipa a zuang man Israel rama khuahei murdiah nin sin tho zoi no tin u.

²⁴“Riseilâi khah ân riseitu nêkan lian ual mak a, suak khom a pu nêkan lian ual mak e.

²⁵Khasikin, riseilâi khah ân riseitu angkana a hong iom neh, suak khom a pu angkana a hong iom khah an ilung a tluk rang a nit. Inchongpu lua Belzebula an tin teh, a inmihei vâng chu ingkah dôra riming isian im an ikoi rang na!

²⁶“Khasikin, miriamhei khah ṭi no rei. Ilang iloi ranga rithup îte omak a, reh loi ranga iip khom îte omak e.

²⁷Izînga nangni ki iril hih, sûn khovârah isîr unla, ikuar kunga nin iriat hih inchungsîpa dingin tlângisam rei.

²⁸“Taksa thata rithla that thei inohei khah ṭi no unla; Pathian, dûkmuna taksa neh rithla inrimang theitu khah ṭi rei.

²⁹Vasak inikah tangka khatkan nin irchôk thei ni mak im a? Nikhomsela, an lâia khatka lua nin Pa thu ni non rinênga ṭul no nih.

³⁰Nangni chu nin samzâi tena khom hih itep riai kêng ai nit.

³¹Khasikin, ṭi no rei, vasak itam takka nêkan nin ilut ual a nit.

³²“Tutu vântlâng riata ne thlop chu kei khomin ki Pa rivâna mi makungah thlop ki ti.

³³Khannisela, tutu vântlâng riata ne phial chu ki Pa rivâna mi makungah phial ki ti.

³⁴“Rammualah hin ringeina inlêng ranga zuangin ne tûng no rei. Ringeina inlêng ranga zuang ni mang a, khandai inlêng ranga zuang kêng kî nit.

³⁵Naipahei an pahei indoi rang, nainuhei an nuhei indoi rang, imoihei an tarpihei indoi ranga zuang kêng kî nit.

³⁶Mahni râl iliantak chu a insungmihei ngêt nîng an ti.

³⁷“Tutu keima nêka a nu manih, a pa manih, lungithlung ual chu ki kôilôm inih tlâk ni mak e; tutu keima nêka a nainu manih, a naipa manih, lungithlung ual khom ki kôilôm inih tlâk ni mak e.

³⁸Tutu mahni kros riputa ne zui ino chu ki kôilôm inih tlâk ni mak e.

³⁹Tutu mahni ringna inzôk itum kan chu ichân an ta; khanniseh, keima sika a ringna chân kan chu inrihuam an ti.

⁴⁰“Tutu nangni lôm chu keima ne lôm an nit; tutu ne lôm chu ne tirtu lôm an nit.

⁴¹Tutu zânthla khah zânthla a nitna sika lei ilôm chu zânthla loman dong an ti. Tutu mi fel khah mi fel a nitna sika lôm chu mi fel loman dong an ti.

⁴²Thu dik nangni ke ril, tutu ki kôilômhei lâia â chîntak khom hih, ki kôilôm a nitna sika tuisik kilâtkah khom in-in chu loman ichân tlak no nih,” a ti a.