Read Biete MATHAIA 11 Bible Online

MATHAIA 11 - Biete bible

MATHAIA 11

¹Jisuan kha inriseina thuhei khah a kôilôm Sômleiinikahei khah a pêk zoiin chu kha mun khah a mâk a, a kôlvêla khuaheiah inrisei rang neh thu sîr rangin a fe tâk a.

²Khante, tâng ina om baptistu Johana khan Krista [31] sinthohei khah a lei riatin, a kôilômhei ṭhenkah Jisua ziangah a tir a.

³Jisua ziangah, “Ne ril roh. Johanan â zuang rangtu ai ti khah nî nit mani? Anitnole, mi dang kin lai tûng rang mani?” an ti a.

⁴Jisuan an ziangah, “Fe nôk ta unla, thil nin imu neh nin iriathei hih Johana va ril rei.

⁵Mitdelhei an mit a vâr tâk a, kebâihei ken an lôn thei tâk a, iphârhei an rithiang tâk a, kuarisêthei khom an riat thei tâk a, mithihei khom kâiithoiin an om nôk tâk a, inrianghei ziangah Thurchi Ṭha isîr a nit tâk.

⁶Tutu ki chunga ringlana nei inohei chu an ham a ṭhat e,” a ti a.

⁷Johana kôilômhei khah an rot nôk kaneh, Jisuan lômpuihei ziangah khan Johana thurchi â sîr a, “Johana ziangah ramchârah nin fe lâiah khan im imu ranga nin itûng kha? Ithlîn loisûl ai sêm innîng kha mani?

⁸Î-en ranga nin ife mani? Puan rivuai isila rivo ien rangin mani? Khangkana puan rivuai isil ngaihei chu rêng inah kêng an iom ngai.

⁹Ne ril rei, î-en ranga nin ife mani? Zânthla en rangin mani? O, a nit; khanniseh, zânthla nêk khoma roinpui ual nin imu a nit hih.

¹⁰Kha Johana thu khah kêng Pathian Thubûn, ‘Pathianin, ki tirtôn ni matonah tir ki ta, ani khan ni lampui lei siam a ti,’ itia a thurchi an lei irziak kha.

¹¹Thu dik nangni ke ril, Baptistu Johana nêka roinpui ual nupang sunga inzir lâiah tute la suak ngai mak. Khannisela, rivân rama â chîn tak khom Johana nêkan chu an iroinpui ual a nit.

¹²Baptistu Johanan a thucha â sîr lâi ata vuansûn tenan rivân ramin tuangna rikhêl a tuang ngai a, mi tôksolhein tharum isongin kha ram khah ilah rang an itum ngai a nit.

¹³Zânthlahei murdi neh Mosia Dân thu khan Johana zuang om idênin Ram thurchi khah an lei isîr a;

¹⁴an thu sîr khah nin iam nuamin chu Johana hih Elija chu a nit, a zuang rang thu lei inpuang tâk kha a nit.

¹⁵Ringaina ranga ikuar inei kan chu iṭha takkan ringai riseh.

¹⁶“Atûn lâia rualitharhei hih înêm ken rikhek rang tâk o? Naipang bazâr munheia ṭhung a, lôm khatkan lôm danghei hei ikhêk pêk a,

¹⁷‘Rineina belem nangni kin tum pêk a; nikhomseh, lâm mak chei a, lusûn la kin sak khomin ṭap mak chei a,’ itihei angkah hi an nit.

¹⁸“Johana chu a zuang a, bu a ngei a, uain in mak a, mi tinin ‘Ramrili iman a nit hi,’ an ti a.

¹⁹Miriam Naipa hi a zuang a, a fâkin a in a, mi tinin, ‘Hi mi hih en ta u, rôlruakpa, uain idu pa, siadôltuhei neh mi sualhei rualpa soh,’ an ti a. Nikhomseh, Pathian vârna chu â dik iti a sinthoah a îlang a nit,” a ti a.

²⁰Jisuan sinrikhêl a tho tamna tak khuahei khah an sual ata an rilet no sikin kha khuahei khah a ngo a.

²¹“Nangmah, Korazin, ni chung ân khôk vang na! Nangmah, Bethsaida, ni chung ân khôk vang na! Nangmania sinrikhêl isinhei khah Tura neh Sidonah isin ni seh, borapuan isila rivut riphulin an sual ata an rilet tâk iti inlang tâng an ti.

²²Thu dik nangni ke ril, Roirêl Nikhuan chu nangmani ituang nêkan chu Tura neh Sidon mihei ituang chu a zâi om ual ok a ti.

²³Nangmah, Kapernaum khom rivân itlunga inpâk nî nit rang mani? Mithi khua dêna pai iṭhul kêng nî nit rang? Nangmaa sinrikhêl isinhei khah Sodoma khuaa sin ni sela chu vuani tenah hin la om mai a ti.

²⁴Nang ke ril, Roirêl Nikhuan chu ni tuang nêkan chu Sodom khua ituang chu a zâi om ual ok a ti,” a ti a.

²⁵Kha lâiah khan Jisuan, “Epa, rinêng neh rivân Puma, nangman mi vâr neh mi thiamhei ziangah chu hi thu hih ni thup a, mi inmôlhei ziangah nen puang sikin ni ziangah lômthu ke sîr.

²⁶A nit, Epa, khangkana tho khah ni lungdo tak a nit.

²⁷“Thil tinrêng ki Pan a ne pêk tâk; Pa ti non chu tutên Naipa hi reh mak e. Pa khom kha Naipa neh an zianga Naipan ân puangnahei banah chu tutên reh mak e.

²⁸“Nangni sin isôl neh puak irik ipêl murdihei o, ki ziangah hong unla, keiman ringamna nangni pêng ki ti.

²⁹Ki ringkol ribât unla, ki ziangah risei rei, zâiidam tak neh ringaiichîn tak ki nit; khanchu, nin rithla rangin ringamna mûng nin ti.

³⁰Ki ringkol chu a hoi a, ki puak khom ai zâng a nit,” a ti a.