Read Biete MATHAIA 12 Bible Online

MATHAIA 12 - Biete bible

MATHAIA 12

¹Khante, sûn itôiteka nungah chu sabatnin Jisua khah bu bilheiah a thleng a. A kôilômhei kha an von a ṭâm a, bu vuihei khah an chun a, an fâk a.

²Farisaihein an mun chu, Jisua ziangah, “En ta, ni kôilômhein sabatnîa itho ranga Dânin ai khap khah an itho a nit hi,” an ti a.

³Jisuan an ziangah, “Davida neh a mihein an vonṭâm lâia an itho khah nin lai tep tlak ngai ino mani?

⁴Davida khah Pathian inah a lût a, amah neh a mihein Pathian zianga ilan tâk ibai, thiampuhei bangin an fâk ranga rithiang khah an ifâk a nit kha.

⁵Khabanah, sabatnî tin Tempila thiampu omhei khan Sabatnî Dân an ichâi ngai a, khan khoma thiamno chang ngai mak iti Mosia Dân lekhabuah nin itep ngai ino mani?

⁶Nangni ke ril, Tempil nêka roinpui ual hin ai om a nit.

⁷Pathian Thubûn, ‘Ribôlna nêkan lungkhamna ki nuam,’ ai ti hih a omzia nin iriatinfel ni sela chu mi ṭhahei khah thiamno inchang no tin u.

⁸Miriam Naipa hih sabatnî Puma kêng ai nit,” a ti a.

⁹Jisuan kha mun khah iman inkhôm inah a lût a,

¹⁰amakhan mi khatkah kut izeng a lei om a. Jisuan a thonsual itia an nô theina ranga lei ridîp ṭian mi ṭhenkahei khom an lei om sa a, anni khan Jisua ziangah, “Sabatnî-a mi indam hih ei Dânin ai khap mani?” itin an ridon a.

¹¹Jisuan an ziangah, “Nin lâia tukhôk manin bera khatkah nei sela, sabatnin khur inthûkah ṭul ta sela, tûm â kêlisua no rang chei u?

¹²Bera nêkan miriam chu ai lut ual ok a nit. Khasikin, sabatnî-a mi ṭangpui hih ei Dânin a ne iphal a nit,” itin a sâm a.

¹³Khanchu, kut izeng ziangah khan, “Ni kut phar roh,” a ti a. A hang phar a, a kut kiangtianga angkah takin a dam vang tâk a.

¹⁴Khanungchu, Farisaihei khah an rot a, Jisua an that rang tlia an phan tâk a.

¹⁵An that rang tlia an phan iti Jisuan a riatin chu kha mun ata a rot a; lômpuihein amah an zui a, dam inohei murdi ân dam a.

¹⁶Anni kha a thurchi tute ziangah isîr loi rangin thu a pêk a.

¹⁷Pathianin Zânthla Isaia bâia a îsîr khah a hong tlung theina rangin amakhah ai tho a nit:

¹⁸“Amah hih ke som, ki irthlang, Lung kî thlung, a chunga kî lôm tak takah chu a nit. A chungah ker Thla siang ki ta, Khanchu, nam tin ziangah ki roirêlna inpuang a ti.

¹⁹Sêl no nia, ikhêk ual no nia; Lamilianheiah khom rihu lum tho no nih.

²⁰Dikna khah nêna a pêk mâkah chu Lâiluang ikûm[32] khah ikhiak no nia, Meiser ide rian rian khom that no nih.

²¹Mi tinin a chungah an tûngna ringat an ti,” iti hih.

²²Khante, kha lâiah khan ramrili iman mitdel ṭongtheiino khatkah a ziangah an hong ṭhui a. Jisuan kha mi khah a lei indam a; khanchu, a hong ṭong thei a, a hong mu thei tâk a.

²³Jisua sintho khah lômpuihei murdi khan arkhêl an ti tak tak a, “Hi mi hih Davida Naipa kha ni mak im a?” an ti a.

²⁴Farisaihei khan chu amakhah an riatin, “Hi mi hin ramrilihei a ûmisua theina chu an rêngpa Belzebulan ritha a pêk sika a nit,” an ti a.

²⁵Jisuan an ingaituahei khah a riat a, an ziangah, “Tak ram khom lôm risiamin an ridoi risakin chu iding sôt ngai mak e. Tak khua khom, insungkua khom lôm risiamin an ridoi risakin chu an îlîr rang a nit.

²⁶Khasikin, Soitana khom Soitana ngir a ûmisuan chu amah neh amah ridoi nîng a ta, a ram khah a îlîr ngêt rang a nit.

²⁷Belzebulan ritha a ne pêk sika ramrilihei kî ûmisua theiin nin ne ibe a nit a; khateh, nangni zuihei [33] khan tu sikin im ramrili an lei iûmisua ngai ai nit? Nangni zuihei lei itho ngai khan kêng nin idiknozia a înlang a nit.

²⁸Belzebula ni mak a, Pathian Rithla kêng ramrili ûmisua theina ritha ne pe; hi sikah hin Pathian Ram chu nin ziangah a zuang tlung tâk iti a înlang a nit.

²⁹“Tutên mi rât khah a khuap bak non chu a inah khan ilûtin a neinunhei lah pêk thei no nih. Kha mi rât khah a khuap bak bangin kêng a in khah a îrok thei rang a nit.

³⁰“Tutu, ki tianga ṭang ino kah chu ne doi a nit a; tutu ne bûmpui ino kan chu a îthek indar a nit.

³¹Khasikah khan nangni ke ril, mi an insualna murdi neh Pathian an isîrinsiatna tinrênghei chu izâ nîng a ta; khanniseh, Rithla Rithiang sîrinsia chu izâ ni no nih.

³²Tutu, Miriam Naipa sêl chu izâ nîng an ta; khanniseh, Rithla Rithiang sîrinsia chu atûn neh kumkhuan izâ ni no nih.

³³“Thingkung iṭha chu â râ khom ṭhâng a ta; thingkung ṭhano chu â râ khom ṭhano nih. Thingkung chu â râah ireh thei a nit.

³⁴Irûl richihei o, nangmani isual ṭiankan ingkan im thu ṭha nin isîr thei rang? Lungrila sip ilêt kha kêng bâiin a îsua ngai.

³⁵Mi ṭha khan archon kok ata thil iṭhahei a sapsua ngai a; mi ṭhano khan chu archon kok ata thil isiahei ai sapsua ngai a nit.

³⁶“Nangni ke ril, Roirêl Nikhuan chu ṭong chanlamboi an itho ngai murdi khah la sîr riai an ti.

³⁷Ni ṭong khan thiam nang inchang a ta, ni ṭong ngir khan thiamno nang inchang a ti,” a ti a.

³⁸Khanungchu, Dân inriseituhei neh Farisaihei lâia mi ṭhenkahein a ziangah, “Minriseitu, ni zianga rithokin risinsiana thil rikhêl imu kin nuam,” an ti a.

³⁹Jisuan an ziangah, “Atûn lâia thoithar, isual tak neh inrê ngaihei hin, risinsiana thil rikhêl nin izong na! Zânthla Jona risinsiana banah chu risinsiana thil rikhêl dang nin ziangah ipe ni no nih.

⁴⁰Khaangkan Jona khah sûn thumkah neh zân thumkah ngapui sungah ai om angkan Miriam Naipa khom hi sûn thumkah neh zân thumkah rinêng rilah ai om rang a nit.

⁴¹Roirêl Nikhuan chu Ninevi khuaa mihei kha atûnlâi mihei rualin iding an ta, thiamno nangni inchang an ti; anni chu Jona thu sîr an riat sikin an sualhei ata kha an irlet a nit; nangni ke ril, Jona nêka roinpui ual hin ai om a nit.

⁴²Roirêl Nikhuan chu Seba rêngnu kha atûnlâi mihei rualin iding a ta, thiamno nangni inchang a ti; ani chu rêng Solomona inriseina vâr ringai rang ilua khomin a ram ata ilah takah a hong înzin a nit; nangni ke ril, Solomona nêka roinpui ual hin ai om a nit.

⁴³“Ramrili khah miriam sung ata a suakin chu ngammun izongin tui boina ramah a chaidiai a. A mu no tenan chu,

⁴⁴‘Ki in, kî mâk tâkah khan kîr nôk tâng ki ti,’ a ti a. Khanchu, a kîr nôk a, a va tlungin chu irong vangka, phît infâi a, rêl infel diamkan a va mu a.

⁴⁵Khanchu, a fe a, ramrili dang sarikah ama nêka seh ual a hong ṭhui a; amakhan an lût a, an om tâk a. Khanungchu, kha miriam dingmun khah matona nêkan a siat ual ok tâk a. Khangkah khan atûnlâia thoithar isual takhei chungah hin la tlung a ti,” a ti a.

⁴⁶Mipuihei ziangah Jisuan thu â sîr mai lâiah khan Jisua nu neh a unaipahei kha an hong tlung a. Amah isôn inuamin putiang an iding a.

⁴⁷Khanchu, mi khatkan a ziangah, “En ta, ni nu neh ni unaipahein nang isôn inuamin putiang nang an ngâk mai,” a ti pêk a.

⁴⁸Jisuan a ziangah, “Tûm ki nu chu? Tûm ki unaipahei chu?” a ti a.

⁴⁹Khanchu, a kôilômhei tiang a kut a phar a, “En rei, hihei hih ki nu neh ki unaipahei chu an nit.

⁵⁰Tutu, ki Pa rivâna mi lungdo sinhei hih ki unaipa hei, ki farnu hei, ki nu hei chu an nit,” a ti a.