Read Biete MATHAIA 13 Bible Online

MATHAIA 13 - Biete bible

MATHAIA 13

¹Kha nî sûn ngirah khan Jisua khah in ata a suak a, dîl rikamah a fe a, amakhan â ṭhung a, ân risei a.

²A zianga mipui hong ribûm khah an tam tak tak a; khanchu, rikuangah â ṭhung a, lômpuihei kha chu ṭiaiphoiah an iding a.

³Khanchu, ṭongrikhekin thurchi itam takkah â sîr a: “Ringai ta u, voikata chu mi khatkan bu rît rangin a fe a.

⁴Fa chi arthe a, ṭhenkah lampuiah a tlâk a, ivahein an fâk riai tâk a.

⁵Ṭhenkah lungpharpha rinêng riphânaah a tlâk a, rinêng â sâ no sikin a hong ṭoi zel a.

⁶Khannisela, inî a hong risâng ianin chu a em rizual a, rizung a tlâk inthûk no sikin a ram nôk rip tâk a.

⁷Ṭhenkah chu riling kârah a tlâk a, riling khah a hong thuar a, a dîp inrimang tâk a.

⁸Nikhomsela, ṭhenkah chu rinêng iṭhaah a tlâk a, a ṭhen a bâk rizakan, a ṭhen a bâk sômirukkan, a ṭhen a bâk sômithumkan a hong irâ tâk a,” a ti a.

⁹Khante, Jisuan a ṭong ikhârnan an ziangah, “Ikuar inei kan chu iṭha takkan ringai riseh,” a ti a.

¹⁰Khante, kôilômhei khah Jisua ziangah an hong a, “Ithôm lômpuihei ziangah ṭongrikhekin thu ni îsîr ngai?” an ti a.

¹¹Jisuan an ziangah, “Rivân Ram thu rithup riattheina nin ziangah ipe a nit a, mi danghei ziangah chu ipe ni mak e.

¹²Tukhom â nei kah chu ipeh sa nîng a ta, nei intam ual a ti; tukhom â nei ino kah chu ai nei viatte khom lah pêk rip an ti.

¹³An ziangah ṭongrikheka thu ke sîrna bi chu an en ṭiana an mu thei nona rang neh an ringai ṭiana an riat thei nona rangin a nit.

¹⁴Khasikin, Zânthla Isaia rillôkna thu khah an chungah a zuang itlung a nit: “‘Hi mihei hin ringai ṭian an ta chu reh thei no nih; En ṭian an ta chu mu thei no nih.

¹⁵Hi mihei lungril hih a lei rimul tâk a, An ikuarhei a lei sêt tâk a, An mit khom a lei izîng tâk a nit. Khangkan, ni no sela chu an mitin mûng an ta, An ikuarin riang an ta, An lungrilin reh thei an ta, Ki tiang hong ngat nôk an ta, Ki lei îndam rang a nit, Pathianin a ti,’ ai ti kha.

¹⁶“Nangni chu nin vân a ṭhat vang na! Nin mitin a mu a, nin ikuarin ai riat a nit.

¹⁷Nangni ke ril, zânthlahei neh Pathian mi itam takkah khomin nin thil muhei hih â mu an nuam tak tak a; nikhomseh, mu thei mak a; nin thil riathei khom hih â ria an nuam tak tak a; nikhomseh, reh thei mak e.

¹⁸“Khasikin, ringai unla, fachi rithetu ṭongrikhek omzia hih risei rei.

¹⁹Tutu, Pathian ram thurchi ikuara ria a; khanniseh, rethiam ino chu fachi lampui kôla thla angkah an nit. Mi Sualah khah a hong a, an lungrila rithea om khah a lâk pêk riai ngai.

²⁰Khante, fachi lungpharpha rinêng riphânna thla chu thu an riat kaneh ilôm takka ham zelhei hi an nit.

²¹Nikhomseh, rizung inthûk an tlâk no sikin om sôt ngai mak e. Thu sika intakna manih, nuamlona manih a hong om kaneh chu an ilîr nôk zel ngai.

²²Fachi riling kâra thla chu thu khah an riat a; nikhomseh, hi ringnun lungkângna neh richong hoisakfamna khan thu khah a dîp a, irâ nei loiin ai om ngai a nit.

²³Khante, fachi rinêng iṭhaa thla chu thu khah an riat a, riatthiamna khom ineihei hi an nit. Khahei kha chu an irâ a, a ṭhen rizakan, a ṭhen sômirukkan, a ṭhen sômithumkan a hong pung ngai,” a ti a.

²⁴Jisuan ṭongrikhek dang an ziangah â sîr nôk a; “Rivân Ram chu mi khatkah a loia fachi ṭha rithetu neh khan inrikhek a nit.

²⁵Zânkah mi an in riai nungin, irâl a hong a, bu lâiah khan bu lem arthe a, a rot nôk tâk a.

²⁶Khante, bu khah a hong ṭoi a, a hong vuiin chu bu lem khom a hong ilang sa tâk a.

²⁷Loi ineitu somhei khah an hong a, a ziangah, ‘Epu, ni loiah fachi ṭha ni irthe ni mak im a? Bu lem soh taka rithoka hong iom im ai nit?’ an ti a.

²⁸Ani khan an ziangah, ‘Amakhah chu irâlhei lei irthe a nit,’ a ti a. Isomhei khan a ziangah, ‘Khateh, bu lemhei khah va ṭuan unlang ni nuam im?’ itin an ridon a.

²⁹Ani khan an ziangah, ‘Nuam mang e, bu lem nin ṭuan malamin bu tak khom khah nin ṭuan sa duai lôiin.

³⁰Bu ât zoro a tlung mâkah chu bu tak neh bu lem khah munkan thuar riseh. Khanchu, bu ât tikin bu âttuhei ziangah, bu lem khah iphâi masa a, itêl a, ihâl baka kha rizoia bu tak khah iât a, ki fasiara thun rangin he la be ta rong,’ a ti,” a ti a.

³¹Jisuan ṭongrikhek dang â sîr nôk a: “Rivân Ram chu min anṭam chi a chôi a, a loia a irthe angka hi a nit.

³²Amakhah chimu murdi lâia â chîntak a nit a; nikhomseh, a hong thuar tikin chu chimu danghei nêka â lian tak a nit ngai a. Thingkung a hong chang a; khanchu, chungavuang ivahei an hong a, â ṭangheiah ribu an siam ngai,” a ti a.

³³Jisuan ṭongrikhek dang â sîr nôk a: “Rivân Ram chu nupang khatkan chol a lâka, baidi her sômilikah neh a thoi riai mâka khamlua înripol angkah a nit,” a ti a.

³⁴Khahei murdi khah Jisuan lômpuihei ziangah ṭongrikhekin â sîr a, ṭongrikhek ninon chu an ziangah thu îte isîr mak a.

³⁵Kha a thona bi chu zânthla manga thu a lei îsîr: “An ziangah thu ke sîrin ṭongrikhek mang ki ta, Khuansiang ata thil rithup chu isîr pêk ki ti,” iti khah a hong tlung theina ranga a nit.

³⁶Jisuan lômpuihei khah iman, insungah a lût a, a kôilômhei an hong a, a ziangah, “Loia bu lem ṭongrikhek khah im a omzia ne ril ta,” an ti a.

³⁷Jisuan a sâm a, “Fachi ṭha rithetu khah Miriam Naipa hi a nit a, loi kha rammual hi a nit.

³⁸Chi ṭha khah Ram naihei an nit a, bu lem kha chu mi Suala naihei an nit; irâl, bu lem rithetu chu Diabola a nit.

³⁹Bu ât zoro chu rammual mong rang zoro a nit a, bu âttuhei khah vântirtônhei an nit.

⁴⁰Bu lemhei khah an ritik a, meia an ihâl angkan rammual mong tikah khan chu la om a ti.

⁴¹Miriam Naipa hin a vântirtônhei khah tir suak a ta, a Ram ata mihei suala inbâtuhei neh sual isintuhei murdi khah bûm an ta,

⁴²mei thi ngai inoah khan pai an ta, amakhan ṭap an ta, an rikam inritông an ti.

⁴³Khanungchu, Pathian mihei chu an Pa Ramah inî angkan vâr tâng an ti. Ringaina ranga ikuar inei kan chu iṭha takkan ringai riseh.

⁴⁴“Rivân Ram chu mi khatkan loi lâia richon phûm inrûk a mu suak a, a phûm nôk a, râiifân takkan a fe a, ai nei murdi a zuar a, kha loi khah a irchôk tâk angkah hi a nit.

⁴⁵“Rivân Ram chu mi khatkah lungilu ṭha tak izongtu angkah hi a nit nôk a;

⁴⁶ani khan lungilu ṭha tak khatkah a mu a; khanchu, a fe a, ai nei murdi a va zuar a, kha lungilu khah archôk tâk a.

⁴⁷“Rivân Ram chu inga mantuhein an lênkhang dîlah an zar a, inga chi tinrêng an iman angkah hi a nit nôk a.

⁴⁸Lên khah a sip tenan chu dîl rikamah an kâi isua a, amakhan an iṭhung a; â ṭha murdi chempâiah an thun a, â sia kah chu an pai a.

⁴⁹Rammual mong tikin chu khangkah khan la om a ti: vântirtônhei zuang suak an ta, mi ṭhahei lâia rithokin mi sualhei kha bûm an ta,

⁵⁰mei thi ngai inoah khan pai an ta, amakhan ṭap an ta, an rikam inritông an ti,” a ti a.

⁵¹Jisuan an ziangah, “Kha thilhei murdi khah nin riat thei im?” itin ardon a. Anni khan, “O, kin riat thei,” an ti a.

⁵²Ani khan an ziangah, “Kha omzia chu Dan inriseituhei murdi Rivân Ram kôilôm ichang kah chu, in ineitu, archon kok ata thil ilui neh thil ithar hong isapsuatu angkah hi a nit,” a ti a.

⁵³Jisuan kha ṭongrikhekhei khah â sîr zoiin chu kha mun khah a mâk a,

⁵⁴a omna ngai khua tiang a kîr nôk tâk a. Inkhôm inah khan anmani ân risei a; a thu sîr iria kan an ringai arkhêl tak tak a, “Hi mi hin hi vârna neh hi sinrikhêl sin theina hih taka rithoka ai mu mani?

⁵⁵Hi mi hih thingisin ngaitu naipa khah ni mak im a? A nu khom Mari khah ni mak im a? A urênghei khom Jakoba, Josefa, Simona neh Juda hei ni mak im a?

⁵⁶A farhei khom hintaka om ni mak im a? Hihei murdi hih taka rithoka ai mu mani?” an ti a.

⁵⁷Khanchu, ani khah an nel tâk a, Jisuan an ziangah, “Zânthla chu ama khua neh a insungmihei lâi ti no-ah chu mun tinah imaritin a om ngai,” a ti pêk a.

⁵⁸Khante, an iam no sikin kha khuaah khan chu sinrikhêl sin intam mak a.