Read Biete MATHAIA 14 Bible Online

MATHAIA 14 - Biete bible

MATHAIA 14

¹Kha zoro lâiah khan Galili rama rêng Heroda khan Jisua thurchi a lei riat a.

²A mihei ziangah, “Hi mi hih Baptistu Johana khah a nit ngêt; mithi lâi ata a hong iring nôk tâk a nit hih. Khasikin kêng hi sinrikhêl sin theina ritha hih ai nei,” a ti a.

³Matonah khan Herodan Johana khah a lei inman a, a khuap a, tâng inah a lei ikhum tâk a nit. Khangkana a thona bi chu a suapuipa Filipa nupui Herodi sika a nit.

⁴Baptistu Johana khan Heroda ziangah, “Herodi neh nin irnei hih idik mak e,” a lei ti pêk tâk a.

⁵Heroda khan Johana khah ithat a nuam a; nikhomseh, Johana kha zânthlan an be sikin Juda mipuihei lak kha a ṭi a.

⁶Khannisela, Heroda suak champhaphâk nin chu Herodi nainu khah mipuihei makungah a lâm a, Heroda khah ân lôm tak tak a;

⁷Herodi nainu ziangah ṭong ân kung a, “Îkhom ni ne ini kah chu nang ipeh rangin ṭong ker khâm,” a ti a.

⁸Khanchu, ani khan, a nu he be lam angkan, “Hi munah hin atûn khêngin Baptistu Johana lu ne peh roh,” a ti a.

⁹Rêng khah â lung dûk a tong tak tak a; nikhomseh, a khualmihei makungah ṭong a lei inkung tâk sikin a zong lam angkana tho rangin thu a pêk tâk a.

¹⁰Khanchu, mi a tir a, tâng ina om Johana lu khah ân tan tâk a.

¹¹A lu khah khêngin an hong chôi a, nungâktenu ziangah an pêk a, ani khan a nu ziangah a chôi tâk a.

¹²Khante, Johana kôilômhei kha an hong a, a ruak khah an chôi a, an phûm a; khanchu, an fe a, Jisua khom an isîr pêk tâk a.

¹³Khante, Jisuan Johana thurchi khah a lei riatin chu khataka rithokin a suak a, rikuangin a khât bangin mun infiarah a fe tâk a. Mipuihein an riatin chu an khuahei iman imuang tianga fen an zui a.

¹⁴Jisua rikuang ata a suak a, mipuihei khah a mun chu iṭha takkan lung ân kham a, dam inohei khah ân dam a.

¹⁵Kha nî kholoiah khan a kôilômhei an hong a, a ziangah, “Inî lak a zuang ikâi veng tâk a, hi mun lak hih mun infiar kêng a nit a, mipuihei hih infe tan la, khosungheiah fe sela, an fâk rang ngaitua riseh,” an ti a.

¹⁶Jisuan an ziangah, “An fe rang nang mak e, nangmani ngêiin ifah rang peh rei,” a ti a.

¹⁷Anni khan a ziangah, “Hin takah hin ibai ringakah neh inga inikah banah chu îte dang nei mang ung e,” itin an sâm a.

¹⁸Jisuan, “Hin ki ziangah hong chôi rei,” a ti a.

¹⁹Mipuihei khah loisûl chunga ṭhung rangin thu a pêk a; khanchu, ibai ringakah neh inga inikah khah a lâk a, rivân tiang ienin Pathian ziangah lômthu â sîr a. Ibai khah a khoi a, kôilômhei ziangah a pêk a, kôilômhei khan mipuihei ziangah an sêm pêk tâk a.

²⁰Mi tinin an fâk a, an khop seng tâk a. An sem bân khah an bûm a, khamlu sômleiinikah a lai sip a nit.

²¹A fahtuhei khah nupang neh naipang tep loiin mi sângringakah vêl an nit.

²²Khante, Jisuan mipuihei khah â ṭhîn lâiah khan dîl râl tianga lei ife rangin a kôilômhei khah rikuangah ân chuang a.

²³Mipuihei â ṭhîn zoiin chu a khâtin itlângah iṭongṭai rangin a fe a. Kholoi a hong zîng tenan khom amakhan Jisua chu a khât bangin a om a.

²⁴Kha zoroah khan rikuang khah dîlah, vakôla rithoka ilah takah a om tâk a, ithlîn a no tiang a sêm sikin tuirisokin kiangtiang kiangtiang â sok a.

²⁵Khanchu, zîng kôlrisam rang to vêlin chu Jisua kha tui chunga lônin, a kôilômhei tiang a hong a.

²⁶Kôilômhein tuia a hong lôn an mun chu an ṭi a, “Ithirthla kêng ai nit soh,” an ti a, rithlavâiin an ikhêk rak rak a.

²⁷Jisuan a hei isôn zel a, “Lungringam takkan om rei. Keimah kêng kî nit, ṭi no rei,” a ti a.

²⁸Khanungchu, Petera khan, “Pumapa, nangmah ni nit titakin chu tui chunga ni zianga hong rangin thu ne peh roh,” a ti a.

²⁹Jisuan, “Hong roh,” itin a sâm a. Khanchu, Petera khah rikuang ata a suak a, Jisua tiang ipanin tui chungah a lôn tâk a.

³⁰Khannisela, ithli rât khah a mun chu a ṭi a, tuiah rinîk rangin a om tâk a, “Pumapa nen zôk roh,” itin â khêk a.

³¹Jisuan a hei iban a, â tûk zel a, a ziangah, “Ni iamna a roi vang na! Ithôm nî ringla?” a ti pêk a.

³²An ruaikan rikuang sungah an lût a, ithli khom a dâidup zel tâk a.

³³Khanchu, rikuanga kôilôm iomhei khan Jisua chubai an ûn a, “Pathian Naipa ni nit titak hih,” an ti a.

³⁴Dîl râl an kâiin chu Genesaret ram an hong tlung tâk a.

³⁵Kha muna mihei khan Jisua kha an lei riat zel a. Khasikin, an kôlvêl ram murdiah khan mi an tir a, dam inohei murdi khah Jisua ziangah an hong ṭhui a.

³⁶Dam inohei khan a puan môr ilua intôn rangin an ngên a; â tôn murdi chu an dam tâk a.