Read Biete MATHAIA 15 Bible Online

MATHAIA 15 - Biete bible

MATHAIA 15

¹Khanungchu, Jerusalema rithokin Farisaihei neh Dân inriseituhei Jisua ziangah an hong a, a ziangah,

²“Ithôm ni kôilômhein ei pipu thumâkhei hih an zôm ngai no? Fâk an zong rang khomin ti lam angkan an kut risuh ngai mak e,” an ti a.

³Jisuan an ziangah, “Ithôm Pathian thupêk zôm loiin nangmani khâta thumâk khah nin izui hi?

⁴Pathianin, ‘Ni nu neh ni pa ngîk roh, tutu a nu manih, a pa manih, vâni sâm chu ithat rang a nit,’ a ti a.

⁵Khannisela, nangmanin chu ‘Tutu a nu manih, a pa manih ziangah ni ne mangna rang murdi kha Pathian ta tâk kêng ai nit, a tin chu a nu neh a pa a ngîk rang ni khâi mak,’ nin ti ngai a.

⁶Khangkah khan nangmani thumâk nin zôm theina rangin Pathian thupêk khah iten nin ibe ngai ino a nit.

⁷Nangni vârrilethei o, Isaian nin chungchâng a lei îsîr tâk khah â dik vang na!

⁸“‘Hi mihei hin an bâiin an nen pâk a, Nikhomseh, an lungril chu a ne ilat vit a nit.

⁹Ki dânhei angkah takin miriam thupêkhei an risei a, Khasikin, chubai an ne ûnna hih â tlong a nit, Pathianin a ti,’ itia a lei irziak kha,” a ti a.

¹⁰Khante, Jisuan mipuihei khah a koi a, an ziangah, “Ringai unla, rethiam rei.

¹¹Bâia lûtin miriam innim ngai mak a; bâia suakin kêng miriam a înnim ngai a nit,” a ti a.

¹²Khanungchu, a kôilômhei an hong a, a ziangah, “Ni ṭong khan Farisaihei lungril a îphop a nit iti ni riat im?” an ti a.

¹³Jisuan anni khah a sâm a, “Kung murdi ki Pa rivâna mi iphun nino chu iphâi paiin om a ti.

¹⁴An chungthu-ah nin ilung inbuai no rei. Anni khah mitdelhei ruaitu mitdel an nit a; mitdelin mitdel ngir â ruaiin chu an ruaikan khurah an iṭul ngai a nit,” a ti a.

¹⁵Peteran a ziangah, “Kha ṭong omzia khah ne rilfia pêk roh,” a ti a.

¹⁶Jisuan a ziangah, “Mi danghei nêkan la vâr ual ngir mak chei.

¹⁷Nin iriat thiam inôm ai nit? Bâia lût murdi chu phûngah a lût a; khanungchu, vâikôm fenaah ai suak nôk ngai a nit.

¹⁸Khanniseh, bâi ata hong isuak chu lungrila hong rithok a nit a, kha thilhei ngêi khah miriam innim ngai chu a nit.

¹⁹Lungrila rithokin ngaituanan sualhei a hong suak a, kha ngaituanan sualhei khan mi thatna hei, inrêna hei, riditna hei, inruna hei, mi lêmnahei neh Pathian isîrinsiatna hei a îthlun ngai a nit.

²⁰Khahei khah miriam innim ngai chu a nit. Khannisela, kut risuh loia fâk izong hin chu mi innim ngai mak e,” a ti a.

²¹Jisuan kha mun khah iman Tura neh Sidon khopui kôla ramhualah a fe tâk a.

²²Kha rama om, Kanan nupangnu khatkah a ziangah a hong a, “Davida Naipa, lung nen kham roh, ki nainu ramrilin a man a, denginthei takkan ai om a nit,” itin â khêk a.

²³Khannisela, Jisuan chu bâika luan sâm mak a. A kôilômhei a ziangah an hong a, “Hîm nu hih infe ta roh, ei inungah a ne zui a, â khêk diai a,” itin an ngên a.

²⁴Khanchu, Jisuan, “Israel mi, bera rimanghei ziang bangah kêng itir kî nit,” itin a sâm a.

²⁵Kha ṭong khah nupangnu khan a riatin chu a hong a, a ke bulah â bok a, “Epu, ne san roh,” a ti a.

²⁶Jisuan, “Naihei ibai ilah pêk a, uihei zianga pe chu idik mak e,” a ti a.

²⁷Nupangnu khan a ziangah, “Epu, inih chu a nit, khan uihei khomin an puhei dochama rithoka ibai zit iṭul chu an fâk ngai im ki ta,” itin a sâm a.

²⁸Kha tenan chu, Jisuan a ziangah, “Nupang, iamna liantak inei ni nit. Ni lungdo tak khah ni ta rangin isinin om a ti,” a ti pêk a. Khanchu, a nainu khah kha zoro takah khan a hong dam tâk a.

²⁹Khante, Jisua chu khantak ata khah a suak a, Galili dîl rikamah a fe a; itlângah a lui a, amakhan â ṭhung a.

³⁰Mipui itam takkah a ziangah an hong a, kebâihei, mitdelhei, fangisiahei, bâiiboihei neh dam ino dang itam takkah Jisua ke bulah an hong ṭhui a; ani khan a lei indam khai a.

³¹Mipuihei khan bâiiboi hong iṭonghei, fangisia hong idamhei, kebâi hong ilônhei neh mitdel hong imu thei tâkhei khah an mun chu an ringai arkhêl tak tak a; khanchu, Israelhei Pathian khah an inpâk tâk a.

³²Khante, Jisuan a kôilômhei khah a koi a, an ziangah, “Mipuihei hih sûn thumkah ki ziangah an om tâk a, atûnah hin îte ifah rang an nei no sikin ke lung a kham tak tak, bu ngeiin infe nuam mang e; khanonchu, lam lâiah ṭâmisôl rivoiin an rizal duai lôiin,” a ti a.

³³Kôilômhei khan a ziangah, “Hi dôra mipui vâi inkhop rangin hi ramchârah hin takâm fâk ei mu rang?” an ti a.

³⁴Jisuan, “Ibai izâkâm nin inei?” itin ardon a. Anni khan, “Ibai sarikah neh inga ichîntekah” an ti a.

³⁵Khanchu, Jisuan mipuihei khah rinênga ṭhung rangin thu a pêk a.

³⁶Khante, ibai sarikah neh inga ichîntekah khah a lâk a, Pathian ziangah lômthu â sîr a, a khoi a, kôilômhei ziangah a pêk a; kôilômhei khan mipuihei ziangah an pêk tâk a.

³⁷An rêngkan an fâk a, an khop seng a. Khanchu, kôilômhei khan an sem bân khah khamlu sarikah an la însip a nit.

³⁸Â fahtuhei khah nupang neh naipang tep loiin mi sângilikah an nit.

³⁹Khanungchu, Jisuan mipuihei â ṭhîn zoiin chu rikuangah a chuang a. Magadan [34] ramhual tiang a fe tâk a.