Read Biete MATHAIA 17 Bible Online

MATHAIA 17 - Biete bible

MATHAIA 17

¹Khante, sûn rukka nungah chu Jisuan Petera, Jakoba neh Johana hei a ṭhui a, an khât bangin itlâng risângah a fepui a.

²An mitmuah khan Jisua mêl a hong danglam a, a mêl inî angkan a hong vâr a, a puansilhei khom a hong vâr a, a hong ri-el tâk a.

³Khanchu, kôilôm ithumkahei khan Mosia neh Elija khan Jisua an risônpui lâi an mu a.

⁴Khante, Petera khan Jisua ziangah, “Pumapa, hintaka om hih ei ta rangin a ṭhat; ni nuamin chu dângdite ithumkah sin ki ti; nangma rang khatkah, Mosia rang khatkah, Elija rang khatkah,” a ti a.

⁵A la ṭong mai lâi takin sûm ivâr ri-elin anmani a zuang rikhû a. Sûma rithokin rôl khan, “Ani hih ki Naipa lungthlung, kî lôm tak takah chu a nit; ama thu hih ringai rei,” a ti a.

⁶Kôilômhei khan kha rôl khah an riat a, an ṭi tak tak a, rinêngah an ibok rak tâk a.

⁷Jisua a hong a, anni chu a tôn a, “Thoi rei, ṭi no rei,” a ti pêk a.

⁸Khanchu, an hang tang a, Jisua ti no chu tute a dang mu khâi mak a.

⁹Khanchu, itlâng ata an zuang ṭumin chu Jisuan an ziangah, “Miriam Naipa hih thina rithoka a thoinôk mâkah chu nin thil mu hih tute iril tlak no rei,” itin thu a pêk tâk a.

¹⁰Khante, kôilômhei khan Jisua ziangah, “Dân inriseituhein, ‘Elija ai zuang bak rang a nit,’ îtho sika an iti mani?” itin an ridon a.

¹¹Jisuan anni khah a sâm a, “A dik takkan Elija kha ai zuang bak rang a nit, thil tinrêng aman lei siam infel riai a ti.

¹²Khanniseh, nangni ke ril, Elija chu a zuang pial tâk a; mihein amah chu lei reh mak a, an nuam an lei ilo a nit. Khangkah ngirin Miriam Naipa khom hih an nuam an ilo rang a nit,” a ti a.

¹³Khanchu, kôilômhei khan Baptistu Johana thurchi an ziangah a îsîr a nit iti an riat tâk a.

¹⁴Khante, mipuihei ziangah an hong kîr nôkin chu mi khatkah Jisua ziangah a hong a, a makungah rikhûk a dil a,

¹⁵“Pumapa, ki naipa lunginkham roh; risengol rivoi a nit a, a tuang tak tak tâk a, voi itam takkah meiah neh tuiah â lîr tâk a.

¹⁶Ni kôilômhei ziangah ki hong ṭhui a; khanniseh, anni lakin indam thei mak a,” a ti a.

¹⁷Jisuan a sâm a, “Ingkana iamna boi rai im nin init tâk na! Itena sôt im nin zianga omin nangni ki ngaitua thei ranga? Naipang khah ki ziangah hong ṭhui rei,” a ti a.

¹⁸Jisuan ramrili khah thu a pêk a, naipangpa sung ata khah a suak tâk a; kha zoro takah khan a hong dam tâk a.

¹⁹Khanungchu, kôilômhei khah Jisua ziangah an hong a, “Itho sik im keimanin chu kin ûmisua thei no?” itin mi riat loiah an ridon zâi a.

²⁰Jisuan an ziangah, “Nin iamna roi sika a nit. Thu dik nangni ke ril, iamna anṭam ru tiakah nin neiin chu hi tlâng ziangah hin, ‘Hintaka rithokah hin son varthon roh,’ tîng nin ta, rithon zel a ti. Sin thei ino zel îte nei no tin u.

²¹Hingkana hi chu ṭongṭaina neh bu ngei ti non chu îten ûmisua thei mak e,” a ti a.

²²Kôilômhei khah an rêngkan Galili ramah an hong nungah khan Jisuan an ziangah, “Miriam Naipa hih miriamhei kutah inmanin om a ta,

²³anni khan that an ta; nikhomseh, sûn thumka nungah chu kâiithoiin om a ti,” a ti a. Khanchu, kôilômhei kha an bei a dong tak tak a.

²⁴Jisua neh a kôilômhei kha Kapernaum an hong tlungin chu Tempil siadôltuhei khah Petera ziangah an hong a, “Nangni inriseitu hin Tempil sia[36] a chôi ngai im?” itin an ridon a.

²⁵Petera khan, “O, a chôi ngai,” itin a sâm a. Petera khah in a lûtin chu Jisuan a lei isôn a, “Simon im ner ngai dân? Hi rammuala rênghei ziangah hin tûm sia chôi ngai? A ram mihei im, ram dang mihei im?” a ti a.

²⁶Peteran, “Ram dang mihei” itin a sâm a. Jisuan, “A nitin chu a ram mihei chu sia an chôi ai nang ino a nit khate.

²⁷Nikhomseh, hi mihei lung inhoi ino hih nuam mang me. Khasikin, dîlah fen la, rikuai va chia roh. Inga nî man masatak bâiah khan ei ruaika Tempil sia ei chôi inrup bang sum tangka inikah mûng ni ti. Amakhah hong chôi inla, ei chôitum khah an ziangah peh roh,” a ti a.