Read Biete MATHAIA 18 Bible Online

MATHAIA 18 - Biete bible

MATHAIA 18

¹Kha lâiah khan kôilômhei khah Jisua ziangah an hong a, “Rivân Ramah tûm â roinpui rang tak?” itin an ridon a.

²Khanchu, Jisuan naipangte a koi a, an makungah ân ding a, an ziangah,

³“Thu dik nangni ke ril, nin rilet a, naipangtehei angkan nin om non chu Rivân Ramah lût tlak no tin u.

⁴Rivân Rama â roinpui rang tak chu ringaiinchîna, hi naipangte angkana om hih a nit.

⁵Tutu ker ming sika hingkana naipangte lôm chu keima ne lôm an nit.

⁶“Tukhomin hi ne iamhei lâia naipangte khatkah khom hih ân ban chu a ringah bunôilung ilianpa inlin tuikhanglian inthûk takah iṭhul ni sela a ta rangin ṭha ual a ti.

⁷Ibânahei sikin rammual chung ân khôk vang na! Ibânahei chu om mai a ti; khannisela, ibâna in-omtu chung chu an khôk vang na!

⁸“Ni kutin manih, ni ken manih, nang ân bân chu tan pai inla, pai zel roh; kut inika manih, ke inika manih ineia kumtluang meidîla nang ipai nêkan chu kut iboi manih, ke boi manih puma ringnaa lût chu ni ta rangin a ṭhat ual.

⁹Ni mit khomin nang ân bân chu ikhel pai inla, pai zel roh; mit inika neia dûkmun meidîla nang ipai nêkan chu mit khatkah bang ineia ringnaa lût chu ni ta rangin a ṭhat ual.

¹⁰“Hi mi chîntehei lâia khatkah khom hih musit loi rangin ridîn rei. Rivâna an vântirtônhei kha ki Pa rivâna makungah an om mai ngai iti nangni ke ril.

¹¹Miriam Naipa hih armanghei izonga saninring rang piala zuang a nit.

¹²“Mi khatkan bera rizakah nei sela, an lâia khatkah rimang sela, ingkam tho sela nin iam? Sômikuakkah ikuakkahei khah itlâng panga bûmin mâng a ta; khanchu, fêng a ta, armang khah va zong a ti.

¹³Thu dik nangni ke ril, a va mun chu sômikuakkah ikuakkah armang inohei nêkah khan kha khatka chungah khan lôm ual a ti.

¹⁴Khangkah ngirin, hi mi chîntehei lâia khatka rimang khom hih nin Pa rivâna mi khan ai nuam ino a nit.

¹⁵“Ni suapuiin ni chungah thil isual a sinin chu fen la, â châina khah inmun la, idâirek kan nin ruaikah bang riatah iril roh. Ni ṭong arngaiin chu ni suapui khah ni înê nôk nîng a ti.

¹⁶Khanniseh, ni ṭong arngai non chu mi dang khatka manih, inika manih ṭhui sa roh; khanchu, Pathian Thubûn ai ti angkan ni ṭong murdi khah riatpuitu mi inika manih, ithumka manih bâia indet ni thei a ti.

¹⁷Khante, an ṭong khom arngai non chu thil tinrêng koindanghei ziangah ithlun roh. A nungkhôn takah koindang ṭong khom arngai nuam non chu kha mi khah chu sanong angkan manih, siadôltu angkan manih be roh.

¹⁸“Thudik nangni ke ril, rinêng chunga nin ikhuap[37] kah rivânah ikhuap nîng a ta, rinêng chunga nin isût kah rivânah khom isût nîng a ti.

¹⁹“Thu dik nangni ke ril; rinêng chungah hin nin lâia mi inikah lung inrual takka îthu-ah khom an ṭongṭaiin chu, ki Pa rivâna min nangni sin pêk a ti.

²⁰Mi inika manih, ithumka manih ker minga an ribûmna kipah an lâiah kî om ngai a nit,” a ti a.

²¹Khanungchu, Petera khah Jisua ziangah a hong a, “Pumapa, ki suapuiin ki chungah thil thonsual mai sela, voi izâkâm ke zâ rang? Voi sarika tenâm ai nit rang?” itin ardon a.

²²Jisuan a ziangah, “Voi sarika tenah ni mak, voi sari mun sômsarika tenah a nit.

²³“Khasikah khan Rivân Ram chu rêng khatkah â somhei zianga sum chungchâng infel itumtu neh inrikhek a nit.

²⁴Khante, hang eninfel a phut kaneh chu mi khatkah talent sîngka ribâng a ziangah an hong ṭhui a.

²⁵Kha som khan tuakna rang a nei no sikin rêng khan amah neh a nupui neh a naihei neh ai nei murdi izuar a, a lâkai ituak rangin thu a pêk a.

²⁶Khanchu, isom khan rêng makungah rikhûk idilin â bok a, ‘Ki chungah ner ngai lân sôt inla, a rêngkan nang tuak khai ki ti,’ itin a ngên a.

²⁷Rêng khan lung ân kham a; khanchu, a lâkai kha a zâ riai a, â thla tâk a.

²⁸“Khanchu, kha mi khah a fe a, â som champuihei lâia khatkah, a duli [38] rizaka ribâng a va mu a, a man a, a ring â râk pêk a, ‘Ni lâkai kha ne tuak ta roh,’ a ti a.

²⁹Kha â som champui khah â bok a, ‘Ki chungah ner ngai lân sôt inla, nang tuak ki ti,’ itin a ngên a.

³⁰Khannisela, nuam mak a, a lâkai a tuak mâkah tâng inah a khum tâk a.

³¹Khante, isom danghein a sintho dân khah an mun an ringai a siat a; rêng ziangah an fe a, thil tinrêng an va sîr pêk a.

³²Khanchu, rêng khan isom khah a koi a, a ziangah, ‘Isom mangmunboi, ni ner phat sikin ni lâkai murdi nang ki îzâ a nit kha.

³³Lung nang ki înkham angkan nang khomin ne som champui lung nen kham rang kêng ai nit,’ a ti a.

³⁴Rêng khah a ning a thik tak tak a; khanchu, a lâkai a tuak zoi mâkah chu kha som khah kuttum itho rangin tâng inah a khum tâk a,” a ti a.

³⁵Khante, Jisuan, “Mi tinin nin lungril takin nin suapui nin izâ non chu ki Pa rivâna mi khomin khangkah ngirah khan nin chungah thông a ti,” itin a ṭong ân mong tâk a.