Read Biete MATHAIA 19 Bible Online

MATHAIA 19 - Biete bible

MATHAIA 19

¹Jisuan kha thu khah â sîr zoiin chu Galili ram ata a suak a, Jordan râla Judai ramah khan a fe tâk a.

²Mipui itam takkan an zui a, kha munah khan anmani ân dam a.

³Farisai ṭhenkahei a ziangah an hong a, amah in-ôk itumin, “Îsik khomin mîn a nupui ai mâk hih arthiang im?” itin an ridon a.

⁴Jisuan an ziangah, “A tîr ata Siamtu khan nupang neh ipa a siam a, Pathian Thubûn ai ti khah nin itep ngai ino mani?

⁵Khabanah, Pathianin, ‘Hi sikah hin ipan a nu neh a pa mâng a ta, a nupui neh inrual an ti; khanchu, an ruaikan takpum khatkah hong ni tâng an ti,’ ai ti a nit.

⁶Khasikin, mi inikah ni khâi mak a, takpum khatkah an init tâk a nit. Pathianin a irzom tâk chu miriamin an ṭhen rang ni tlak mak e,” itin a sâm a.

⁷Farisaihei khan a ziangah, “Khate, ithôm Mosian ipan rimâkna lekha riziakin a nupui a pêkin chu rimâk ai phal ngai?” an ti a.

⁸Jisuan an ziangah, “Mosian nin nupuihei imah rangin nangni a phalna chu nin lungril khir sika a nit. Khannisela, a tîrah khan chu khangkan ni mak e.

⁹Keiman chu nangni kî ti a nit, tukhom a nupui iamomnona sik ni loia a nupui ima a, nupui dang inei nôk chu a înrê a nit,” a ti a.

¹⁰A kôilômhein a ziangah, “Sangram kârvân chungchângah khangkah khan a nitin chu rinei ino a ṭhat ual,” an ti a.

¹¹Jisuan an ziangah, “Hi inriseina thu hih mi tin chunga mang thei ni mak a, Pathianin ai pêkhei chungah bang imang nîng a ti.

¹²Ipan nupui a nei nona bi chu itam takkah a om; ṭhenkah chu nei ino rang piala suak an om a; ṭhenkah chu khangkana ranga miriamin an isiam khom an om a; ṭhenkah chu Rivân Ram sikin an inei ino a nit. Tukhom hi inriseina thu zôm thei kan chu zôm riseh” a ti a.

¹³Khante, kha lâiah khan Jisuan an chungah kut ringata a ṭongṭai pêk theina rangin mi ṭhenkan naipangtehei a ziangah an hong ṭhui a; nikhomseh, kôilômhein an lei ngo a.

¹⁴Jisuan an ziangah, “Naipangtehei ki ziangah inhong unla, khap no rei, Rivân Ram chu hingkana mihei ta kêng ai nit,” a ti a.

¹⁵An chungah a kut arngat a; khanchu, khantak ata khah a fe tâk a.

¹⁶Voikata chu mi khatkah Jisua ziangah a hong a, “Minriseitu,[39] kumtluang ringna ki nei theina rangin im sin iṭha ki sin rang?” a ti a.

¹⁷Jisuan, “Ithôm iṭha thurchi ni ne irdon? Iṭha chu mi khatkah bang kêng â om.[40] Ringnaa lût ni nuamin chu thupêkhei zôm roh,” itin a sâm a.

¹⁸Ani khan, “Thupêk a îtak im?” itin ardôn a. Jisuan a sâm a, “Mi that no roh; inrê no roh; iruh no roh; milakin mi nô no roh;

¹⁹ni nu neh ni pa ngîk roh; khabanah nangmah lung ni irthlung angkan ni bungahei lungthlung roh, itihei hih,” a ti a.

²⁰Tlangvâl khan a ziangah, “Kha thupêkhei murdi kha chu ki zôm riai ngai. Im ki sintum rang la om?” a ti a.

²¹Jisuan a ziangah, “Ṭhat rikipa om ni nuamin chu fen la, nî nei murdi zuar inla, a sum khah inrianghei ziangah peh roh; khanchu, rivânah richon nei ni ti; khanungchu, hong inla, ne hong zui roh,” a ti a.

²²Tlangvâl khan kha ṭong khah a riatin chu ngaiinseh takkan a rot tâk a, miriam richong tak a nit a.

²³Khante, Jisuan a kôilômhei ziangah, “Thu dik nangni ke ril; richonghei ta rangin Rivân Rama lût chu a întak ok rang a nit.

²⁴Nangni ke ril nôk, richong Pathian rama lût nêkan chu iṭhim ikuara saringsei ilût ol ual a ti,” a ti a.

²⁵Kha ṭong khah kôilômhein an riatin chu an ringai arkhêl tak tak a, “Khate, tûm inring inih thei ranga?” itin an ridon a.

²⁶Jisuan anmani a en ngit a, an ziangah, “Amakhah miriam rangin chu ithei ni mak a, Pathian rangin chu ithei a nit,” a ti a.

²⁷Khanchu, Peteran a ziangah, “En ta, keimanin îtinrêng imah riaiin nang kin zui a, im kin mu rang tâk?” a ti a.

²⁸Jisuan an ziangah, “Thu dik nangni ke ril; Siamtharnaah[41] khan Miriam Naipa a rêngṭhungmun roinpui takah â ṭhung tikin chu nangmani ne zuitu Sômleiinikahei khom hih rêngṭhungmunheiah iṭhung nin ta, Israel nam sômlei nam inikahei chungah roi rêl nin ti.

²⁹Tutu ker ming sika inhei manih, inzirpuihei manih, farhei manih, pa manih, nu manih, naihei manih, loihei manih ima kan chu a bâk rizakah [42] mûng an ta, kumtluang ringna khom dong sâng an ti.

³⁰Khanniseh, atûna nungita taka omhei khom mâsa tak la nîng an ta, mâsa taka omhei khom nungita tak la nîng an ti.