Read Biete MATHAIA 2 Bible Online

MATHAIA 2 - Biete bible

MATHAIA 2

¹Rêng Heroda inlal lâiin Judai rama Bethlehemah Jisua a zuang suak a. A suak zoi kaneh chu ârsi thu risei ngai mi vârhei khosak tianga rithokin Jerusalemah an hong a.

²“Takâm Judahei rêng rang naite zuang isuak kha? Khosak tiang a ârsi [2] kin mu a, amah chubai iûn rangin kin ihong a nit,” an ti a.

³Kha thu khah Rêng Herodan a riatin chu â lung ân zîng a, Jerusalema mi murdi khom an ilung a zîng a.

⁴Khanchu, thiampu lalhei neh Dân inriseituhei murdi a koi bûm a, an ziangah, “Takâm Mesia ai suak rang?” itin ardon a.

⁵Khante, anni khan a ziangah, “Judai rama Bethlehemah. Zânthlan hingka hin a lei riziak:

⁶“‘Nangmah Judai rama Bethlehem, Judai ram khopuihei lâiah â chîntak ni tlak mak che; Ni sunga rithokin ruaitu a lai suak rang a nit, Ki mi Israelhei iruai rangtu khah,’ iti hi,” itin an sâm a.

⁷Khanchu, Herodan mi vârhei khah a koi a, ârsi lang zoro khah inrûkkan ardon infel a.

⁸Khanungchu, hi ṭong hih iben anni khah Bethlehemah ân fe a, “Fe unla, naite khah iṭha takkan zong suak unla, kei khomin ife a, amah chubai ki ûn theina rangin nin mu kaneh chu ne hong iril nôk rei,” a ti a.

⁹Khangkan, an fe tâk a, lampuiah chu khosak tianga ârsi an imu ngir khah an mu nôk tâk a. Ârsi khah an mun chu an râi a fân a, an lôm tak tak a. Ârsi khah naite omna chung ridîn a tlung mâkah chu an matonah a fe mai a.

¹¹Insungah an va lût a, a nu Mari zianga naite khah an mu a, rikhûk idilin chubai an ûn tâk a. Khanchu, an thilpêk hong chôi: rângkachak hei, bero hei neh Mura hei khah a ziangah an pêk tâk a.

¹²Khante, Heroda ziang tiang kîr nôk khâi loi rangin an rimangah Pathianin â ril sikin lampui dangah an ram tiang an fe nôk tâk a.

¹³Khante, anni khah an fe zoi nungah khan Pumapa vântirtôn khatkah Josefa ziangah rimangin ân lâr a, a ziangah, “Herodan naite hi ithat rangin ai zong rang a nit; khasikin, thoi inla, naite neh a nu ṭhui inla, Aigupta ramah ropui roh. Hong ikîr ranga nang ke ril mâkah chu amakhan om mai roh,” a ti a.

¹⁴Khanchu, Josefa khah a thoi a, naite neh a nu khah a ṭhui a, kha zân zelah khan Aigupta ramah an fe tâk a.

¹⁵Heroda thi mâkah chu amakhan an om mai tâk a. Pumapan Zânthla bâia, “Ki Naipa chu Aigupta ram ata ki koi isua a,” itia a lei îsîr khah a hong tlung idikna rangin amakhah a hong iom a nit.

¹⁶Khante, Herodan khosak tianga mi vârhei khan an lêm iti a riat kaneh chu a ning a thik tak tak tâk a. Mi vârhei zianga rithoka ârsi lang zoro ai riat dungizuiin Bethlehem neh a kôlvêla naiipa kum inikah ten nuai tianga rêng rêng chu ithat vang rangin thu a pêk tâk a.

¹⁷Zânthla Jeremian a lei îsîr:

¹⁸“Rama khuah khêk irî an riat a, Lung iseh takka ṭap irî khah; Rakilin a naihei a ṭâ a, An om khâi no sikin â lungringam thei khâi mak e,” iti khah a hong itlung tâk a nit.

¹⁹Khante, Heroda khah a thi tenan chu Pumapa vântirtôn khatkah Aigupta ramah khan Josefa ziangah rimangin ân lâr a,

²⁰a ziangah, “Thoi inla, naite neh a nu ṭhui inla, Israel ramah kîr nôk ta roh, naite that itumhei khah an thi tâk,” a ti a.

²¹Khanchu, Josefa khah a thoi a, naite neh a nu kha a ṭhuia Israel ramah a fe nôk tâk a.

²²Khannisela, Arkelausa khah a pa Heroda thûlin Judai ramah rêng a chang iti Josefan a riatin chu khantaka fe khah a ṭi a. Khante, armangah irilin a om nôk a, Galili ram tiang a fe tâk a.

²³Khua khatkah, Nazaret an iti-ah khan a va om tâk a. Zânthlan, “Ani khah Nazaret mi tîng an ti,” itia a lei îsîr khah a hong itlung tâk a nit.