Read Biete MATHAIA 20 Bible Online

MATHAIA 20 - Biete bible

MATHAIA 20

¹“Rivân Ram chu mi khatkan a grep rikula sinthotu rang mi zonga zîng renga suak angkah kha a nit.

²Ani khan sinithotuhei khah a sûnah dulika lo rangin ân rifûkpui a; khanchu, a grep rikula sin rangin a tir tâk a.

³Khante, zîng dâr ikuakkan bazâr munah a fe nôk a, nuam idinga ding mihei a va mu a;

⁴an ziangah, ‘Nangni khom fe unla, grep rikulah va sin unla, thalo chu arhoi lamin nangni pêng ki ti,’ a ti a.

⁵Khanchu, an fe tâk a. Khanungah khan sûn lâiah neh kholoi dâr ithumkan khom a suak a, khangkah ngirin a tho a.

⁶Kholoi dâr ringakah vêlin bazâr munah a va fe nôk a, mi ṭhenkah îte sin loia ding ṭian a va mu nôk a, an ziangah, ‘Ithôm îte sin loia hi munah hin sûn nin îhek?’ itin ardon a.

⁷Anni khan a ziangah, ‘Tute lakin nen rilo mak a,’ itin an sâm a. Khanchu, ani khan an ziangah, ‘Nangni khom fe unla, ki grep rikulah va sin rei,’ a ti pêk a.

⁸“Kholoi a hong nitin chu a chongpu khan a grep rikul enkoltu ziangah, ‘Sinthotuhei khah koi inla, nungita taka phutin a mâsa tak idênin an thalo peh roh,’ a ti a.

⁹Kholoi dâr ringaka sin ikophei khah an hong a, dulikah chit ipe an nit a.

¹⁰Khanchu, masataka sin ikophei khah an hong a, dong intam ual rangin an sabei a; nikhomsela, anni khom dulikah chit ipe an nit a.

¹¹An thalo khah an hang lâkin chu a chongpu chungah an riphun tâk a.

¹²‘Hi a nungkhôn taka sin ikophei hi chu dârkâr khatkah bang an isin a nit a, keimani inî lum ituanga sûntluana sin ithohei ni ne pêk dôrkah ngir anni khom ni pêk a,’ an ti a.

¹³“A chongpu khan an lâia khatka ziangah, ‘Ringai ta, mala, nang lêm mang e; a sûnah duli lo ranga ni îpom a nit.

¹⁴Atûn ni thalo khah lan la, ni inah fe roh. Nangmah nang ki pêk dôrkah khah hi a nungkhôn taka sin ikoptuhei khom hih ki pêk nuam a nit.

¹⁵Ki sum chu ki ti lam takka mang rangin richam nei mang im a? Anitnole, ki tikthlâi sikin nî narsa [43] mani?’ a ti pêk a.

¹⁶Khaangkan a nungkhôn takhei khah a mâsa tak la chang an ta, a mâsa takhei khah a nungkhôn tak la chang an ti,” a ti a.

¹⁷Khante, Jisua Jerusalemah a hang fe lâiin, kôilôm Sômleiinikahei khah an khâtin a ṭhui a, lampuiah chu inrûkkan an ziangah,

¹⁸“Ringai ta u, Jerusalemah ei ife rang a nit a, amakhan Miriam Naipa hih thiampu lalhei neh Dân inriseituhei kutah inmanin om a ti. Ithi rangin a chungah thu rêl an ta,

¹⁹Jentailhei kutah pêng an ta, anni khan nuiza siamnan mang an ta, hêm an ta, krosah hêmde an ti; nikhomseh, sûn thumka nungah chu kâiithoiin om a ti,” a ti a.

²⁰Khanungchu, Jebedaia nupui khah a naiipa inikahei hong iṭhuiin Jisua ziangah a hong a, chibai a ûn a, lungkhamna a ngên a.

²¹Jisuan a ziangah, “Im nî nuam?” itin ardon a. Ani khan, “Hi ki naiipa inikahei hih ni ramah, ne changtiang khatkah, ne voitiang khatkah inṭhung rangin ṭong nen kung pêk roh,” a ti a.

²²Jisuan a sâm a, “Nin thil ngên hih nin iriat ino a nit. Tuangna kilât ki in rang hih nin iin thei rang mani?” a ti a. Anni khan, “O, in thei kin ti,” itin an sâm a.

²³Jisuan an ziangah, “Ki kilât chu in thei nin ti; khanniseh, tûm ke changtiang neh ke voitianga ṭhung rang chu keima zen rang ni mak e. Kha munhei kha chu ki Pa inrifûkpêkhei ta rang a nit,” a ti a.

²⁴Kôilôm sômkahei khan kha thu khah an riatin chu urnaikahei chungah khan an ning a thik tâk a.

²⁵Khanchu, Jisuan an rêngkan a koibûm a, an ziangah, “Jentailhei chunga roirêltuhei chu an inlal tak tak ngai a, an ruaituhei khom an chungah richam an nei tak tak ngai iti nin riat.

²⁶Khanniseh, nangmani lâiah chu khangkah khan a nit rang ni mak e. Nin lâia tukhomin mi lian ini a nuamin chu nin isom a nit bak ngêt rang a nit.

²⁷Khabanah, nin lâia tukhomin a mâsa tak ini a nuamin chu nin suak a chang bak ngêt rang a nit.

²⁸Miriam Naipa lua khom hi mîn a sin an itho pêk ranga zuang ni mak a, mi sin itho pêk rang neh mi itam takka ritlanna ranga a ringna peh rangin ai zuang a nit,” a ti a.

²⁹Jisua neh a kôilômhei khah Jerikoa rithoka an suak lâiin mipui itam takkan an zui a.

³⁰Mitdel inikah lampui kôla ṭhunghei khan Jisua a hong iti an riat kaneh chu, “Davida Naipa, lung nen kham roh,” itin an ikhêk a.

³¹Mipuihei khan idâirek rangin an ngo a. Nikhomseh, anni khan, “Davida Naipa, lung nen kham roh,” itin an ikhêk ual ual a.

³²Jisua khah a ngîr a, kha mitdelhei khah a koi a, “Im nangni ki tho pêk ranga nin inuam?” itin ardon a.

³³Anni khan a ziangah, “Pumapa, mit vârna kin inuam a nit,” itin an sâm a.

³⁴Khanchu, Jisuan lung ân kham tak tak a, an mithei a tôn pêk a; khanchu, voikazelin an mu thei a, amah an zui tâk a.