Read Biete MATHAIA 21 Bible Online

MATHAIA 21 - Biete bible

MATHAIA 21

¹Khante, Jisua neh a kôilômhei khah Jerusalem an hong nâi tâk a, Oliv tlânga Bethfage khua an hong tlungin chu Jisuan a kôilômhei lâia mi inikah a tir a,

²an ziangah, “Nin matona khuah sôn fe unla, sakuartung, a kôla a te neh rithlung mu zel nin ti. Sût unla, ki ziangah hong kâi rei.

³Mi tukhomin nin ziangah imanih an ti le khom, ‘Pumapan[44] ai nang a nit,’ ti pêk unla; khanchu, nangni infe zel a ti,” a ti a.

⁴Zânthla bâia a îsîr khah a hong tlung idik theina ranga amakhah a hong iom a nit:

⁵“Zion nainu chu iril roh, En ta, ni Rêng khah ni ziangah a hong e, Ringaiichîn takkan sakuartung chungah, Sakuartungte chung le lea chuangin, Ni ziangah ai hong a nit,” iti thu hih.

⁶Khanchu, kôilômhei khah an va fe a, Jisuan he a be lam takkan an va tho a.

⁷Sakuartung neh a te khah an hong kâi a, an chungah khan an puanhei an dâp a, Jisua chu a chuang tâk a.

⁸Mipui itam takkan lampuiah an puanhei an dâp a; mi dangin sôl an sât a, lampuiah khan an dâp a.

⁹Mipui Jisua maton tianga fehei neh â nungtianga zuihei khan, “Davida Naipa ziangah, Hosana, Pumapa riminga zuang chu inpâkin om riseh; Chungnung takah khin Hosana,” itin an ikhêk a.

¹⁰Jisua kha Jerusalem a hong lûtin chu a kho pum rengin, “Hi mi hih tûm ai nit?” itin an châng sêp a.

¹¹Mipuihei khan, “Hi mi hih Zânthla Jisua, Galili rama Nazaret mi a nit,” an ti a.

¹²Jisua khah Tempilah a lût a, Tempil sunga itika zuarhei neh richohei murdi a ûmisua riai a. Sum ithlenghei docham neh pharvali zuarhei ṭhungmunhei khah a nam inlîr pêk a;

¹³an ziangah, “Pathian Thubu-ah, ‘Ki in chu ṭongṭaina in tîng an ti,’ iti riziak a nit. Khanniseh, nangmanin chu inruhei ipûkin kêng nin isiam tâk a nit hih,” a ti a.

¹⁴Tempilah khan mitdelhei neh kebâihei a ziangah an hong a, a lei indam a.

¹⁵Thiampu lalhei neh Dân inriseituhein sinrikhêl ai sinhei neh Tempila, “Davida Naipa ziangah Hosana,” itia naipanghei ikhêk khah an mun chu an ning a thik tâk a.

¹⁶Khanchu, Jisua ziangah, “Hi mihei iti hih ni riat im?” itin an ridon a. Jisuan an ziangah, “O, ki riat, ‘Naipanghei neh naitesenhei bâia suak khan inpâkna nen rikip tâk,’ iti hih nin lai tep tlak ngai ino mani?” itin a sâm a.

¹⁷Khanchu, Jisuan anni khah a mâk a, Bethaniah a fe a, amakhan a riak tâk a.

¹⁸Khante, atûk zîngah khopui tiang a kîr nôk lâiin Jisua chu a von a hong ṭâm tâk a.

¹⁹Lam penah theichâng kung a hei mu a, a va pan a; nikhomseh, a nâhei banah chu îte mu mak a. Khanchu, theichâng kung ziangah khan, “Kumkhuakan irâ tlak khâi no roh,” a ti pêk a. Voikazelin theichâng kung khah a hong thêm tâk a.

²⁰Kôilômhein amakhah an mu a, an ringai arkhêl tak tak a, “Ingkan im theichâng kung hih a thêm zel tâk tlia?” itin an ridon a.

²¹Jisuan an ziangah, “Thu dik nangni ke ril, ringlana nei viat loia iamna nin neiin chu hi theichâng kung chunga kî tho angkah hin tho thei nin ti. Khah bang khah ni loiin hi tlâng ziangah khom, ‘Rithon inla, tuikhanglianah ripaih roh,’ ti unla, ripai zel a ti.

²²Tinrêng, iiam puma ṭongṭaia nin ini kah chu mûng nin ti,” a ti a.

²³Jisua khah Tempilah a hong nôk a; ân risei lâiin thiampu lalhei neh upahei khah an hong a, a ziangah, “Tu richamin im hihei hih nî sin? Tûm richamneina nang ipe?” an ti a.

²⁴Jisuan an ziangah, “Kei khomin thu khatkah nangni lei ridon rong, nin ne sâm theiin chu tu richamin im hihei hih kî sin nangni ril ki ti.

²⁵Johana Baptisma khah taka rithoka richam neina mani? Pathiana rithok im, miriama rithok im?” a ti a. An khâtin an risêl tâk a, “Im ei ti rang tâk? ‘Pathiana rithok,’ ei tin teh, ‘Khateh, ithôm Johana khah nin iam no?’ ne tîng a ta.

²⁶‘Miriama rithok’ ei ti lakin mipuihei iṭi an om a, Johana khah mi murdîn zânthlan an ibe a nit a,” an ti a.

²⁷Khanchu, Jisua ziangah, “Reh mang ung e,” itin an sâm a. Jisuan an ziangah, “Kei khomin tu richama hihei hih kî sin manih nangni ril ual no ning e,” a ti a.

²⁸Jisuan, “A nitin teh, nangmanin ingkan im nin ringai? Tianah khan mi khatkan naiipa inikah a nei a. A nai ulianpu ziangah a va fe a, ‘Ki naipa, vuani chu grep rikulah fen la, sin va tho roh,’ a ti a.

²⁹Ani khan, ‘Nuam mang e,’ itin a sâm a. Nikhomsela, nungah chu a lunginṭong a thleng a, a fe tâk a.

³⁰Khanchu, khatka ziangah khom a fe a, khangkah ngirin a va ti a. Ani khan, ‘O epa, fêng ki ti,’ a ti a. Khanniseh, fe ual mak a.

³¹Kha mi inikahei khah a tukhôk im an pa nuam lam isin ual?” a ti a. Anni khan a ziangah, “A ulianpu khan,” an ti a. Jisuan an ziangah, “Thu dik nangni ke ril; siadôltuhei neh nochizuarhei khan Pathian Rama lût nangni an ikhêl tâk a nit hi.

³²Baptistu Johana khan lampui dik nin zui rang nangni inmu a zuang a, ani khah lei iam mak chei a; siadôltuhei neh nochizuarhei khan chu an lei iiam a nit. Nangmani chu nin mu nung khomin nin lunginṭong ithlengin amah iam mak chei.

³³“Ṭongrikhek dang ringai nôk rei. Ram chongpu khatkah a om a, kha mi khan grep bil a siam a, idâiin arkul a, grep sômkhur a choih a, a ngâkna in risâng a sin a. Khanchu, grep rikul khah enkoltuhei kuta bângin ram dangah ân zin tâk a.

³⁴Grep irâ rimal zoro a hong tlungin chu â enkoltuhei ziangah khan dongtum va lah rangin a suakhei a tir a.

³⁵Theibil enkoltuhei khan a suakhei khah an lei man a, khatkah an itôk bit a, khatkah an that a, khatkah lungin an dêng a.

³⁶Khante, suak dang, a masa nêka tam ualin a tir nôk a; anni khom khah khangkah ngirah khan an lei tho a.

³⁷A nungkhôn takah chu, ‘Ki naipa hi chu lei marit ngêt an ti,’ itin a naipa a tir tâk a.

³⁸Khannisela, theibil enkoltuhei khan a naipa khah an lei mu kaneh, ‘Hi mi hih a chongpu naipa chu a nit. Hong rei, lei that rei u, archon lua rang hi ei donga rang,’ an ti a.

³⁹Khanchu, ani khah an man a, grep rikul putiang an pai a, an that tâk a.

⁴⁰Khante, grep rikul ineitu khah a hong tikin, kha theibil enkoltuhei khah im lo tâng a ti?” itin ardon a.

⁴¹Anni khan a ziangah, “Kha mi sualhei khah that a ta, grep rikul khah â enkoltu dang, â râ rimal zoro kipa a dongtum â peh ngai rangtuhei ziangah pêng a ti,” an ti a.

⁴²Jisuan an ziangah, “Pathian Thubu-ah, “‘In insintuhein lung an ipai mangmunboia an ibe khah, Â kila lung kâmiom tak a chang tâk. Amakhah Pumapa itho a nit a; Ei mitmuah hin a irkhêl a nit, iti riziak khah nin itep ngai ino mani?’

⁴³“Khasikin, nangni ke ril; Pathian ram chu nin ziang ata ila nîng a ta, irâ sua rang mihei ziangah ipe nîng a ti.

⁴⁴Tutu kha lung chunga bâ kah chu rinôi an ta, kha lungin ai del vâng chu rinôi indîchit an ti,” a ti a.

⁴⁵Thiampu lalhei neh Farisaihei khan Jisua ṭongrikhek isîrhei khah an riatin anmani chungthu a îsîr a nit iti an riat tâk a.

⁴⁶Khasikin, iman an tum a; nikhomseh, mipuihei khah an ṭi a, mipuihei lak khan Jisua khah zânthlan an ibe a nit a.