Read Biete MATHAIA 22 Bible Online

MATHAIA 22 - Biete bible

MATHAIA 22

¹Jisuan mipuihei ziangah ṭongrikhekin thu â sîr nôk a,

²“Rivân Ram chu rêng khatkan a naipa ta ranga rineina ruaiṭhe ai siam neh inrikhek a nit.

³Ruai ifah ranga a mi fialhei ikoi rangin â somhei a tir a; nikhomseh, a mi fialhei khah hong nuam mak a.

⁴Khanchu, isom danghei a tir nôk a, a mi fialhei ziangah hingkana ti rangin he a be a, ‘Ki ruai khah ken rifûk zoi diam tâk a; ki serâtchalhei neh ki ran vâi ithâihei ki that a, tinrêng arfûk zoi diam tâk a nit. Rineina ruaiṭhe fah rangin hong ta rei, va ti rei,’ a ti a.

⁵Nikhomsela, a mi fialhei khan iten lei be mak a, an sintum seng an sin a, khatkah a loiah a fe a, khatkah chu a sum inrivaina munah a fe a,

⁶mi danghei khan isomhei khah an man a, an itôk a, an that a.

⁷Rêng khah a ning a thik tâk a; khanchu, a sipaihei a tir a, kha mi thattuhei khah ân that a, an khua khom ân hâl pêk tâk a.

⁸Khanungchu, â somhei khah a koi a, an ziangah, ‘Rineina ruai chu isiam zoi diam a nit tâk a; nikhomseh, ki mi fialhei kha chu â fah rua ni mak e.

⁹Atûn chu lamilianah fe unla, mi nin imu murdi ruai ifah rangin hong koi rei,’ a ti pêk a.

¹⁰Khanchu, isomhei khah lamilianheiah an fe a, mi an imu murdi, mi ṭha neh mi sia, an hong koibûm a, imoi lômna in khah mipuiin an sip tâk a.

¹¹“Khante, rêng khah khualmihei ien rangin a va lût a, rineina puan sil ino mi khatkah a va mu a.

¹²Rêng khan a ziangah, ‘Mala, rineina puan sil loiin ingkan im hin ni hong lût tlia?’ a ti a. Khanniseh, kha mi khah a dâirek a.

¹³Khanungchu, rêng khan â somhei ziangah, ‘A kut neh a ke khuap unla, putiang izîngah paiisua rei. Amakhan ṭap a ta, arkam inritông a ti.’

¹⁴Ifialhei chu itam takkah an nit a; nikhomseh, rithlanghei chu iroichekah an nit,” a ti a.

¹⁵Khante, Farisaihei khah an suak a, a ṭongbâi suaka rithoka Jisua an man thei rang dân lampui an siam tâk a.

¹⁶Khanungchu, an kôilôm ṭhenkahei neh Heroda pôla mi ṭhenkahei khah Jisua ziangah an tir a; kha mihei khan, “Minriseitu, thutak ne sîr ngai iti kin riat. Tute ringai dân ngaisak ngai mak che a, tute khom ithleibîk loiin miriam ta ranga Pathian lungdo thutak khah nen risei ngai a.

¹⁷Khateh, ingkam ner ngai dân a nit ne ril ta? Kaisara zianga sia chôi hih arthiang im, rithiang mak im?” an ti a.

¹⁸Jisuan an lunginṭong ṭhatnozia khah a riat ṭian a, an ziangah, “Vârrilethei o, ithôm nen ôk rang nin itum hi?

¹⁹Sia chôi ranga sum khah nen en ta u,” a ti a. Sum khah a ziangah an hong chôi a.

²⁰Anni khah ardon a, “Tu rilim neh tu riming im ai nit hi?” a ti a.

²¹Anni khan, “Kaisara,” itin an sâm a. Khanchu, Jisuan an ziangah, “Kaisara ta chu Kaisara peh unla, Pathian ta chu Pathian peh rei,” a ti a.

²²Amakhah an riatin chu arkhêl an ti tak tak a, ani khah an mâk a, an rot pat tâk a.

²³Kha nî sûn ngirah khan thoinôkna omak iti ngai Sadukai ṭhenkahei Jisua ziangah an hong a.

²⁴A ziangah, “Minriseitu, Mosian, ‘Nai nei loiin mi thi sela, a unaipa khan kha numei khah ilua nôkin a ulianpa ta rangin richi a nei pêk rang a nit,’ a ti a.

²⁵Khate, kin lâiah urêng parual sarikah an om a, a ulian takin nupui a nei a, richi nei loiin a thi a, a nupui khah a unaipa ziangah a mâk tâk a.

²⁶A unaipa â nikna chungah khom khangkah ngirin a om a, a thumnapu chungah khom, a sarinapu dênin an lua seng a.

²⁷A nungkhôn takah chu a nupang khom khah a thi tâk a.

²⁸Khate, thoinôknaah kha mi pasal sarikahei lâia tu nupui tak im ai nit rang tâk? An rêngkan lak an lua seng a,” an ti a.

²⁹Jisuan a sâm a, “Nin ringai insual vang na! Pathian thu neh Pathian sinthotheina nin riat no sika a nit.

³⁰Thoinôknaah khan nupui pasal rinei khâi no nih, rivâna vântirtônhei angkan om tâng an ti.

³¹Khante, mithi thoinôkna thu chu Pathianin, ‘Keimah hi Abrahama Pathian, Isaka Pathian, Jakoba Pathian ki nit’ itia nangni a îsîr pêk khah nin lai tep tlak ngai ino mani?

³²Pathian chu mithihei Pathian ni mak a, iringhei Pathian kêng ai nit,” a ti a.

³³Mipuihei khan amakhah an riatin chu a thu inrisei khah arkhêl an ti tak tak a.

³⁴Jisuan Sadukaihei khah a sêlindong iti Farisaihei khan an riatin chu a lômin an hong a,

³⁵an lâia Dân inriseitu [45] khatkan ṭongridona in-ôk rang a tum a,

³⁶“Minriseitu, Dânah hin thupêk îtak hîm â roinpui tak?” itin ardon a.

³⁷Jisuan a ziangah, “‘Pumapa ni Pathian chu ni lungril murdin, ni ringna murdin, ne lunginṭong murdin lungthlung roh’ iti hi.

³⁸Amahih thupêk roinpui tak neh a kâmiom tak a nit.

³⁹Thupêk â nikna, ar-angpui chu, ‘Nangmah lung ni irthlung angkan ni bungahei lungthlung roh,’ iti hih a nit.

⁴⁰Mosia Dân pumpui neh zânthlahei inriseina murdi hi thupêk inika hin a itêl inrichin thlep a nit,” a ti a.

⁴¹Farisai ṭhenkahei an ribûm lâiin Jisuan thu ardon a, an ziangah,

⁴²“Mesia hi ingkam nin ringai? Tu richia mîm ai nit?” a ti a. Anni khan, “Davida richia mi a nit,” an ti a.

⁴³Jisuan an ziangah, “Khateh, ithôm Rithla khan Davida kha, ‘Pumapa’ tia a înkoi? Davida khan,

⁴⁴“‘Pumapa khan ki Pumapa[46] ziangah; Ne râlhei ni kepha nuaiah ki sia zoi mâkah chu, Ke changtiang iṭhung mai roh,’ ai ti a nit a.

⁴⁵Davidan ani khah, ‘Pumapa’ itin a koi inteh, ingkan im Mesia khah Davida richi a nit thei rang?” a ti a.

⁴⁶Khanchu, tutên Jisua khah sâm thei mak a, kha nî sûna rithokin chu tutên îte ridon ngam khâi mak a.