Read Biete MATHAIA 24 Bible Online

MATHAIA 24 - Biete bible

MATHAIA 24

¹Khante, Jisua kha Tempil ata a suak a, a fe rangto takin, Tempil sin dân ien rangin a kôilômhei a ziangah an hong a.

²Ani khan an ziangah, “En rei, hihei murdi hih nin mu na? Thu dik nangni ke ril, hintaka lung richuan khatkah khom hih isim iloia imarak zel om no nih,” a ti a.

³Khante, Jisua kha Oliv tlângah â ṭhung lâiin, a kôilômhein anmani khât bangin an hong rimupui a. “Ne ril ta, khahei khah tikin im a hong itlung rang? Ni zuang nôkna rang neh rammual mongna rang risin khah im ai nit rang?” itin an ridon a.

⁴Jisuan an ziangah, “Tutên nangni an lêm nona rangin ridîn rei.

⁵Mi tam takkan, ‘Mesia chu ki nit,’ itin keima riming ichingin hong an ta, mi tam takkah lêm an ti.

⁶Nin kôla ridoina rihuhei riang nin ta, ilah taka ridoina thuthang la riang nin ti; nikhomseh, nin ilung inbuai no rei. Kha thilhei kha chu a hong itlung ngêt rang a nit; nikhomseh, mongna chu la ni no nih.

⁷Nam neh nam ridoi an ta, ram neh ram ridoi an ti. Mun tinah iṭâm thlâng a ta, nînu inîng a ti.

⁸Khahei murdi khah naihasê riphutna a nit.

⁹“Khanungchu, nangni intuang rangin nangni la man an ta, nangni that an ti; keima sikin nam tinin nangni la nel an ti.

¹⁰Khatikin chu mi tam takkan an iamna la mâng an ta; lân man risak an ta, lar nel risak an ti.

¹¹Zânthla lem itam takkah hong suak an ta, mi tam takkah la lêm an ti.

¹²Khante, sualna a la pung rang sikin mi tam takka lungthlungna la dâi a ti.

¹³Nikhomsela, tutu a mong idêna tuang idiar chu inringin om a ti.

¹⁴Khante, hi Ram Thurchi Ṭha hih nam tin riat rangin rammual pumpuiah isîrin la om a ta; khanchu, mongna hong tlung a ti.

¹⁵“Khante, ‘Siatna Porinche’ zânthla Danielan a lei îsîr khah mûng nin ta, mun rithiangah khan iding a ti. A tep kan a omzia reh riseh.

¹⁶Khanchu, Judai rama omhei khah itlângheiah lâizâm tho riseh.

¹⁷In chunga om khan insungah a neinun isua rangin ṭum no riseh.

¹⁸Loia om khomin a puan ilah rangin kîr no riseh.

¹⁹Kha nikhuaah khan chu nai ivonghei neh nu naite pomlâihei chu lungkham an om rang vang na!

²⁰Lâizâm nin tho rang zoro khah phalbia [50] manih, sabatnin manih a hong tlung nona rangin Pathian ziangah ṭongṭai rei.

²¹Kha zoroa dengthei inthang iom rang kha chu rammual insiang ata atûn tenan la om ngai mak a, iom khom om nôk tlak khâi no nih.

²²Nikhomsela, Pathianin kha sûnhei khah intôi no sela, miriam tute â dam suak om no nih. Nikhomsela, a mi zenhei sikin Pathianin kha sûnhei khah intôi a ti.

²³“Kha nungah khan tukhomin nin ziangah, ‘En ta, Mesia chu hin a om’ manih, ‘Son a om’ manih an ti khoma taksôn no rei.

²⁴Mesia lemhei neh zânthla lemhei an lai suak rang a nit; khahei khan thei vâng seh chu izenhei ilua an lêm theina rangin risinsiana neh sinrikhêl tak tak sin an ti.

²⁵Ringai rei, a zoro a hong tlung man nangni ki îril thlâm a nit.

²⁶“Tukhomin nin ziangah, ‘En ta, ramchârah a om,’ an ti khoma taksôn no rei.

²⁷Miriam Naipa zuang nôk rang chu khothlâr sak tianga rithoka thlang tiang idêna hong rilek ngai angkah hih ai nit rang a nit.

²⁸“Takah khom saruak omna kipah chu vasatelhei khom ribûm an ti.

²⁹“Kha dengtheina nikhuahei rizoi kaneh chu inî zîng a ta, ithla vâr khâi no nia, rivâna rithokin ârsihei ṭul a ta, rivân sinthotheinahei khah innîngin om a ti.

³⁰Khanungchu, Miriam Naipa risinsiana khah rivânah zuang ilang a ta; rinêng chunga mi murdîn Miriam Naipa hi sinthotheina neh roinpui takka rivâna sûm lâiah a zuang an mu tikin chu ṭap an ti.

³¹Vântirtônhei chu bekul irî neh rammual kil ilika tah tir a ta, kôlkomonga rithoka kiangtiang kôlkomong idênin a mi zenhei bûm an ti.

³²“Khanchu, theichâng kung om dâna rithokin risei rei. Â ṭang a hong cher a, nâ a hong lâkin chu kholum a hong nâi tâk iti nin riat ngai.

³³Khangkah ngirin, nangni khomin khahei murdi khah nin mu tikin chu a zoro a hong nâi tâk a, arphut rang tâk iti reh rei.

³⁴Thu dik nangni ke ril, khahei murdi khah a tlung mâkah chu atûn lâia mihei hih thi riai no nih.

³⁵Rinêng neh rivân boi a ta, ki ṭong chu boi no nih.

³⁶“Khannisela, kha zoro neh nikhua zuang tlung rang khah Pa banah chu tutên reh mak; rivâna vântirtônhei khomin, Naipa khomin reh mak e.

³⁷“Miriam Naipa zuang nôkna chu Nova dam lâia angkah khan nîng a ti.

³⁸Tui lian ma, Nova rikuangah a lût nî dênin an fâkin an nêk a, nupui pasal an rinei a;

³⁹tui a hong lian a, an rêngkan an rimang khap mâkah chu im a hong itlung îte reh mak e. Miriam Naipa zuang nôkna kha khangkah takah khan nîng a ti.

⁴⁰Kha tikin chu mi inikah loiah sin thông an ta, khatkah iṭhuiin om a ta, khatkah iman om a ti.

⁴¹Nupang inikan fasum kungah fâng isukin om an ta, khatkah iṭhuiin om a ta, khatkah iman om a ti.

⁴²“Khasikin, intûng ṭiankan om rei, tik nikhuan im nin Pumapa ai zuang rang reh mak chei.

⁴³Nikhomsela, amahih nin riat, inchongpu khan inru hong rang zoro khah reh sela chu lei intûng ṭian a ta, a in khah inrok no nih.

⁴⁴Khasikin, nangni khom intûng ṭiankan om rei, nin intûng no zoro takin Miriam Naipa khah zuang duai a ti.

⁴⁵“Isom iamom tak neh â vâr, a pun a insung icharêl a, isom danghei zoro tina an fâk isem pêk ranga uliana ai siam khah tûm nîng a ti?

⁴⁶A pu a hong tikin khangkana sin itho isom a hong imu kha chu a ham a ṭhat rang vang na!

⁴⁷Thu dik nangni ke ril, a pu khan a neinun murdi chunga â zêktun siam a ti.

⁴⁸Khannisela, isom ṭhano a nitin chu a lungrilin, ‘Ki pu chu hong vak no nih,’ tîng a ta,

⁴⁹â som champuihei lei hêm a ta, zûnruihei lâiah ifan in a ti.

⁵⁰Khanchu, kha som a pu khah a tûng no lâi tak neh a riat no zoro takin hong pêk a ta,

⁵¹a pu khan ûmisua pai a ta, vârrilethei dongtum angkana khah indong a ta; amakhan ṭap a ta, arkam inritông a ti.