Read Biete MATHAIA 25 Bible Online

MATHAIA 25 - Biete bible

MATHAIA 25

¹“Khatikin chu rivân ram khah nungâk sômkah, an meiserhei ichôi a, moineitu don ranga fehei neh inrikhek ni tâng a ti.

²An lâia ringakah an intlôk a, ringakah an vâr a.

³Ân tlohei khan an meiser an hong chôi a, a tui chôi sa mak a.

⁴Â vârhei khan chu an meiserhei an chôi a, a ûmah khan a tui an chôi sa a.

⁵Moineitu khah a zuang innung sikin inrimu an lei ibûk a, an lei in thlar tâk a.

⁶“Zânlâi takah chu, ‘Ringai rei, moineitu a zuang tak e! Â don rangin hong suak ta rei,’ itin khêk irî a zuang om tâk a.

⁷Khanchu, nungâk sômkahei khah an thoi a, an meiserhei an inrifûk a.

⁸Khante, ân tlohei khan â vârhei ziangah khan, ‘Nin meisertui khah ne sem rei, kin meiserhei â thi rang tâk kêng,’ an ti a.

⁹Nikhomsela, â vârhei khan, ‘Nangni sem thei no ning ung e. Keimani neh nangmani rangin chu inrup no nih, â zuartuhei ziangah fe unla, var choh rei,’ an ti a.

¹⁰Khanchu, nungâk intlohei khah meisertui richoh rangin an fe a; khante, an fe kârin moineitu khah a zuang tlung tâk a. Khanchu, nungâk ringakah risiam ṭianka omhei kha chu amah neh ribiak ruai iṭhe rangin an lût a, in an khâr tâk a.

¹¹“Kha rizoiin chu nungâk danghei khom khah an hong tlung a, ‘Epu, epu, inkhâr ne ong roh,’ itin an ṭap ikhêk a.

¹²Moineitu khan, ‘Thu dik nangni ke ril, Tuhei im nin init nangni reh ngai mang e,’ a ti a.

¹³“Khasikin, intûng ṭiankan om rei, a nikhua neh a zoro khah nin iriat ino a nit.

¹⁴“Khatikin chu rivân ram kha mi khatkah, ram dangah ân zin rangto a, ama somhei ikoi a, archonhei an zianga inkol angkah kha nîng a ti.

¹⁵An thei lam angkah chitin a pêk a; khatka ziangah talent ringakah a pêk a, khatka ziangah talent inikah a pêk a; khatka ziangah talent khatkah a pêk a. Khanchu, inzin rangin a suak tâk a.

¹⁶Isom talent ringaka dongtu kha chu a fe a, a vân rivai zel a, talent ringakah dang â sua nôk a.

¹⁷Khangkah ngirin, talent inika dongtu khom khan talent inikah dang â sua nôk a.

¹⁸Khanniseh, talent khatka dongtu kha chu a fe a, khur a choih a, a pu sum khah a thup tâk a.

¹⁹“Isôt takka nungah chu kha somhei pu khah a hong nôk a, an ziangah a sum chungchâng khah ân felpui tâk a.

²⁰Isom talent ringaka dongtu khah a hong a, ‘Epu, talent ringakah ni ne ipêk khah en ta, talent ringakah dang ki lei îsua nôk a nit,’ a ti a.

²¹A pu khan a ziangah, ‘Nangmah isom iṭha neh iamom, ni thôn ṭhat, iroicheka chungah iiam ni om sikin itam takka chung khomah nang in-om ki ti. Hong inla, ki lômna hong dong sa roh,’ a ti a.

²²“Khanungchu, talent inika dongtu khah a hong a, ‘Epu, talent inikah ni ne ipêk khah en ta, talent inikah dang ki lei îsua nôk a nit,’ a ti a.

²³A pu khan a ziangah, ‘Nangmah isom iṭha neh iamiom, ni thôn ṭhat, iroicheka chungah iiam ni om sikin itam takka chung khomah nang in-om ki ti. Hong inla, ki lômna hong dong sa roh,’ a ti a.

²⁴“Khanungchu, talent khatka dongtu khah a hong a, ‘Epu mi khir tak ni nit iti ki riat; ni tu nona khomah ni ât ngai a, chi ne thek nona khomah ne tikbûm ngai a.

²⁵Khasikin, ki ṭi a, ni talent ne pêk khah rinêng rilah ki vai thup tâk a nit. En ta, hih ni ta ngir khah nî mu nôk a nit,’ a ti a.

²⁶A pu khan a ziangah, ‘Nangmah isom pualoi neh thaboipa, ki tu nona khomah ki ât a, chi ke thek nona khomah ke tikbûm ngai iti ni riat na?

²⁷Khangkan a nitin te, ithôm ki sum khah sum siana inah ni lei sia no; khanchu, ki hong nôkah hin ki sum hih â pung neh kî mu rang kêng ai nit.

²⁸Atûn chu a talent hih a zianga rithokin la unla, talent sômka neitu ziangah peh rei.

²⁹Tutu â nei kah chu ipe intam ual nîng a ta, nei intam nôk ual a ti; tutu â nei ino kah chu a neisunte khom ilah pêk rip nîng a ti.

³⁰Khante, hi som mangmunboi hih putiang izîngah paiisua rei; amakhan ṭap a ta, arkam inritông a ti,’ a ti a.

³¹“Miriam Naipa hih vântirtônhei murdi neh roinpui takka a zuang tikin chu, a rêngṭhungmunah iṭhung a ta,

³²a makungah khan nam tina mihei ribûm an ti. Khanchu, bera ngâktu khan kêl neh bera ai ṭhen angkan annihei chu lôm inikan ṭhen tâng a ti.

³³Mi felhei khah â changtiang siang a ta, a danghei kha chu â voitiang siang a ti.

³⁴“Khanchu, rêng khan â changtianga mihei ziangah khan, ‘Hong rei, ki Pan ṭhat ai vurhei, hong unla, rammual inzir ata nin ta ranga ram inrifûk hih dong ta rei.

³⁵Ki von a ṭâmin ifâk nin ne pêk a, ki tui arhâlin iin rang nin ne pêk a; khualmi ki nitin nin inah nin ne thlun a;

³⁶koronga ki omin puan nin nen sila; ki dam non nin ne donsui a; tâng inah ki om khomin nin ne pan ngai a,’ la tîng a ti.

³⁷“Khanchu, mi felhei khan, ‘Pumapa, tikin im voniṭâmin nang kin mua ifâk nang kin ipêk a, tuirihâlin nang kin mua iin rang nang kin ipêk?

³⁸Tikin im khualmin nang kin mua kin inah nang kin îthluna? Korongin nang kin mua puan nang kin însila?

³⁹Tikin im dam inon manih, tâng ina manih, nang kin mua nang kin ipan ngai?’ itin la sâm an ti.

⁴⁰Rêng khan an ziangah, ‘Thu dik nangni ke ril, hi ki suapui ichîntakhei lâia khatka chunga nin isin khah, ki chunga nin isin a nit,’ itin la sâm a ti.

⁴¹“Khanungchu, â voitianga mihei ziangah khan chu, ‘Nangni Pathian vânisâm nuaia omhei, ki ziang ata ro rei. Diabola neh a tirtônhei ta ranga siam kumkho meiah khan fe ta rei.

⁴²Ki von a ṭâmin ifâk ne peh mak chei a, ki tui arhâlin iin rang ne peh mak chei a;

⁴³khualmi ki nitin nin inah ne thlun mak chei a; koronga ki omin puan nen sil mak chei a; dam inon neh tâng inah ki om khomin ne pan ngai mak chei,’ la tîng a ti.

⁴⁴Khanchu, anni khan a ziangah, ‘Pumapa, tikin im voniṭâmin manih, tuirihâlin manih, khualmin manih, korongin manih, daminon manih, tâng ina manih nang kin mua ni sin nang kin itho pêk ngai ino?’ itin la sâm an ti.

⁴⁵Rêng khan an ziangah, ‘Nangni ke ril, hi mi chîntehei lâia khatka chunga nin isin ino khah ki chunga nin isin ino a nit,’ itin la sâm a ti.

⁴⁶“Hi mihei hih kumtluang dengthei tuangnaah fêng an ta; khanniseh, mi felhei chu kumtluang ringnaah fêng an ti,” a ti a.