Read Biete MATHAIA 26 Bible Online

MATHAIA 26 - Biete bible

MATHAIA 26

¹Khante, Jisuan kha thuhei murdi khah ân risei zoiin chu a kôilômhei ziangah,

²“Sûn nika nungah Kalkan Kût hong om a ti iti nin riat a, Miriam Naipa hih ihêmde rangin inman nîng a ti,” a ti a.

³Kha lâiah khan thiampu lalhei neh upahei khah Thiampu Laltak Kaiafa inah rimuna an nei a.

⁴Jisua khah inrûkka iman a, an that thei rang lam ingaituan an risôn a.

⁵“Kût sungin chu ni no riseh, vântlâng lâiah buaina a om duai lôiin,” an ti a.

⁶Khante, Bethania iphâr Simona inah Jisua a om a.

⁷Jisua bu a nêk lâiin, nupang khatkah alabastar bûra siriak namhoi man ilutak hong ichôiin a hong a, a luah siriak khah a buak a.

⁸Kôilômhei khan amakhah an mun chu an ning a thik a, “Îtho rang im hingkana a înrichêk hi?

⁹Hi siriak namhoi hih man itam takka zuar a, inrianghei zianga peh thei kêng ai nit,” an ti a.

¹⁰Jisuan an ṭonghei khah a riat a, an ziangah, “Ithôm hi nupangnu hih nin înbuai? Ki ta rangin thil iṭha neh enihoi tak ai tho a nit.

¹¹Inrianghei chu nin zianga om mai an nit a; khanniseh, kei chu nin ziangah om mai no ning e.

¹²Hi siriak namhoi ki takpuma ai buak hih iphûm ranga nen risiam thlâmna ranga ai tho a nit hih.

¹³Thu dik nangni ke ril, rammual pumpuiah Thurchi Ṭha an isîrna kipah hi nupangnu sintho khom hih ama riatmaina rangin isîr sa mai an ti,” a ti a.

¹⁴Khanungchu, kôilôm Sômleiinikahei lâia khatkah, Juda Iskariota an iti khah thiampu lalhei ziangah a fe a.

¹⁵“Jisua hih nangni inman inlang im nin ne pêk rang?” a ti a. Tangka sômithumkah an tep a, an pêk tâk a.

¹⁶Kha rizoia rithokin chu Juda khan Jisua an kutah a bâng thei rang lam khah a zong mai tâk a.

¹⁷Bairiam Kût sûn masatakah khan, kôilômhei an hong a, Jisua ziangah, “Kalkan Kût ruai hih takâm nang inrifûk pêk unlang ni nuam?” itin an ridon a.

¹⁸Ani khan an ziangah, “Khopuiah, mi khatka ziangah fe unla, a ziangah, ‘Minriseitu khan ki zoro a nâi tâk a; ki kôilômhei neh Kalkan Kût ni inah mang kin ti,’ a ti va ti rei,” a ti a.

¹⁹Khanchu, Jisuan thu a pêk lam angkah takin an tho a, Kalkan Kût ruai khah an inrifûk tâk a.

²⁰Kholoi a hong nitin chu Jisua neh a kôilôm Sômleiinikahei khah khalai rikhîlin an iṭhung a.

²¹Khalai an rikhîl lâi takin Jisuan an ziangah, “Thu dik nangni ke ril, nin lâia mi khatkah hin nen man a ti,” a ti a.

²²Khanchu, kôilômhei ilung a buai tak tâk a, a ziangah, “Pumapa, keimâm ni ne iti?” an ti seng a.

²³Jisuan an ziangah, “Khêng khatka ne otpuitu tak hin nen man a ti.

²⁴Pathian Thubûn ai ti angkan, Miriam Naipa hih thîng a ta; nikhomseh, Miriam Naipa inmantu rang chung chu ân khôk vang na! Kha miriam kha chu suak no sela a ta rangin ṭha ual a ti,” a ti a.

²⁵Ân man rangtu Juda khan a sâm a, “Minriseitu, keimâm ni ne iti?” a ti a. Jisuan a ziangah, “Ner ti mai tâk khate,” a ti a.

²⁶Khante, an fâk lâiin, Jisuan ibai a lâk a, lômthu â sîr zoiin a khoi a, a kôilômhei ziangah a pêk a, “Lah unla, fah rei, amahih ki taksa a nit,” a ti a.

²⁷Khanungchu, kilât khah a lâk a, Pathian ziangah lômthu â sîr zoiin chu an ziangah a pêk a,

²⁸“Nin rêngkan in rei, amahih ki thisen, Pathian thuthlung indettu, sual izâna ranga mi tam takka ranga suak rang chu a nit.

²⁹Nangni ke ril, ki Pa Ramah nangmani neh uain ithar ki in nî sûn a tlung mâkah chu hi uain hih in nôk khâi no ning e,” a ti a.

³⁰Kha rizoiin chu la khatkah an sak a, an sak zoiin chu Oliv Tlang tiang ipanin an suak tâk a.

³¹Khanchu, Jisuan an ziangah, “Vuanzân ngêiah hin nin rêngkan lâizâm thông nin ta, ne mah riai nin ti; Pathian Thubûn, ‘Pathianin berapu khah that a ta, berahei khah rithekindar chit an ti,’ ai ti a nit.

³²Nikhomseh, kâiithoia ki om nungin Galili ramah nin matona lei fêng ki ti,” a ti a.

³³Peteran a ziangah, “A danghein nang marak riai khom seh, keiman chu nang mah tlak no ning e,” a ti a.

³⁴Jisuan Petera ziangah, “Thu dik nang ke ril, vuanzân âr a khuang man nangman voi thumkah ne phial ni ti,” a ti pêk a.

³⁵Peteran a ziangah, “Ni thinaah thi sa rang khom inlang nang phial tlak no ning e,” itin a sâm a. Kôilôm danghei khomin khangkah korongin an ti chit a.

³⁶Khanungchu, Jisua khah a kôilômhei neh mun khatkah Gethsemani an iti-ah khan an fe a, Jisuan an ziangah, “Son ki va ṭongṭai sungkah chu hin lei iṭhung rei dua,” a ti pêk a.

³⁷Petera neh Jebedaia naiipa inikahei khah a ṭhui a. Thlavâina neh lungkângnan a zuang rikhû tâk a.

³⁸Khanchu, an ziangah, “Ker thla â vâi tak tak a, ithi tlak rang dôrkan kêng ki om. Hin lei om unla, ne rakpui rei dua,” a ti a.

³⁹Khante, matiang a va fe ual viat a, rinêngah â bok rak a, a ṭongṭai a, “Epa, ithei a nitin chu hi tuangna kilât hih ki zianga rithokin ne khâi pêk roh. Nikhomsela, keima richam ni loiin nangma richam ni ual riseh,” a ti a.

⁴⁰Khanungchu, a hong kîr nôk a, kôilôm ithumkahei khah â in thlarin a hong mu a; khanchu, Petera ziangah, “Ingkan im nangmanin thum hih dârkâr khatka lua khom nin ne irakpui thei ino kêng na?

⁴¹Thlêmnaah nin lût nona rangin intûng ṭiankan ṭongṭai rei. Rithlan chu a nuam a, taksan chu ai phâri no a nit,” a ti a.

⁴²Khante, a voi niknah Jisua a fe nôk a, a ṭongṭai a, “Epa hi tuangna kilât hih ki in noa ikhâi thei a nit tlak non chu nangma richam ni riseh,” a ti a.

⁴³A hong kîr nôkin chu kôilômhei khah â in thlar ngirin a hong mu a; an mit reng an imeng zoi ino a nit.

⁴⁴Jisuan a mâk nôk a, a voi thumnan ai ti ngaingir itin a ṭongṭai nôk a.

⁴⁵Khanungchu, kôilômhei ziangah a hong a, an ziangah, “Atûn tenan ringamin nin lai in thlar mai na? En ta u, Miriam Naipa hih mi sualhei kuta pêk rang zoro a hong tlung tâk.

⁴⁶Thoi unla, fe tâng ei ti u. En ta u, nen man rangtu hih a hong nâi tâk,” a ti a.

⁴⁷Khante, Jisua a la ṭong mai lâiin kôilôm Sômleiinikahei lâia khatkah, Juda khah a hong tlung a. Ama lômin thiampu lalhei neh upahei hong itir mipui, khandai neh tôkmol ichôiin an hong tâk a.

⁴⁸Ân man rangtu khan, “Â biang kî tum tak khah nin izongpu chu nîng a ti; man zel rei,” itin risin a lei ipêk thlâm tâk a nit.

⁴⁹Juda khah Jisua ziangah a fe thal a, a ziangah, “Minriseitu, ni chungah thlangamna om riseh,” itin â biang a tum a.

⁵⁰Jisuan a ziangah, “Mala ni hongna bi chu tho zel roh,” a ti pêk a. Khanungchu, an hong a, Jisua chu an man a, an itûk khap tâk a.

⁵¹Jisua zianga omhei lâia khatkan a khandai a thuat a, Thiampu laltak suak khah a sât a, â kuar a sât iṭhul pêk a.

⁵²Jisuan a ziangah, “Ni khandai khah a kokah thun nôk ta roh; khandai ilekhei chu khandai ngirin thîng an ti.

⁵³Ki Pa ziangah sanna ki zong thei a, aman voikazelin vântirtônhei sângirukkah lôm sômleiinika nêka tam a zuk tir thei iti nî riat ino mani?

⁵⁴Nikhomsela, ngên tan lang, hingkana thil hong iom rang Pathian Thubu-a lei isîr khah ingkan im a tlung thei rang?” a ti a.

⁵⁵Khanungchu, Jisuan mipuihei ziangah khan, “Suammi man rang angkan khandai neh tôkmol ichôiin ne man rangin nin hong irthok kêng na hi? Tempilah nîn tin iṭhungin mi ken risei ngai a, ne man mak chei a.

⁵⁶Nikhomsela, zânthla lekha Thuhei khah a hong tlung idik theina rangin hihei murdi hih a hong iom tâk a nit hih,” a ti a. Khanungchu, kôilômhei murdîn amah an mâk a, lâizâm an tho riai tâk a.

⁵⁷Khante, â mantuhei khan Jisua khah Thiampu laltak Kaiafa inah Dân inriseituhei neh upahei lei ribuknah khan an ṭhui tâk a.

⁵⁸Petera khan ilah iankatah a zui a. Thiampu laltak in kottual idênin a zui a. Khante, in kottual a va lût a, a mongna imu tumin vêngtuhei lâiah â ṭhung a.

⁵⁹Thiampu lalhei neh roirêltuhei murdi khan Jisua an that theina ranga thiamno an inchangna rang bi an zong a.

⁶⁰Mi itam takkah ihongin a chungchângah milak thu an ril a; nikhomseh, thu tluk mu mak a. A nungkhôn takah chu mi inikah an hong a,

⁶¹“Hi mi hin, ‘Tempil hih iṭhetin sûn thumkan ken ding nôk thei,’ a ti,” an ti a.

⁶²Khanchu, Thiampu Laltak khah â ding a, Jisua ziangah, “Hi nang an nona thu-ah hin îte sâmna nî nei ino mani?” a ti a.

⁶³Nikhomseh, Jisua chu a dâirek a. Thiampu Laltak khan â sôn nôk a, “Pathian iring rimingin nang ki ti; Pathian Naipa, Mesia khah ni nit im, ne ril roh,” a ti a.

⁶⁴Jisuan a ziangah, “Ni ne ti mai tâk khate. Khanniseh, nangni ke ril; nakanah chu Miriam Naipa hih Tinrêngthothei changtianga ṭhungin rivân sûm lâia zuang nin lai mu rang a nit,” a ti a.

⁶⁵Khanchu, Thiampu Laltak khan a puansilhei â potthlêr a, “Pathian a îsîrinsiat a nit, riatpuitu dang nang khâi mang meh. Pathian â sîrinsiat tlia chu nin riat tâk a,

⁶⁶Ingkan im nin ringai?” a ti a. Anni khan, “Ithi rang inrup a nit,” an ti a.

⁶⁷Khanungchu, a mâiah an ichil a, an itôk a, ṭhenkan an ibên a,

⁶⁸a ziangah, “Nangmah, Mesia, tûm nang ibên ne ril roh,” an ti a.

⁶⁹Khante, Petera khah in rikul sung tolâiah â ṭhung a, Thiampu Laltak isom nungâkhei lâia khatkah a hong a, a ziangah, “Nang khom hih Galili mi Jisua zianga om ngai khah ni nit hi,” a ti a.

⁷⁰Khanniseh, ani khan, “Ni thu sîr khah a omzia reh viat mang e,” itin an rêngka makungah a phial a.

⁷¹In rikul dâikot putiang a va suak a, isom nungâk dangin a lei mu nôk a, khantaka omhei ziangah khan, “Hi mi hih Nazaret Jisua zianga om ngai khah a nit,” a ti a.

⁷²Peteran a phial nôka, “Vânirisâmin kî ti a nit, kha mi khah reh mang e,” a ti a.

⁷³Itôiteka nungah chu khantaka dinghei khah Petera ziangah an hong a, a ziangah, “Nang khom hi an lâia mi ni nit ngêt, ni ṭong dan rengah hin ei riat thei,” an ti a.

⁷⁴Khanchu, Peteran an ziangah, “Thudik irilin vâni ki irsâm a nit. Â dik non chu Pathianin deng nen thei riseh. Kha mi khah kî riat tlak ino a nit,” a ti a. Kha zoi kaneh chu âr a khuang zel tâk a,

⁷⁵“Âr a khuang man nangman voi thumkah ne phial ni ti,” Jisuan ai ti pêk khah Peteran a riat suak a. Khanchu, a suak a, a ṭap ngûi ngûi tâk a.