Read Biete MATHAIA 27 Bible Online

MATHAIA 27 - Biete bible

MATHAIA 27

¹Zîng a hong nitin chu thiampu lalhei murdi neh upahei khan Jisua an that rang dân lampui an siam a.

²Zingzirin an khuap a, an ṭhui a, Rom.Ram-optu Pilata [51] ziangah an ṭhui tâk a.

³Ân mantu Juda khan Jisua khah thiamno an inchang iti a riat kaneh chu ân sîr a, a sum tangka sômithumkah khah thiampu lalhei neh upahei ziangah a hong chôi nôk a.

⁴“Mi fel ithi ranga ki înman kha kî thonsual a nit,” a ti a. Anni khan a ziangah, “Amakhah kin ta rangin im ân khôkna a om? Nangman nî nuam nuam lo roh,” an lei ti pêk a.

⁵Juda khan kha sum khah Tempil sungah a pai a, a rot a; khanchu, a fe a, a var khâi that tâk a.

⁶Thiampu lalhei khan sum khah an rût a, “Ama sum hih thisen man a nit sikin Tempil sum sia muna sia chu rithiang mak e,” an ti a.

⁷Khanchu, thu an inrual zoiin chu ram dang mihei phûmna mun rangin Bepu mun an richôk tâk a.

⁸Khasikah khan kha mun khah atûn tenan, “Thisen Mun,” an iti mai tâk a nit.

⁹Zânthla Jeremian, “Israelhein ama man ranga an îndôr tangka sômithumkah khah an lâk a.

¹⁰Pumapa thupêk angkan Bepu mun man rangin sum khah an mang tâk,” ai ti khah a hong itlung tâk a nit.

¹¹Jisua khah Rom.Ram-optu makungah a ngîr a, Ram-optu khan, “Judahei rêng ni nit im?” itin ardon a. Jisuan, “Ni nit ni ne ti tâk khate,” itin a sâm a.

¹²Khanniseh, thiampu lalhei neh upahein an nôna thu kha chu iten sâm mak e.

¹³Khanchu, Pilatan a ziangah, “Nang an nôna thuhei hih nî riat ino mani?” a ti a.

¹⁴Nikhomseh, Jisuan ṭongbâikah khomin sâm mak a, Ram-optu khah arngai arkhêl tak tak a.

¹⁵Khante, Rom.Ram-optu khan Kalkan Kût zoro fengin mi tâng khatkah mipuihein an iti tak â sua pêk ngai a.

¹⁶Kha lâiah khan mi tâng riming inthang tak Baraba [52] an iti khah a om a.

¹⁷Khanchu, mipui an hong ribûmin chu Pilatan an ziangah, “Tûm nangni sua pêk inlang nin nuam? Baraba hîm, anitnole Jisua, Mesia an iti pu hîm?” itin ardon a.

¹⁸Juda thuneituhei khan Jisua khah an narsa sika a kutah an hong ipêk a nit iti ifel takkan a riat a.

¹⁹Khante Pilata khah roirêlna munah â ṭhung lâiin, a nupuiin, “Kha mi fel chungah khan îte tho no roh dua, zânin ker mangin ama sikin kî tuang ok kêng,” itin he a hong richa a.

²⁰Thiampu lalhei neh upahei khan Baraba isua a, Jisua ithat ranga Pilata zianga ngên rangin mipuihei an ithlêm a.

²¹Pilata khan mipuihei ziangah, “Hi mi inikahei lâiah hin tu hîm nangni sua pêk inlang nin inuam?” itin ardon nôk a. Anni khan, “Baraba” an ti a.

²²Pilatan an ziangah, “Khateh, Jisua, Mesia an iti hih im ki lo rang tâk?” a ti a. Anni khan, “Krosah hêmde roh,” an ti a.

²³Khannisela, Pilata khan an ziangah, “Im a thonsualna ai nit?” itin ardon a. Nikhomsela, mipuihei khan, “Krosah hêmde roh,” itin an rât dôr dôrkan an ikhêk a.

²⁴Pilatan îte nemna om no nia, buaina bang kêng ai suak rang iti a mun chu tui a lâk a, mipuihei makungah a kut arsûk a, an ziangah, “Hi miriam thinaah hin îte rinangna nei mang e, amahih nangmani sintho a nit,” a ti a.

²⁵Mipui murdîn, “Hi mi thina sika rinangna chu keimani neh kin naihei chungah om riseh,” an ti a.

²⁶Khanchu, Pilata khan Baraba khah â sua pêk tâk a; Jisua kha chu ân hêm a, krosa hêmde rangin an kutah a pêk tâk a.

²⁷Khanchu, Pilata sipaihein Jisua khah praitorianah[53] an ṭhui a, an lôma mi murdi a kôlah an hong ribuk a.

²⁸A puanhei an lîk pêk a, puan senduk an insil a.

²⁹Khanchu, riling lukhum an phan a, an inkhum a, a kut a changtiang irol an inchôi a; a makungah rikhûk idilin, “Chibai, Judahei Rêng,” itin an phengsan a.

³⁰Ani khah an ichil a, â rol khah an sut a, a luah an itôk a.

³¹Khante, an phengsan zoiin chu puan senduk khah an lâk nôk a, ama puan ngir khah an insil nôk a. Khanchu, krosa hêmde rangin an ṭhui tâk a.

³²Khante, lampuiah an fe lâiin Kurini kho mi khatkah arming Simona an mu a; sipaihei khan Jisua kros riput pêk rangin an dânde a.

³³Golgotha, “Luru Mun” an iti khah an hong tlung a.

³⁴Amakhan Jisua khah uain, thil ikhâ neh ripol a in rangin an pêk a; khan a zuk ritem a, in nuam khâi mak a.

³⁵Khante, krosah an hêmde a; khanchu, thlasânin a puansilhei khah an risem a.

³⁶Khanungchu, amakhan an iṭhung a, an ngâk tâk a.

³⁷Amah an nôna, “Hi mi hih Jisua, Judahei Rêng a nit,” iti riziak a lu chungah khan an ikhop a.

³⁸Khante, ama lômin suammi inikah, â changtiang khatkah, â voitiang khatkah an hêmde sa a.

³⁹Khante, mi â fe â hong murdîn an lu thingin Jisua khah an êro a.

⁴⁰“Nangmah, Tempil hi iṭhet a, sûn thumka inding nôk theitu, Pathian Naipa ni nitin chu ni khâtin zôk inla, Kros lêra rithokin zuang ṭum ta roh,” an ti a.

⁴¹Khangkah ngirin Thiampu lalhei neh Dân inriseituhei neh upahei khomin ani khah an êro a,

⁴²“Mi danghei lak ân zôk ngai a; khanniseh, amah chu zôk thei mak a. Israelhei rêng ni mak im a? Atûn kros lêra rithokin zuang ṭum sela chu iam ei ti.

⁴³Pathian a iam a, Pathian Naipan arbe a. Tho lei en rei u, Pathianin atûnah hin a zuang inzôk nuam im,” an ti a.

⁴⁴Suammi, ama lôma an ihêmdehei khomin khangkah ngirin an êro a.

⁴⁵Khante, sûn lâi taka rithokin kholoi fasukrup idênin rammual a zîng khap a.

⁴⁶Kholoi fasukrup vêlin chu Jisua rôl iring takkan â khêk a, “Eloi, Eloi, lema sabakthani?” a ti a. Amakhah, “Ki Pathian, ki Pathian, ithôm ni ne mâk a?” itina a nit.

⁴⁷Kha muna ding ṭhenkahei khan amakhah an riat a, “Hi mi hin Elija ai koi a nit,” an ti a.

⁴⁸Khanchu, an lâia mi khatkah a tlân zel a, sponj [54] a lâk a; uain thûrah â chia a, irol mongah a târ a, Jisua khah hang in-in a tum a.

⁴⁹Khanniseh, mi danghei khan, “La ngâk hi roh, ân zôk rangin Elija a zuang im lei en rei,” an ti a.

⁵⁰Jisua chu rôl iring takkan â khêk nôk a, arthla â thla tâk a.

⁵¹Khanungchu, Tempil sunga puanzâr khah a chungtianga rithokin a nuaitiang idênin a thlêr a; rinêng â nîng a, lungpuihei a koi a;

⁵²ithlânhei a hong ri-ong a, mi rithiang lei ithi tâk itam takkah khom khah kâiithoiin an om tâk a.

⁵³Jisua thina rithoka a thoinôk nungah khahei khah ithlân ata hong isuakin khopui rithiangah khan an lût a, mi tam takka ziangah an inlâr tâk a.

⁵⁴Sipai rizaka ruitu neh a zianga sipai iom Jisua thlîrhei khan, nînu nîng neh thil zuang itlunghei khah an mun chu an ṭi tak tak a, “Hi mi hih Pathian Naipa a nit ngêt,” an ti a.

⁵⁵Kha munah khan nupang itam takkah, Galili rama rithoka Jisua nung izui a, â ṭangpui ngaihei khan ilah iankatah an thlîr a.

⁵⁶Khahei khah Mari Magdalini hei, Jakoba neh Josefa[55] nu Mari hei neh Zebedaia nupui hei an nit.

⁵⁷Khante, kholoi a hong nitin chu Arimathaia khuaa mi richong khatkah, arming Josefa a hong a; ani khom khah Jisua kôilôm a lei nit a.

⁵⁸Kha mi khah Pilata ziangah a va fe a, Jisua ruak khah a va ni a. Ruak khah Josefa zianga peh rangin Pilata khan thu a pêk a.

⁵⁹Khanchu, Josefa khan Jisua ruak khah â ṭhum a, puan rivuai itharin a tuam a,

⁶⁰ama thlân, lung a îhol zoi phingah khan ân zâl tâk a. Khanungchu, ithlân bâi khah lung ilian takin a sîng zoiin chu a fe tâk a.

⁶¹Amakhan Mari Magdalini neh Mari dang khah ithlân tiang masongin an iṭhung a.

⁶²Atûk, sabatnî sûnin thiampu lalhei neh Farisaihei khah Pilata ziangah an hong a,

⁶³a ziangah, “Epu, kha Milakah khan a ring lâiin, ‘Sûn thumka nungah chu thoinôk ki ti,’ a ti kin iriat mai a nit.

⁶⁴Khasikin, ithlân khah sûn thumka sung chu iṭha takka ngâk rangin thu peh roh; khanonchu, a kôilômhei an fe a, an va rûk a, mipui lâiah, ‘Thina rithokin a thoinôk tâk,’ an tia a nitin chu hi lêmna nungkhôn hih matona nêkan ai ṭhat ino ual rang a nit,” an ti a.

⁶⁵Pilatan an ziangah, “Vêngtuhei nin nei im ki ta,[56] fe unla, ithlân khah ṭha nin ti lam angkah takin inngâk rei,” a ti a.

⁶⁶Khanchu, an fe a, ithlân khârna lung khah risin an sia a, vêngtuhei khah an inngâk khap tâk a.