Read Biete MATHAIA 28 Bible Online

MATHAIA 28 - Biete bible

MATHAIA 28

¹Sabatnî ṭum, Pathiannî zîng kôlrisam kaneh Mari Magdalini neh Mari dang khah ithlân ien rangin an fe a.

²Voikazelin nînu a hong inîng a, rivân ata Pumapa vântirtôn a zuang a, lung khah ân lumpai a, a chungah â ṭhung a.

³A mêl chu khothlâr angkah a nit a, a puansilhei khom ivur angkana vâr a nit.

⁴Ama ngâktu sipaihei khan an ṭi tak tak sikin an inthing a, mithi angkan an om tâk a.

⁵Vântirtôn khan nupanghei ziangah, “Nangnin chu ṭi no rei, Jisua an ihêmde khah nin izong a nit iti ki riat.

⁶Hin om khâi mak e, ai ti angkan kâiithoi a nit tâk. Hin hong unla, a zâlna hih hong en rei.

⁷Atûn fe zel unla, a kôilômhei ziangah, ‘Thina rithokin kâithoi a nit tâk, Galili ramah nin matonah a lei fe a; amakhan mûng nin ti,’ ti rei. Nangni ki iril hih remai rei,” a ti a.

⁸Khanchu, iṭi neh râifânna sipin, ithlâna rithokin rimot takkan an fe a, kôilômhei va ril rangin an itlân tâk a.

⁹Voikazelin Jisuan anni khah a tong a, an ziangah, “Nin chungah thlangamna om riseh,” a ti a. Khanchu, a ziangah an hong a, a kepha an itûk a, chubai an ûn a.

¹⁰Jisuan an ziangah, “Ṭi no rei, fe unla, Galili rama fe rangin ki suapuihei va ril rei; amakhan ne mûng an ti,” a ti a.

¹¹Nupanghei khah an fe lâiin ithlân vêngtu sipai ṭhenkahei khah khopuiah an va fe a, thil zuang itlung murdi khah thiampu lalhei an va ril a.

¹²Thiampu lalhei khah upahei neh an rimu a, lungvâr an siam a; vêngtu sipaihei ziangah khan sum itam takkah an pêk a.

¹³An ziangah, “Zânah kin inkârin a kôilômhei an hong a, a ruak an hong îrûk a nit ti rei.

¹⁴Ram-optu khan kha thurchi khah a lei riat le khom, thiam nin chang iti lei isîrpui kin ta, îte nin ilung nin inbuaina rang omak e,” an ti a.

¹⁵Sipaihei khan sum khah an lâk a, he an be lam angkan an tho tâk a. Khasikin, atûn tenah hin kha thu khah Judahei lâiah an lai ril inlum mai a nit.

¹⁶Khante, kôilôm Sômleikhatkahei khah Galili rama itlâng khatkah Jisuan fe rei a ti pêknaah khan an fe a.

¹⁷Amah an mun chu chubai an ûn a; khanniseh, ṭhenkan chu iam titak mak a[57].

¹⁸Jisuan a hong nâi a, an ziangah, “Rinêng neh rivâna thuneina murdi ki ziangah ipe a nit tâk.

¹⁹Khanchu, fe unla, nam tina mihei ki kôilômin siam rei; Pa neh Naipa neh Rithla Rithiang rimingin baptis unla, thu nangni kî pêk murdi izôm rangin inrisei rei.

²⁰Khante, ringai ta u, keimah kumkhuakan, rammual mong idênin nin ziangah om mai ki ti,” a ti a.[58]