Read Biete MATHAIA 3 Bible Online

MATHAIA 3 - Biete bible

MATHAIA 3

¹Kha lâiah khan Baptistu Johana chu Judai ramchârah a hong a, thu â sîr a.

²“Rilet ta rei, rivân ram chu a nâi tâk e,” a ti a.

³Johana hi a nit, zânthla Isaian, “Ramchâra mi khatka khêk rôl khan, ‘Pumapa lamilian siam unla, A lampuihei khom intlûn rei,’ a ti,” itia a lei îsîr khah a nit.

⁴Khante, Johana kha saringsei mul puan a sil a, savun kongkhit a vong a; a fâk chu khâifapôl neh rama khuaitui a nit.

⁵Kha lâiah khan Jerusalemah neh Judai ram pumpuia omhei neh Jordan vadung vêla ram pumpuiah khan ani khah an pan zut zut a.

⁶An sualhei thupha an chôi a; khanchu, ani khan Jordan dungah khan a lei baptis a.

⁷Nikhomseh, Johana khan Farisaihei neh Sadukaihei itam takkah a zianga baptis ichang ranga hong a mu kaneh chu an ziangah, “Irûl richihei o, Pathian ningthik zuang iṭum ranga rithokah hin zôk thei nin ti iti tûm nangni ril?

⁸Nin sualhei ata nin rilet tâk iti riat theina rang sinhei khah tho rei.

⁹‘Abrahama richi kêng ei init,’ itia ningthikna zôk rangin ritûng no rei. Nangni ke ril, Pathianin hi lunghei khom hih Abrahama richin ai siam thei a nit.

¹⁰Atûn zelah hin thing bul tinah reipui iseh ṭian a nit tâk, thingkung tin irâ ṭhaa râ no kah chu iphûr an ta meiah hâl an ti.

¹¹Keiman chu nin rilet tâk iti riatna rangin tuiin nangni ki baptis ngai a; nikhomseh, ke nunga zuang rangtu hin chu Rithla Rithiang neh meiin nangni baptis a ti. Amah chu keima nêka roinpui ual a nit a; kei chu a pheikok rui isût rang iluan ritluk mang e.

¹²A rîzôla buhei zâp infâi liai a, a buhei pang sunga thun rangin a zâpna rilei khah a chôi ṭian tâk a, arsihei kha chu mei thi ngai inoah hâl inrimang a ti,” a ti a.

¹³Kha lâiah khan Galili rama rithokin Johana zianga Jordan dunga baptisma chang rangin Jisua kha a hong a.

¹⁴Khanniseh, Johana khan ikhap a tum a, a ziangah, “Keimah kêng ni ne baptis inang, ingkam ki ziangah teh ni hong tlia?” a ti a.

¹⁵Nikhomsela, Jisuan a ziangah, “Atûn inbei ngêt roh, hingkan Pathianin ai nuam murdi [3] ei tho vang rang a nit?” a ti a. Khanchu, Johana khan ân bei tâk a.

¹⁶Khante, Jisua khah baptisma a chang zoi kaneh chu tui ata a hong suak a. Khanungchu, a ta rangin rivân a zuang ri-ong a, Pathian Rithla khah vaṭhu angkana [4] zuang iṭuma a chunga zuang ifu a mu a.

¹⁷Khante, rivâna rithoka rôlin, “Ani hih ki Naipa lungthlung tak, a chunga kî lôm tak takah chu a nit,” a ti a.