Read Biete MATHAIA 4 Bible Online

MATHAIA 4 - Biete bible

MATHAIA 4

¹Kha rizoiin chu Jisua kha Diabola îthlêma om rangin ramchârah Rithlân a ṭhui zel tâk a.

²Khante, sûn sômilikah neh zân sômilikah bu a ngei tenan chu a von a hong ṭâm tâk a.

³Khanchu, Diabola khah a hong a, a ziangah, “Pathian Naipa ni nit titakin chu hi lunghei hih ibai ichang rangin thu peh roh,” a ti a.

⁴Khanniseh, Jisuan a ziangah, “Pathian Thubûn, ‘Miriam hi ibai bangin ring no nia, Pathian bâia rithoka thu suak tinrêngin kêng ring an ti,’ ai ti a nit,” itin a sâm a.

⁵Khanungchu, Diabola khan Jisua khah Jerusalem, Khopui rithiangah a ṭhui a, Tempil sîpah ân ding a,

⁶a ziangah, “Pathian Naipa ni nit titakin chu zuk richôm roh; Pathian Thubûn, “‘Ni chungrichânah chu Pathianin a vântirtônhei thu pêng a ta, An kutin nang idom an ta, Ni ke lua khom lungah de tlak no tin e,’ ai ti a nit,” a ti a.

⁷Jisuan a ziangah, “Pathian Thubûn, ‘Pumapa ni Pathian rinak no roh,’ iti khom riziak a nit sa,” itin a sâm a.

⁸Khanchu, Diabola khan Jisua khah itlâng risâng takah a ṭhui a, rammuala ram murdi neh an roinpuinahei ân en a;

⁹A ziangah, “Rikhûk idilin chubai ne ûn inla, hihei murdi hih nang pêng ki ti,” a ti a.

¹⁰Khatenan chu Jisuan a ziangah, “Soitan, ro zel roh; [5] Pathian Thubûn, ‘Pumapa ni Pathian chubai ûn inla, ama sin bang tho roh,’ a ti,” itin a sâm a.

¹¹Khanungchu, Diabola khan a mâk tâk a. Vântirtônhei an zuang a, a sin an zuang tho pêk tâk a.

¹²Khante, Jisuan Johana an man iti a riat kaneh chu Galili ramah a thleng thal a.

¹³Nazaret khah a mâk a, Kapernaum khuaah a om mai tâk a, amakhah Zebulun neh Naftali ramhuala Galili dîl rikama om a nit.

¹⁴Zânthla Isaian, “Zebulun neh Naftali rama, Tuipui panna lampui, Jordan râl, Jentailhei omna ram Galili; Izîng nuaia ṭhunghei khan ivâr roinpui tak an mu a, Thina ram izîng nuaia ṭhunghei chungah khan ivâr a zuang suak tâk,” itia a lei îsîr khah a hong tlung idikna rangin amakhah a hong iom a nit.

¹⁷Kha zoroa rithokah khan chu Jisuan, “Rilet ta rei; rivân ram chu a nâi tâk e,” itin thu sîr a phut zel tâk a.

¹⁸Khante, Jisuan Galili dîl rikamah a lôn vêl lâiin inga man ngai urnaikah, Simona (Petera an iti) neh a unaipa Andria kha an lên idêngin a mu a.

¹⁹Jisuan an ziangah, “Ne zui rei; khanchu, miriam imantun nangni siam ki ti,” a ti pêk a.

²⁰An lênhei an mâkrak a, ani khah an zui zel tâk a.

²¹Khantak ata a hei fe nôk ual viatin chu urnaikah dang Zebedaia naihei, Jakoba neh Johana khah a mu nôk a. Khahei khah an pa Zebedaia lômin an inthumkan an rikuangah an lei om a, an lênhei an lei siam a. Anni khah Jisuan a koi a.

²²Khanchu, rikuang neh an pa khah an mâk a, Jisua kha an zui zel tâk a.

²³Khante, Jisuan Galili ram pumpui arfang a, Sinagogheiah [6] ân risei a, Ram Thurchi ṭha khah â sîr a, mihei lâia natna tinrêng neh râtnona tinrênga nâhei khah ân dam thiai a.

²⁴Khanchu, Suria ram pumpuiah a thurchi khah ân thang tâk a; dam ino murdi, damnona neh natna tinrêng ituanghei, ramrili imanhei, risengol rivoihei, izenghei a ziangah an hong ṭhui a, aman a lei indam a.

²⁵Galili rama rithok hei, Dekapolia (Khopui sômka) rithok hei, Jerusalema rithok hei, Judai rama rithok hei neh Jordan râla rithok heiah khan mipui itam takkan amah an zui a.