Read Biete MATHAIA 5 Bible Online

MATHAIA 5 - Biete bible

MATHAIA 5

¹Jisuan mipuihei khah a mun chu itlângah a lui a, amakhan â ṭhung a. A kôilômhei a ziangah an hong ribûm a.

²Khanchu, anmani a lei inrisei a:

³“Rithla tianga an inriangzia [7] ririahei chu an ham a ṭhat; rivân ram chu an ta a nit.

⁴“Ringaiinsiahei chu an ham a ṭhat; Pathianin thlangam la sak a ti.

⁵“Ringai ichînhei chu an ham a ṭhat; Pathian ṭonginkung [8] kha la dong an ti.

⁶“Felna sika voniṭâma tuirihâlhei chu an ham a ṭhat; ikhop takkan la om an ti.

⁷“Mi lung inkham ngaihei chu an ham a ṭhat; Pathianin lung inkham a ti.

⁸“Lungril rithianghei chu an ham a ṭhat; Pathian la mûng an ti.

⁹“Ringeina siamtuhei chu an ham a ṭhat; Pathianin ama naihein la bêng a ti.

¹⁰“Pathian lungdo sin sika nuamlo tuanghei chu an ham a ṭhat; rivân ram chu an ta a nit.

¹¹“Keima sika min nangni an nel a, an nuam nangni an lo a, milak [9] sual tinrêngin nangni an no tikah chu nin ham la ṭhâng a ti.

¹²“Lôm unla, râi ifân takkan om rei, rivânah nin ta rangin loman iliantak ai om a nit. Khangkah ngirah khan nin matona zânthla lei iomhei khom kha an nuam an ilo ngai a nit.

¹³“Rinêng ichi nin nit; khanniseh, ichi hih a dong tâkin chu in-al nôk thei ni khâi mak e. Mangmunboi a chang a; khanungchu, an pai a, mîn an isirpol ngai a nit.

¹⁴“Rammual vâr nin nit. Itlângsîpa khua om chu ithup thei ni mak e.

¹⁵Tutên meiser ichokin khamlu nuaiah seh ngai mak, a sianah kêng an isia ngai; khanchu, in sunga mi murdi a elinvâr ngai.

¹⁶Khangkah ngirin nin vâr khah mi mitmuah vâr riseh; khanchu, nin sin ṭhathei mûng an ta, nin Pa rivâna mi inpâk thei an ti.

¹⁷“Mosia Dân neh zânthlahei inriseina thu inboi ranga zuangin ne iam no rei, khahei inboi ranga zuang ni mang a, an inriseinahei inrikip ranga zuang kêng kî nit.

¹⁸Thutak nangni ke ril, rinêng neh rivân a om kârkah chu Dan thua sun induk hatte manih, thâi inhâng riakte manih khom hih boi no nih, a rêngkan a tlung rikip riai mâkah chu boi tlak no nih iti remai rei.

¹⁹Khasikin, tukhom hi thupêk lâia khatkah khom a zôm noa, khangkana tho sa ranga mihei inrisei chu rivân ramah khan mi chîn tak nîng a ti. Nikhomseh, tukhom Dân a zôm a, khangkana tho sa rangin mihei ân riseiin chu rivân ramah khan mi lian nîng a ti.

²⁰Pathian lungdo sinna lama dân inriseituhei neh Farisaihei nêkan iiam nin om bangin kêng rivân ramah nin ilût thei rang iti nangni ki îril a nit.

²¹“Tianlâia mihei ziangah chu, ‘mi that no roh, tukhom mi that chu roirêlna makungah iding a ti,’ an ti ngai iti nin riat a.

²²Khanniseh, keiman chu tukhom a suapui chunga ningithik chu [10] roirêlna makungah iding a ti; tukhom a suapui ‘Mangmunboi’ iti chu roirêlna makungah iding a ti; khabanah, tukhom a suapui ‘Intlo’ iti chu meidîla [11] fe rang a nit iti nangni ke ril.

²³Khasikin, Pathian zianga ni thilpêk mâichâmah ni lan rang lâi tak khomin ni suapuiin ni chungah lung hoinona a nei iti ni riatin chu,

²⁴mâichâm bula ni thilpêk khah marak inla, fe zel inla, ni suapui neh ringei bak unla, kha rizoiin ni thilpêk khah Pathian ziangah khan lan roh.

²⁵“Mîn nang a no a, roirêl munah nang a ṭhuiin chu roirêl mun nin tlung ma, zoro a la om lâiin ringeipui roh; khanonchu, roirêltu kutah nang bâng a ta, ani khan manmihei kutah nang bâng nôk a ta, tâng inah ikhum nî nit rang a nit.

²⁶Thu dik nang ke ril, tangka dârkah ten khom ne tluk riai mâkah chu kha munah khan om mai ni ti.

²⁷“‘Inrê no roh’ iti a nit nin riat.

²⁸Keiman chu tukhomin nupang idit enin a enin chu a lungrilah khâmnu neh khan an înrê tâk a nit iti nangni ki îril a nit.

²⁹Khasikin, ni mit changtiangân nang ân ban chu ikhel pai inla, pai zel roh. Ni takpuma dûkmuna pai nêkan chu ni takpuma iṭang khatka boi chu ni ta rangin a ṭhat ual.

³⁰Ni kut changtiangân nang an ban chu tan pai inla, pai zel roh. Ni takpuma dûkmuna pai nêkan chu ni takpuma iṭang khatka boi chu ni ta rangin a ṭhat ual.

³¹“‘Tukhom a nupui ima kan chu mâkna lekha a pêk rang a nit,’ iti a nit sa a.

³²Keiman chu tukhom inrê sik ni loia nupui ima chu kha a nupui khah inrêa ai siam a nit; khante, kha mi nupui mâk tâk inei nôktu khom khah a înrê sa a nit iti nangni ke ril.

³³“Tianlâia mihei ziangah, ‘Ni ṭonginkung iseh non la, Pumapa zianga ni ṭongrikhâm khah ni len rang a nit,’ an ti iti khom nin riat a.

³⁴Keiman chu ṭong nin inkung zoron vâni rêng rêng risâm no rei. Rivân iching khomin vâni risâm no rei, Pathian rêngṭhungmun kêng ai nit;

³⁵rinêng iching khomin vâni risâm no rei, a ke siana kêng ai nit. Jerusalem isâm khomin vâni risâm no rei, Rêng roinpui tak khopui kêng ai nit.

³⁶Nin lu sâm khomin vâni risâm no rei, samzâi khatkah khom inṭekin, nin înduk thei ni mak e.

³⁷Nin ṭongbâi suak khah, ‘A nit’, manih ‘Ni mak’ manih ringot ni riseh, khabana kha chu suala rithoka suak a nit.

³⁸“‘Mit sika mit, ha sika ha,’ an ti iti nin riat a.

³⁹Keiman chu nin chunga thonsualhei chungah phuba lah no rei. Tukhomin ne biang changtiang â bênin chu voitiang khom do pêk sa roh.

⁴⁰Tukhomin ni sunglût rang sikin roirêl munah nang a ṭhuiin chu ni zakochung khom peh sa roh.

⁴¹Mîn a puak kilomitar khatka pêl pêk rangin nang a dânden chu kilomitar inikah pêl pêk roh.

⁴²Thil nang initu khah pen la, lâkai nang izongtu khah inmang roh.

⁴³“‘Ni rualhei lungthlung inla, ne râlhei nel roh,’ an ti iti nin riat a.

⁴⁴Keiman chu nin irâlhei lungthlung unla,[12] an nuam nangni lohei khah ṭongṭai pêk rei.

⁴⁵Khanchu, nin Pa rivâna mi naihei ni thei nin ti. Ani khan mi siahei neh mi ṭhahei chungah a nîsa khah â sua ngai a, iṭha sinhei neh isia sinhei chungah khom rua ân sûr pêk ngai.

⁴⁶Lung nangni thlunghei bang lung nin ithlungah hin Pathianin loman nangni ai pêk rang mani? Amakhah chu siadôltuhei khomin an itho ngai kêng ai nit.

⁴⁷Khante, nin rualhei ziang banga nin iṭongah hin im nin ithôn liap uala? Amakhah chu sanonghei [13] khomin an itho ngai a nit.

⁴⁸Nin Pa rivâna mi ai ṭhat rikip angkan nangni khom nin ṭhat rikip rang a nit.