Read Biete MATHAIA 6 Bible Online

MATHAIA 6 - Biete bible

MATHAIA 6

¹“Nin sin ṭhat sinhei khah miriam mitmuah, mi mu rangin sin no rei. Mi mu rangin nin sinin chu nin Pa rivâna mi zianga rithokin loman mu no tin u.

²“Khaangkan, miriam inkhôkhei thilpêk nin pêkin, vârrilethein inpâk an lo theina ranga inkhôm inhei neh lam ilianheia an itho ngai angkan tho no rei. Nangni ke ril, an loman chu an imu zoi tâk a nit.

³Khanniseh, nangni chu miriam inkhôkhei thilpêk nin pêkin, nin rual ṭhahei [14] tak khomin an riat no rang lamin tho rei.

⁴Khanchu, inrûkka sin itho nîng a ta, inrûkka nin sintho mu ngaitu nin Pa khan loman nangni pêng a ti.

⁵“Nin ṭongṭaiin vârrilethei angkan tho no rei. Mîn an mu theina rangin inkhôm inheiah neh lamilianheiah idinga iṭongṭai an inlut ngai a. Nangni ke ril, an loman chu an imu zoi tâk a nit.

⁶Khanniseh, nangni chu nin ṭongṭaiin, nin chontanah lût unla, in khâr unla, nin Pa, mita mu thei ino ziangah ṭongṭai rei. Khanchu, inrûkka nin sintho mu ngaitu nin Pa khan loman nangni pêng a ti.

⁷“Nin ṭongṭaiin, Jentailhei angkan ṭong, omzia boi mang no rei, anni khan an ṭongṭai sôt sikin an pathianin reh ual a ti an isôn a nit.

⁸Anmani angkan om no rei. Nin ngên man nin Pa khan nin înkhôk chu ai riat kêng ai nit.

⁹Khasikin, nangni chu hingka hin ṭongṭai ngai rei: “‘Kin Pa, rivâna mi, Ner ming rithiang marit om riseh;

¹⁰Ni ram zuang tlung riseh; Ni lungdo rivâna mîn an isin angkan rinênga mîn sin riseh.

¹¹Vuansûna kin fâk rup ne peh roh.[15]

¹²Kin chunga thonsualhei kin îzâ angkan, Kin thonsualhei ne zâ roh.[16]

¹³Thlêmnaah ne ṭhui inlût non la, Mi Suala [17] rithoka khan ne hoih roh.’ [18] itin.

¹⁴“Nin chunga thonsualhei nin izan chu nin Pa rivâna min nangni zâ a ti.

¹⁵Khanniseh, mi nin izâ non chu nin thonsualhei nin Pan nangni zâ ual no nih.

¹⁶“Bu nin ngeiin, vârrilethei angkan ingûi mêl ripuh no rei. Anni khan chu mi mitmuah bu ngeia an ilang theina rangin an mêl an inngûi ngai a. Nangni ke ril, an loman chu an imu zoi tâk a nit.

¹⁷Nangni chu bu nin ngei zoro khomin nin mâi phi unla, nin sam khui rei.

¹⁸Khanchu, bu nin ngei iti min reh thei no nia, nin Pa, mita mu thei ino bangin riang a ti. Khante, inrûkka nin sintho mu ngaitu nin Pa khan loman nangni pêng a ti.

¹⁹“Rinêngah, ringe neh ithimin a fâk isiat theina, inruhein an irûk theinaah hin nin ta rangin richon bûm no rei.

²⁰Rivânah, ringe neh ithimin a fâk isiat thei khâi nonah neh inruhei khomin an irûk thei khâi nonah nin ta rangin richon bûm rei.

²¹Nin richon omna takah nin lungril khom om a ti.

²²“Mit hi takpum ranga meiser angkah a nit. Nin mit a felin chu nin takpumkan invâr a ti.

²³Khanniseh, nin mit a siatin chu nin takpumkan zîng khap a ti. Khasikin, nin sunga vâr khah izîng ni sela, ingka dôra zîng richel im ai nit rang tâk na!

²⁴“Tutên puma inika sin inrikop thei no nih; khatkah nel a ta, khatkah lungthlung a ti; anitnole, khatkah thlop a ta, khatkah enkhûm a ti. Pathian sin neh sum sin inrikop thei no tin u.

²⁵“Khasikin, nangni ke ril, ‘Im ki fâkin ki in rang tâk na?’ itin nin ring tlia thu neh ‘Im ki silin ki bom rang tâk o?’ itin nin takpum rangin lunginkâng no rei. Ifâk nêkan ringna lu ual mak im a? Isil ibom nêkan takpum lu ual mak im a?

²⁶Chungavuang ivahei hih en ta u: bu tu mak a, bu ât ual mak a, fasiarah bu bûm ual mak e; khan khoma nin Pa rivâna mîn a donsui mai ngai. Nangni vâng teh ivahei nêkan nin ilut ual ok ni mak im a?

²⁷Tûm nin lâiah â lung kâng sika a ringna insei [19] viat thei?

²⁸Silbom rang sikin îrang im nin ilung nin înkâng? Rama pârhei thuar dân hih en ta u: an ta rangin sin khom zong mak a, puan khom không mak.

²⁹Nikhomseh, nangni ke ril, rêng Solomona lua khom a roinpuina murdia arvoah khan hi pâr khatka dôra lua khom hih â en hoi mak e.

³⁰Loisûl vuaninta om a, naktûka ram nôk a, lungthua tua rip rang ilua khangkah takin Pathianin a von teh, iamna chînhei o, khahei nêkan isil ibom nangni peh ual no nîm a?

³¹Khasikin, ‘Im kin fâka kin in rang itin neh im kin sila kin bom rang?’ itin nin ilung inkâng no rei.

³²Sanonghein khahei bang kha kêng an ibuaipui ngai. Khahei murdi khah nin nang iti nin Pa rivâna mi khan ai riat mai a nit.

³³Pathian ram neh a felna khah zong masa rei;[20] khanchu, hi thil danghei murdi hih nangni ai pêk sa rang a nit.

³⁴Khasikin, naktûka rangin lunginkâng no rei, naktûk khan ama ta rangin ngaituang a ti. Sûnkah dengthei hih ibôk nang mak e.