Read Biete MATHAIA 7 Bible Online

MATHAIA 7 - Biete bible

MATHAIA 7

¹“Mi sêl no unla, isêlin om no tin u.

²Mi nin sêl lam takin Pathianin nangni sêl a ta, mi chunga dân nin imang tak khah nin chungah khom mang an ti.

³Ithôm ni mita thingtum iom khah ngaitua loiin, ni suapui mita inim lekte om khah nî mu hi?

⁴Ingkan im ni mita thingtum iom ṭiankan ni suapui ziangah, ‘Ni mita inim lekte khah nang lei kêl pêk rong’ ni ti ngam tlia?

⁵Nangmah vârrilet! Nangma mita thingtum khah pai bak inla; khanchu, ni suapui mita inim lekte om ikêl rangin ifel riaikan mu thei ni ti.

⁶“Uihei ziangah itika rithiang khah peh no rei, hong rihêl an ta, nangni an sê lôiin. Vok makungah khom nin lungilu pai no rei, chîl isiang an ti.

⁷“Ngên rei, nangni pêng a ti; zong rei, mûng nin ti; ikik rei, nangni ong pêk a ti.

⁸Tukhom â ngên murdi chu ipe nîng an ta, â zong murdi kan chu mûng an ta, â kik murdi chu inkhâr iong pêk nîng an ti.

⁹Nangni pahei lâiah a tukhom hih, a naipan ibai ngên sela, tûm lung ipeh rang?

¹⁰Anitnole, inga ngên sela, tûm irûl ipeh rang?

¹¹Nangmani mi siahei manin nin naihei thil iṭha pe nin riatin teh, nin Pa rivâna mi vângin chu â ngêntuhei chu thil iṭha ai pêk intam rang vang na!

¹²“Mîn nin chungah sin sela nin inuam tak khah mi chungah khom sin rei; amakhah Mosia Dân neh zânthlahei inriseina thu chu a nit.

¹³“Kotbâi richêpah khan lût rei, dûkmun kotbâi [21] chu arzat a, a lampui khom a hoi a, kha lampuia fehei chu itam takkah an nit.

¹⁴Khanniseh, ringna kotbâi chu archêp a, a lampui khom ân tak a, â mutuhei khom mi iroichekah an nit.

¹⁵“Zânthla lemhei ata ridîn rei; putiang chu bera vun isilin nin ziangah an hong ngai a; nikhomseh, sungtiang chu inia inruak tak angkah an nit.

¹⁶Khahei kha chu an sinthoah reh zel nin ti. Riling bukah grep irâ ngai mak a, riling kungah khom theichâng irâ ngai mak e.

¹⁷Thing iṭha chu â râ khom a ṭhat ngai a, thing isia chu â râ khom a siat ngai.

¹⁸Thing iṭha â râ seh ngai mak a, thing isia khom â râ ṭha ngai mak e.

¹⁹Thing tin â râ ṭhano chu an iphûr a, meiah an tua ngai.

²⁰Khasikin, Zânthla lemhei chu an sinthoah khan reh zel nin ti.

²¹“‘Puma, Puma,’ ne ti pai murdi rivân Ramah lût no nia, ki Pa rivâna mi lungdo sintuhei chu lût an ti.

²²Roirêl nikhua a hong tlungin mi tam takkan, ‘Puma, Puma, ner mingin Pathian thuhei kin isîr ngai a, ner mingin ramrilihei kin ûmisua ngai a, ner mingin sinrikhêlhei khom itam takkah kin sin ngai,’ la tîng an ti.

²³Kha tikin chu keiman an ziangah, ‘Nangni mi sualhei, nangni reh tlak ngai mang e, ki zianga rithokin ro ta rei,’ la tîng ki ti.

²⁴“Khaangkan tukhom hi ki thuhei iria a, zôm murdi chu mi vâr, lungpui chunga in isintu angkah a nit.

²⁵Rua a zuang sûr a, tui a hong lian a, phâivua a hong râng a, kha in khah a hong nam vit vit a; nikhomseh, lungpui chunga sin a nit sikin chim mak e.

²⁶“Khanniseh, tukhom hi ki thuhei iria a, zôm ino chu intlo ṭiaidôka in isintu angkah a nit.

²⁷Rua a zuang sûr a, tui a hong lian a, phâivua a hong râng a, kha in khah a hong nam vit vit a, a chim tâk a. A chim dân chu natinsat tak a nit,” a ti a.

²⁸Jisuan kha thuhei khah â sîr zoiin chu mipuihein a thu inrisei khah arkhêl an ti tak tak a.

²⁹Dân inriseituhei angkah ni loi a, richam inei takka anmani ân risei sikah khan.[22]