Read Biete MATHAIA 8 Bible Online

MATHAIA 8 - Biete bible

MATHAIA 8

¹Khante, Jisua itlânga rithoka a zuang ṭumin chu mipui itam takkan an zui a.

²Khanchu, a ziangah iphâr khatkah a hong a, a makungah rikhûk idilin, “Epu, ni nuamin chu ni nen rithiang thei,” a ti a.

³Jisuan a hang iban a, a tôn a, “Ki nuam, hong rithiang ta roh,” a ti a. Tukvakkan â phâr khah a hong rithiang zel tâk a.

⁴Khanchu, Jisuan a ziangah, “Ringai roh, tute iril no roh; khannisela, thiampu ziangah thleng thal inla, vân en roh; khanchu, ni dam tâk iti mi tinin an riatna rangin Mosian ribôlna ilan ranga a înkung khah lan roh,” a ti pêk a.

⁵Khante, Jisua kha Kapernaum khua a hong lûtin chu a ziangah Rom.sipai rizaka ruitu a hong a,

⁶“Epu, ke som dam mak a, izeng châng thei loiin inah takkan zâlmunah a om,” itin indam pêk rangin ṭhatnemringai takkan a ngên a.

⁷Jisuan a ziangah, “Hong ki ta, indam ki ti,” a ti a.

⁸Sipai rizaka ruitu khan a ziangah, “Epu, khangkan ni mak, ki insung ni lûtna tlâk ni mak e. Ṭongbâi ringot tin la, ke som dam zel a ti.

⁹Kei khom mi nuaia om ki nit a, ki nuaiah khom sipaihei an om a. Mi khatka ziangah, ‘Fe roh,’ ki tin chu a fe ngai a; mi dang ziangah, ‘Hong roh,’ ki tin chu a hong ngai a; ke som ziangah khom, ‘Amahih sin roh,’ ki tin chu a sin ngai,” itin a sâm a.

¹⁰Jisuan kha ṭong khah a riatin chu arngai arkhêl ok a, mipui â zuihei ziangah khan, “Nangni ke ril, Israelhei lâi khomah hi dôrka iamna lian hi chu la mu mang e.

¹¹Ti titakin nangni ke ril, sak neh thlang ata mi itam takka hong an ta, rivân ramah khan Abrahama hei, Isaka hei, neh Jakoba hei ziangah ruaiṭhena rikhîl an ti.

¹²Ram naihei [23] kha chu putiang izîngah pai isuan om an ta; amakhan ṭap an ta, an rikam inritông an ti,” a ti a.

¹³Khanchu, Jisuan sipai rizaka ruitu ziangah khan, “Ni inah fe tan la, ni iam lam angkah takin ni ta rangin isin nîng a ti,” a ti a. Khanchu, kha mitrikhap ngêiah khan sipai ulianpu som khah a dam tâk a.

¹⁴Khante, Petera inah Jisua a fe a, Petera tarpi inkhura zâlin a mu a.

¹⁵A kut a tôn pêk a, ân khur khah a boi pêk zel tâk a; khanchu, a thoi a, thlâi a sin pêk tâk a.

¹⁶Khante, kholoi a hong nitin chu mipuihein Jisua ziangah ramrili iman mi itam takkah an hong ṭhui a. Jisuan ṭongbâiin ramrilihei khah a ûm isua a, dam ino murdihei khom ân dam sa a.

¹⁷Zânthla Isaian, “Amah ngêiin ei râtnonahei a lâk a, ei natnahei a pêl tâk,” itia a lei îsîr khah a hong tlung idik theina rangin amakhah ai tho a nit.

¹⁸Khante, mipui itam takkah a kôla om Jisuan a mun dîl râl tianga kâi rangin a kôilômhei khah thu a pêk a.

¹⁹Dân inriseitu khatkah a ziangah a hong a, “Minriseitu, ni fena mun tinah nang zui ki ti,” a ti a.

²⁰Jisuan a ziangah, “Sihalhein khur an nei a, ivahei khomin ribu an nei a; khanniseh, Miriam Naipa chu a lu ringatna rang ilua nei mak e,” a ti a.

²¹Khante, a kôilômhei lâia mi dangin a ziangah, “Puma, inah nen fe nôk inla, ki pa la va phûm bak hi rong,” a ti a.

²²Jisuan a ziangah, “Ne zui roh, mithi khan an mithi champui chu phûm riseh,” itin a sâm a.

²³Khante, Jisua rikuangah a chuang a, a kôilômhei khan an zui a.

²⁴Khante, tukvakkan thlipui a hong râng a, rikuang khah rinîk pai rangin a om tâk a. Nikhomseh, Jisua chu a in thlar a.

²⁵Kôilômhei khah a ziangah an fe a, an va thoi a, “Puma, nen zôk roh, kin irmang rang a nit,” an ti a.

²⁶Jisuan an ziangah, “Ithôm nin ṭi bâk a? Ingkana nin iamna khom ai chîn rai tâk im na!” a ti a. Khanchu, a thoi a, thlipui neh tuirisok khah ringam rangin thu a pêk a; khanungchu, a hong dâi dup tâk a.

²⁷Mi tin an ringai arkhêl a, “Hi mi hih ingkana mi tak im ai nit? Thlipui neh tuirisok tena khomin a thu an izôm hi!” an ti a.

²⁸Dîl râl tiang Gadarin [24] mihei ram kha Jisua a hong tlungin chu ramrili iman mi inikah, ithlâna rithoka hong isuakhein an hong pun a. Khahei khah iṭi an om tak tak a, kha lampuiah khan tute an ife ngam ngai ino a nit.

²⁹Voikarengin anni khah an ikhêk a, “Pathian Naipa, im ne lo rang nî ti? Zoron kung tlung maa deng nen thei ranga nî zuang im ai nit?” an ti a.

³⁰Khantaka rithoka inâi sarka tah khan vok lôm fâk izong an om a.

³¹Khanchu, ramrilihei khan, “Ni ne ûmisua rangin chu vok lômhei sungah son nen lût roh,” itin Jisua an riphat a.

³²Jisuan an ziangah, “Va lût rei” a ti a. Khanchu, an suak a, vokhei sungah khan an va lût tâk a. Khante, vok lôm khah an rêngkan dîl rikama rôlbôkah an itlân a, dîlah khan an rinîk vang tâk a.

³³Khante, vok irâkhâlhei khah an itlân a, khosungah an fe a, thil omzia tinrêng an isîr a, ramrili imanhei chunga thil hong itlung khom khah an isîr a.

³⁴Khanchu, a kho pumin Jisua mu rangin an suak a; khante, amah an va mun chu an ram ata suak rangin an ngên tâk a.