Read Biete MATHAIA 9 Bible Online

MATHAIA 9 - Biete bible

MATHAIA 9

¹Jisua kha rikuangah a chuang a, dîl râl tianga, ama omna khua tiang a kîr nôk a.

²Amakhan mi ṭhenkan, izeng khatkah, a zâlmun pumin a ziangah an hong rizôn a. Jisuan an iam tlia a mu a, izeng ziangah khan, “Ki nai, rithlaringam takkan om roh, ni sualhei izâ a nit tâk,” a ti a.

³Khanchu, Dân inriseitu ṭhenkahei khan an lungrilin,[25] “Hi mi hin Pathian a îsîr insiat a nit,” an ti a.

⁴Jisuan an lungrila an ingaituahei khah a lei riat a, an ziangah, “Ithôm khangkana thil ṭhano nin lungrilah nin ingaitua?

⁵‘Ni sualhei izâ a nit tâk’ iti neh ‘Thoi inla, ken lôn ta roh,’ iti hih a îhîm â ti a ol ual?

⁶Miriam Naipa hin rinêng chunga sualhei izâ theina richam a nei iti nangni ki înmu rang a nit,” a ti a. Khanchu, izeng ziangah khan, “Thoi inla, ni zâlmun lan la, ni inah fe ta roh,” a ti pêk a.

⁷Khanungchu, kha mi khah a thoi a, a inah a fe tâk a.

⁸Mipuihei khan amakhah an mun chu an ṭi [26] a, kha angkana richamneina miriamhei zianga petu Pathian khah an inpâk tâk a.

⁹Jisuan kha mun khah a mâk a, a fe malamin siadôltu khatkah arming Mathaia, a ofisa ṭhung khah a mu a, a ziangah, “Ne zui roh,” a ti pêk a. Mathaia khah a thoi a, a zui tâk a.

¹⁰Khante, Jisua kha a kôilômhei neh Mathaia inah bu an nêk lâiin siadôltuhei neh mi sual itam takkah an hong a, Jisua neh a kôilômhei khah khalai an hong rikhîlpui a.

¹¹Farisai ṭhenkahein amakhah an mun chu a kôilômhei ziangah, “Ithôm nangni inriseitu hin hingkana mihei lâiah khalai a irkhîl sa hi?” an ti a.

¹²Jisuan an ṭong khah a lei riat a, an ziangah, “Idamhein dâktor zong ngai mak a, inṭethein kêng an izong ngai.

¹³Pathian Thubûn, ‘Ribôlna nêkan lungkhamna kêng kî nuam,’ ai ti hih fe unla, a omzia va reh rei. Mi felhei rilam ranga zuang ni mang a, mi sualhei rilam ranga zuang kêng kî nit,” a ti a.

¹⁴Khante, baptistu Johana kôilômhei kha Jisua ziangah an hong a, “Ithôm keini neh Farisaihei hin bu kin ngei mai ngai a, ni kôilômhei rêk hin chu an ngei tlak ngai no?” itin an ridon a.

¹⁵Jisuan an ziangah, “Rineina ruaiṭheah moineitu an ziangah a om sungin khualmihei khah beindong rangin nin itûng mani? Ni thei no nih; khannisela, moineitu khah an ziang ata iṭhui pêk pai nikhua la tlung a ta, kha tikin chu bu la ngei an ti.

¹⁶“Tutên puan ilui, puan ithar lekin pô ngai mak; an pôna puan lek ithar khah intûm a ta, puan khah iṭhet ual a ti.

¹⁷Tutên uain ithar khom savun peng iluiah thun ngai mak; thun ngân ta sela, uain ithar khan savun penghei khah mût ikhoi a ta, a uain neh a savun penghei kha mangmunboi chang a ti. Khasikin, uain ithar chu savun peng itharah an thun rang a nit; khanchu, a ṭhat seng seng ngai,” a ti a.

¹⁸Jisuan kha thu khah â sîr lâiin, Juda ulian khatkah a hong a, a makungah rikhûk idilin a ziangah, “Atûn takah khan ki nainu a thi a; nikhomseh, hong inla, a chungah ni kut ringat inla, hong ring nôk a ti,” a ti a.

¹⁹Khanchu, Jisua khah a thoi a, a kôilômhei neh ani khah an zui tâk a.

²⁰Khante, nupang khatkah, kum sômlei kum inika thi suak dam ino Jisua nungah a hong a, a puan môr a tôn a.

²¹A lungrilin, “A puan môr ilua khom tôn inlang dam zel ki ti,” ai ti a nit.

²²Jisua khah arhêl a, khâmnu khah a mu a, a ziangah “Ki nainu, rithlaringam takkan om roh; ni iamna hih nî dampui a nit,” a ti a. Kha mitrikhapah khan nupangnu khah a hong dam tâk a.

²³Khanchu, Jisua khah ulianpu in khah a va tlung a, belem itumhei neh mipui rilût suaihei khah a va mun chu an ziangah,

²⁴“Nin rêngkan rikiang hi ta u, naipang hih thi mak e, â in kêng ai nit,” a ti a. Khanchu, anni khan an lei nuiso a.

²⁵Nikhomseh, mipuihei an ûmisua zoiin chu naipang omnah khan a lût a, naipang kut khah â tûk a, naipang khah a hong thoi tâk a.

²⁶Kha ram pumpuiah khan kha thurchi khah ân thang tâk a.

²⁷Khante, Jisuan kha mun khah a mâk a, a hei fen chu mitdel inikan an zui a, “Davida Naipa, lung nen kham roh,” itin an ikhêk a.

²⁸Jisua insungah a lûtin chu mitdel inikahei khah a ziangah an hong a, Jisuan an ziangah, “Nangni indam thei ki ti nin iam im?” itin ardon a. “O kin iam, Puma,” itin an sâm a.

²⁹Khanchu, an mit a tôn pêk a, an ziangah, “Nin iam lam angkan nin chungah tlung riseh,” a ti a.

³⁰Khanungchu, an mit a hong vâr tâk a; Jisuan ikhir takkan an ziangah, “Hi thu hih tute iril tlak no rei,” itin he a be a.

³¹Nikhomsela, anni khah an fe a, kha ram pumpuiah khan Jisua thurchi an thanginthei tâk a.

³²Khante, kha mihei khah an suak lâiin, mi ṭhenkan ramrili imana ṭongtheiino khatkah Jisua ziangah an hong ṭhui a.

³³Khanniseh, ramrili khah ûmisua a nit kaneh chu kha miriam khah a hong ṭong thei zel tâk a. Mipuihei khah an ringai arkhêl tak tak a, “Israelhei lâiah hingkana rêng rêng hih la mu ngai mang me,” an ti a.

³⁴Nikhomseh, Farisaihei khan chu, “Ramrilihei rêngpa khan ramrilihei ûmisua theina ritha ai pêk a nit hih,” an ti a.

³⁵Jisuan khua lian neh khua chînhei arfang a, inkhôm inheiah ân riseia, Ram Thurchi Ṭha â sîr a, damnona neh natna tinrêng ineihei khah ân dam a.

³⁶Mipuihei khah a mun chu, â enkoltu nei ino berahei angkana denginthei neh richek rakkan an om sikin lung ân kham tak tak a.

³⁷Khanchu, a kôilômhei ziangah khan, “Bu ât rang a tam tak tak a, khanniseh, sinthotu lak an roi a.

³⁸Khasikin, a bu ât ranga mi tir rangin bu neitu ziangah khan ngên rei,” a ti a.