Read Biete MARKA 1 Bible Online

MARKA 1 - Biete bible

MARKA 1

¹Pathian Naipa, Jisua Krista Thurchi Ṭha chu amahih a nit.

²Zânthla Isaia lekhabuah: “Pathianin, ‘Ki tirtôn ni matonah tir ki ta, Ani khan ni lampui siam a ti,’

³Ramchâra mi khêk rôl khan, ‘Pumapa lampui siam unla, A lampuihei khom intlûn rei,’ a ti,” itia a îsîr angkah khan a irphut a nit.

⁴Baptistu Johana khah sual izâna ranga baptisma tho rang neh thu sîrin ramchârah khan a zuang a. Mipuihei ziangah, “Nin sualhei ata rilet unla, baptisma chang rei; khanchu, Pathianin nin sualhei nangni zâ a ti,” itin thu â sîr ngai a.

⁵Judai ram neh Jerusalem khua rithokin mi itam takka Johana thu sîr ringai rangin an fe a. An sualhei thupha an chôi a; khanchu, ani khan Jordan dungah a lei baptis a.

⁶Khante, Johana khan saringsei mul puan a sil a, savun kongkhit a khit a. A fâk chu khâifapôl neh rama khuaitui a nit.

⁷Khante, mipuihei ziangah, “Ke nunga zuang rangtu hi chu keima nêka roinpui ual a nit a, kei chu ikhûna a pheikok rui isût rang iluan ritluk mang e.

⁸Keiman chu tuiin nangni ki baptis ngai a; khannisela, ani khan chu Rithla Rithiangin nangni baptis a ti,” itin thu ân puang a.

⁹Khante, sûnkah chu Jisua kha Galili rama Nazaret khua rithokin a hong a, Jordan dungah khan Johana ziangah baptisma a chang a.

¹⁰Jisua khah tui ata a hong suak kaneh chu, rivân ar-onga, Rithla Rithiang vaṭhu angkana zuang iṭum a mu a.

¹¹Khanchu, rivâna rithokin, “Nangmah, ki Naipa lungthlungtak ni nit, ni chungah ki lôm tak tak,” iti ṭong a zuang suak a.

¹²Khanungchu, voikarengin Rithla khan ramchârah a tir zel tâk a.

¹³Amakhan sûn sômilikah sar Soitana îthlêmin a om a. Ramsahei lâiah a om a; nikhomseh, vântirtônhein a sin an zuang tho pêk a.

¹⁴Khante, Johana khah an man nungah khan Jisua kha Pathian [1] Thurchi Ṭha sîrin Galili ramah a fe tâk a.

¹⁵“Zoro khah a hong tlung tâk; Pathian Ram khom a nâi tâk e! Nin sualhei ata rilet unla, Thurchi Ṭha hih iam ta rei,” a ti thiai a.

¹⁶Khante, Jisuan Galili dîl rikam irûla a lôn lâiin inga mantu mi inikah Simona neh a unaipa Andria khah dîla an lên idêngin a va mu a.

¹⁷Jisuan an ziangah, “Ne zui rei; khanchu, miriam iman rangin nangni siam ki ti,” a ti pêk a.

¹⁸An lênhei an mâk a, ani khah an zui zel tâk a.

¹⁹Khante, a hei fe nôk ual viatin chu urnai danghei, Zebedaia naipa Jakoba neh a unaipa Johana a mu nôk a. An lênhei isiamin rikuangah an lei om a.

²⁰Jisuan anni khah a mu kaneh chu a koi zel a; khanchu, an pa Zebedaia neh rilomihei khah rikuangah an mâk a, Jisua kha an zui zel tâk a.

²¹Khante, Jisua neh a kôilômhei khah Kapernaum khuaah an fe a, sabatnî-ah khan Jisua inkhôm inah a lût a; mi ân risei zel tâk a.

²²Dân inriseituhei angkan ni loia thunei takka anmani ân risei sikah khan ân risei dân iria mipuihei khan arkhêl an ti tak tak a.

²³Khante, an inkhôm inah khan ramrili iman mi khatkah a lei om a;

²⁴Kha mi khan, “Nazaret Jisua, keimani neh nangmah im ei rimanna a oma? Nen rimang ranga nî hong mani? Nang ki riat Pathian tirtôn rithiang ni nit,” itin â khêk a.

²⁵Khante, Jisuan ani khah a ngo a, “Dâirek inla, a sung ata hong suak roh,” a ti a.

²⁶Khanchu, ramrili khan ani khah a nuam a lo bit zoiin chu iring takka khêkin a sung ata khah a hong suak tâk a.

²⁷Khanungchu, mipuihei khan arkhêl an ti tak tak a, “Amahih im ai nit hi? Riseina thar ai nit nîng a ti. Ramrilihei khom thunei takkan ṭong a pêk a, a ṭong an izôm zel hi,” an ti a.

²⁸Khanchu, Galili ram pumpuiah Jisua thurchi khah ân thang tâk a.

²⁹Khante, Jisua khah inkhôm in ata a suak a, Jakoba neh Johana a ṭhui a, Simona neh Andria in tiang an fe zel a.

³⁰Simona tarpi khah inkhura dam inon a lei zâl ṭian a; Jisua a va tlung kaneh chu a damno thu khah an lei iril a.

³¹Khanchu, Jisuan a va nâi a, a kutah â tûk a, a kâi ithoi a. Khan zel ân khur khah a boi a, an fâk rang ân rifûk pêk tâk a.

³²Khante, kholoi a hong nit a, inî a tlâk rangin chu mipuihei khan Jisua ziangah dam ino murdi neh ramrili imanhei an hong ṭhui a.

³³A kho pum rengin inkhâr bulah khan an hong ribuk zit tâk a.

³⁴Jisuan natna tinrênga damino mi itam takkah ân dam a, ramrili itam takkah a ûmisua sa a. Ramrilihei khan amah [2] an riat sikin an ṭong rang phal mak e.

³⁵Atûk zîngah chu khua a la vâr ma rengin Jisua a thoi a, in ata khah a suak a. Khosung ata khah mun infiarah a fe a, amakhan a ṭongṭai a.

³⁶Khante, Simona neh a champuihein Jisua an zong a,

³⁷an va mu tenan chu a ziangah, “Mi tinin nang an izong mai kêng,” an ti a.

³⁸Khanniseh, Jisuan an ziangah, “Hi vêla kho danghei khomah hin ei fe ngêt rang a nit. Hihei khomah hin thu ke sîr rang ai nang a nit, amakhah ki zuangna bi tak a nit,” a ti a.

³⁹Khaangkan, inkhôm inheia thu sîrin neh ramrilihei ûmisua thiaiin Galili ram pumpui arfang suak tâk a.

⁴⁰Khante, Jisua ziangah iphâr khatkah a hong a, “Ni nuamin chu ni nen rithiang thei,” itin a makungah rikhûk idilin a hong riphat a.

⁴¹Jisuan iṭha takka rengin lung a lei inkham a, a hang iban a, a tôn a, “Ki nuam, hong rithiang ta roh,” a ti a.

⁴²Khanchu, voikarengin a phârna khah a boi zel a, arthiang tâk a.

⁴³Jisuan ṭong ikhir tak a pêk a, ân fe zel a,

⁴⁴a ziangah, “Hi thu hih tute iril tlak no roh. Khanniseh, thiampu ziangah thleng thal inla, vân en roh; khanungchu, mi tinin ner thiang nôk tâk iti an riatinfelna rangin Mosian ribôlna ilan ranga ai ti khah lan roh,” a ti pêk a.

⁴⁵Nikhomseh, ani khah a suak a, kha thurchi khah mun tinah isîrin thang ân thei tâk a. Â sîr inpuang rai sikin Jisua chu khuaah khom â langin lût thei khâi mak a. Mun infiarheiah a om tâk a; mun tina rithokin mihein an hong pan ngir a.